اخترنا لكم شعر نبطي وفصيح

حنا على الدنيا ودايع وأمانات
‏والموت يأخذ كل يوم ً وداعه

‏نحسب حساب أرباحنا في التحيات
‏وليا خسرنا ما نصلي جماعه

‏نجمع وسخ دنيا ونجمع عقارات
‏ونخسر بنفس الوقت كنز القناعه

‏ونبني مع كل الاوادم علاقات
‏وحنا مع رب الاوادم قطاعه

.....

̶‏
مواقف الناس تكشف لك معادنها
‏والجود بيّن ما يحتاج اتّكلف به

‏احدٍ يمد الجزيله ما نشد عنها
‏واحدٍ لو يمد لك فنجال ̶سولف به

.....

لا حضورك علاج ولا غيابك مرض
عيش عمرك لنفسك وترك الاخرين

لا تحب الحياه اكثـــر من المفترض
ولا تخاف الفـــــــراق وكلنا راحلين

.....

على حلم عمري جاري البحث والتنقيب
‏يا خوفي يروح العمر في طرد الاماني

‏انا والليالي نشبه الراعي مْع الذيب
‏مغير يتحرّص كل واحد من الثاني

‏ما اعرف اتشكّى للبشر والشكاوي عيب
‏تعودت اشيل احزان الايام وحداني

‏ظروف الليالي جمرةٍ فوق كسرة طيب
‏لا زادت لهبها بان فرقي عن اقراني

.....

‏ما كنت أقصر فيك من كثر الإعجاب
‏يومك تساوي عندي الكون كله

‏كنت القريب وكلهم كانوا أغراب
‏حتى القمر لا غاب شفتك محلّه

‏خلاص لا ترجع ترا خاطري طاب
‏الخاطر اللي كنت عايش بظله

‏رح واعتبرني واحد أذنب وتاب
‏ماني بثوب تلبسه ثم تملّه

‏ما يجتمع بالحب صادق وكذاب
‏رزقي على الله وأنت رزقك على الله

.....

ما بين برد الحـــنين وبين بــرد الـ وله
أحاول ادفاء ولا لي غير وصلك دفاء

يا آخر احلامي اللي ما قدرت اوصله
القاه قـــدام عيني واقترب واختفاء

.....

بعض البشر لو تلبس الثوب مشقوق
معروف معدنها وغالي حسبها

وأهل الردى لو تملك المال والنوق
مكروه مجلسها ومطلب نسبها

.....

يا الله يا قادر على بعث الاموات
يا جاعلن بين الأوادم تفاوت

غير التفاوت بالهياكل والاصوات
ارزاقهم وعقولهم ما تساوت

.....

من جاهد الدنيا على قل تفكير
ما يستفيد الاّ التعب والكلايف

خلك صبور ويرزقك رازق الطير
وما فات لا تكثر عليه الحسايف

.....

هـواجس الـنفس فـي تـدبير بـاريها
وسـلطة الـكون فـي حكمه وتدبيره

الانـس والـجن تـسجد لـه نـواصيها
والـفلك تسري على ما شاء تسييره

سـبحان مـن يـعلم الـحاله وما فيها
واهـنـى بـذكـره وتـهـليله وتـكـبيره

ويـعـلم اخـلاج مـهما كـنت اواريـها
ونـهـدة الــروح مـا يـعلم بـها غـيره

لو ضاقت انفاس واستدت مجاريها
كان اكسجين الهدى للضيق تبخيره

واسـايـر اوضــاع شـومتها وحـاليها
ومـن سـطور الـملازم خـير تصبيره

تـجري السفينه وكف العون يجريها
وتـرسي اقدارها في شاطي الخيره

.....