فوق هام السحب ( الشعر الشعبي) على متن القوافي

‏

فـدوة عيونك لوغـدت روح مغليـك
وش عاد لو راحت لعينك عشاير

أبيع مايغلى على الكـون وأشـريـك
واسوق لا جتي علومك بشاير

وازعِل جميع الناس بالحيل وارضيك
واصبر ولو دارت علي الدوايـر

وآخذ من أيامي لك أيـام وأعطـيـك
وان راح عمري لك فلا هو خساير


الأمير خالد الفيصل

كل دارٍ أرجعت وانا سناوي
عزتي للي سواتي عزتي له

زادت الحمى فرحنا للمداوي
والمداوي زود الحمى مليله

ياجميله قام يطوي الحال طاوي
والله ان كبدي على شوفك غليله

والله ان قلبي على اللاماء شفاوي
غير مافي يدي ولا في يديك حيله

سجليني في علم حبك فداوي
انا مجنونك عقب مجنون ليله

يا رقبه الخشف ياعين النداوي
ياسراجيف الذلول المستحيله

يامناةٍ تنقصر عنها المناوي
ياخيار الدهم يالقبا الاصيله

نعنبوك انتي مكاسر عود جاوي
ملبسك سندس وشربك سلسبيله

لو تمرين الشيوخ اهل الفتاوي
عودوا مثلي يجرون الطويله

من عشق شرواك ولا لايهاوي
التقيد من بعض الاشياء فضيله


سعد بن جدلان

كم مفرق كل ماجيته تعديته
لاشوف خطه ولا أقراء ويش لوحاته

ياكود مفرق رقبة العطف لاجيته
يفرض علي الألتفاته والتنهاته

في حشمة اللي مصافيني وصافيته
من خلقتي ماحد سوى بي سواته
.
مايسمح البال لين أقف على بيته
وأضرم له أضرامة الزيدي على قاته


سعد بن جدلان

يا ليت من هو باله اليوم مرتاح
نومــه هنـي يرقــد و عينه قريره

مثل الطفل لا طاح في مرقده طاح
لا شــاغله هــمه و لا هـم غـيره
يا قلب لا تحــزن على فايتٍ راح
كثر الألـم والحــزن ما فيه خـيره

باب يجيب الهــم صكـه وأرتاح
خلـه بديره و أنت خـلك بديره

ماراح راح و عادة الكرب ينـزاح
أصبر عليه شــوي ويطير طيره

ترى الليالي فيهن أتراح و أفـراح
كم من عسيرة جا بعدها يسيره

محمد سعد بن بصيص

ياصباح الخير ياطلة الصبح السعيد
جل شان اللي مصورك عما يا صفون

انت نبذة معشر الانس والشي الفريـــد
ليـــش مدري بس لله في خلقه شؤون

ياصبابة ذوق الالباب واصغاي النشيـد
يالقبال السمح يالخاطر الرحب الميون

يا ملذة روعة الانس في العيش الرغيد
يا رحابة شارد الفكر في شجن الشجون

يا بريق ربما أقـــول بالماس الفريــــــد
بــل يا سحر يدفع العقل لـ حـد الجنون

ياذهب قارون ياملك هارون الرشيــــد
من لقــاه اغناه والسابقون السابقون

تدري انك ضفت للعولمه بحث(ن)جديد
علم هــــديف الانــــامط وقراء العيون

انت تبغى زبدة العلم والشي الاكيــــــد
انت في كون(ن)لحاله وخلق الله بكون

كان كل اللي فعلته من اجلك مايفيــــد
والا انا لله وانا اليه راجعون


سعد بن جدلان

ماعاد لي في الشعر عشق ومطاليب
ولاهمني منه الوصل والتجافي

لاشفت احفادي صفت لي مشاريب
وصغيرهم يركض على القلب حافي

وتكفيني اللي قطّعتني الاصاعيب
واستحملت همي ورضيت كفافي

يالله يالمطلوب ياعالم الغيب
تقبل صلاتي لك وتقبل طوافي

وتصون عرضي ياملاذي عن العيب
وتجعل بقايا العمر ستر وعوافي



الأمير بدر بن عبدالمحسن

‏تساؤلات خالد الفيصل لأخيه عبد الله الفيصل

ياقديم الغوص في بحر الهوى
وش لقيت بغبة البحر الغزير.. ؟

علم اللي جس شطه واهتوى
ما بعد جرب طويله .. والقصير!

قالوا انه من جميع أمر حوى
فيه سر وفيه شر وفيه خير

وش جمع حلوه على مره سوا
هي حلاة الحب في الكاس المرير؟

‏اضحك مع الدنيا وعدّل مزاجك
وش فايده تزعل وتجرح مشاعرك

خلك عزيز النفس طلقٍ حجاجك
مافات فات وخل همك بحاظرك

والصبر خله منهجك هو علاجك
والله على ماجاك من هم ياجرك

‏تمنعني الشيمه وبعض المشاريه
‏واصبر لون الصبر مرن مذاقه
‏
‏لو كل من يخطي علينا نجازيه
‏ضعنا بعجات الغضب والحماقه
‏
‏لكن مدام الوضع يمشي نمشيه
‏من شأن مانقطع حبال العلاقه
‏
‏

كبرنا وشبنا واصبح الحال غيرالحال
شهود الزمن فينا وحنا نزكّيها

تشيب العقول ولاتزال القلوب اطفال
تحب الفرح واقل حاجه تبكّيها

أنا لاتذكرت الذي فات دمعي سال
وش الفايده من قصتي لو نحكّيها؟

حصل ماحصل واللي حصل ماخطر ع البال
ولاينفع النفس العليله تشكّيها