اخترنا لكم

مادامت مسلم تعبد الله وتخشاه
باقي الأمور الي في بالك يسيره

والعافية الي لقاها بدنياه
أنشهد أنها عند غيري كبيره

والله ولا مخلوق بالكون ينساه
حتى نضام الكون عنده يديره

.....

قلبٍ يعرف الصعب ويطول الاصعاب
‏ما ينكسر لو لاهب الوقت مسّه

‏أنا كبرت أكثر على كلمة عتاب
‏وعن رفع شيٍ بالأراضي مدسه

‏روحوا ولكن لا تقولون لي خاب
‏ما يخيب اللي يعرف قدر نفسه

.....

‏القلب سلمته لواحد من الناس
‏وماالله خلقلي في الجسد قلب ثاني

‏له المحبه والمشاعر والاحساس
‏وما تكتب يديني وينطق لساني

.....

يارب يامن في يدك طب الاجراح
اجبر خواطـر في الضماير نكيده

وافتــح لنا بالخيــر يا خيـر فتاح
فيك الامل يا الله وفيك العقيده

.....

‏ليش البشـر صارو غريبيـن الاطوار
وصـارو ابو وجهيــن مخلـص وبايق

من كثرهــم مقـدرت اميز بالانظار
ولااقدرت افرق بين كاذب وصادق

حتى الصديق اللي أعـــده للاخطار
واللي أضنه للصحـب شخص لايق

يتقـــــن ويتفنــن بتمثيــل الادوار
وفي طلتي صــادق وخلفـي منافق

.....

‏عسى خيـــــر بعـــد اتعابنا يــوم نرتاح
وعسى الامــل يأتي بطيــب الاماني

وعسى ورا الاحـــــــزان تأتينــا الافراح
وعسى السعــاده ماتفـــارق كياني

وعسى حظوظ الوقت تنسينا الاجراح
وعسى القدر يمحي جروح المحاني

وعسى الزمن يضحك لناعقب ماطاح
وعسى المـرح يبقى طوال الزماني

.....

‏مشتاق لك واحسـاس قلبي يناديك
وعينـي على شوفك تخايل بصـرها

الروح ذابــت يابعـــد روح مغليك
والنفس تعبت مـن غيابك كسرها

يا كم سهر قلبـي وشوقــه يناديك
يحاكي السما منك ويسال قمرها

وينك قسم نفسي ترى ذايبه فيك
والروح مشتاقه وبُعـــدك أسرها

.....

‏يا حبيــب الروح لاتهـمــــل ضياعي
عاشقـــك اصبـــح في الدنيا قطيع

صرت مثل اليخـت مقطوع الشراعي
تايهـــن دربه في البحـــــر الوسيع

ليت يا المحبــوب تصغي لاستماعي
قبـــل ماعقلي مــن الفرقى يضيع

لاتعـــــذبني بهجــــــــري وانقطاعي
يكفي ان القلب من هجرك وجيع

.....

‏إن كنت لي مشتاق شوقي لك اضعاف
وشوقي ضعـف شوقـك بعشرين مره

ياليت كان الشـــوق بالعيـــن ينشاف
كانك عرفت بكبــــر شوقـــي وقدره

ياخل شوقي لك قسـم ماله اوصاف
من غيبتــك قلبـــي تعــــذب بقهره

راعي شعـــورك لو مــن الله بتخاف
وارحم معـذب عاش دونك بحسره

.....

‏الناس مـن حـولك يشوفـوك مرتاح
ويحســدوا حظـــك اذا كنــت رايق

مايـدروا ان النفـــس مليانه اجراح
والقلـب من كثــر المواجيـع زاهق

حال البشر نظراتهم عكس ياصاح
مايشعــروا باللــي خفتـه الحقايق

يقيموا وضعك على ضحك وامزاح
ولو كان قلبك داخل الصدر ضايق

.....