اخترنا لكم شعر نبطي وفصيح

‏يهب الجوى والبرد معزوفة التحنان
‏وليال الشتا يستنطق الشوق هاجسها

‏ويفز الحنين مْن آخر الصمت والفقدان
‏وتهيج الجروح اللي عن الشعر حابسها

‏يا غيّاث روحي والسهر ديرة الخذلان
‏وانا حادي احزان السهارى وحارسها

‏فقدتك وفقدانك على وجه عمري بان
‏وانا اخترتك بمعشب سنيني ويابسها

‏عيون ٍ روَت وجهك عمر ما ملاها انسان
‏يغني لها الملح وترفرف نوارسها

‏يا كثرك بذاكرتي .. تمر وتسيل اشجان
‏وتفاصيلك بْكل الوجيه آتلمسها

‏يا كل السنين وضحكتي واوّل الكتمان
‏سقى الله عيون ٍ حيّرتني نواعسها

‏تمر الحياه وليت الاقدار بالامكان
‏واعَرْف الليالي وش تخفّي بواهسها

‏يا كيف اتجاوز ما مضى واقدر النسيان
‏ولك ضحكة ٍ في تربة البال غارسها

صالح الهويملي

‏اخذي من الليل ما يكحل عيون النهار
‏وخلي عيون القصيد اكحل لك أهدابها

‏الركب وقف وسيّرته بشعري وسار
‏وراحت مطاياه ووسومي على أرقابها

‏لقيت معهن رساله من لبيد لنوار
‏ونوار مدري وش أخطاها ووش صابها

‏الشعر يمكن قدر لكن ماهو بـ اختيار
‏حاله تصيب البشر مدري وش أسبابها

‏قالوا يدور الزمن وابطا الزمن ماستدار
‏والضحكة اللي خذاها الوقت ماجابها

‏لي حول عامين ماسقت القدم في مطار
‏وإن سقت الاقدام ترجع بي على بابها

‏وإن رحت مع ذود أبوي اتبع هوى أم الحوار
‏عنيت رجلي بممشاها لمرقابها

‏وإن سولفوا بالبياض وسولفوا بالسمار
‏شعرت بالذنب كني جالس اغتابها

‏لبستها عن عيون الناس ثوب الوقار
‏وعن ألسن الناس صادقها وكذابها

‏اسرى بها الخوف من قلب عليها يغار
‏وطارت مع الحزن ماطارت مع أسرابها

‏تخندقت مالها راي ولاتملك قرار
‏محتاج لي ريح لأجل أفرّق أحزابها

‏طلّاب وصل وغديت تقول طلاب ثار
‏يا اقرابها من كتبها لجل يقرابها

‏الشوق مايذبح ، اللي يذبح الانتظار
‏ياغيابها مالك أخر ليه ياغيابها؟

‏وش فيني أحبّها وأنسى لا أحب الديار!
‏وأنا أدري إن الديار أوفى من أصحابها

‏يمكن يجف القلم ولايفوت القطار
‏لكن الأحباب ماتسلى عن أحبابها

‏ماني بمحتاج أسف منها ورد اعتبار
‏كانت لي أم القصيد وكنت عرابها

‏الشام للحين مازالت تذكر نزار
‏وبغداد تذكر رصافيها وسيابها

‏لو لخصوني وجابوا سيرتي بـ اختصار
‏متأكد إن سطري أحمل سطر بكتابها

‏ بندر الدويش

الطيّب اليا نصوه الطيبين
‏في لازمٍ صعب نومس لابته

‏امّا ضرب صدره بيده اليمين
‏والا لمس خشمه بسبابته

حزمي بن سعد

احاول اكتم شعوري معك وخفي بكاي
‏ ويبحث خفاي التعب بعيونك الدامعة

‏زهدت في مغريات العمر حاضر وجاي
‏ماني بغير الرضى وبصحّتك ،طامعة

‏عشانك اترك جميع احلام عمري وراي
‏وش عاد لو هو زواج وراحة وجامعة

‏نوران

كفكف الصبح ليل امس وتبّجح شروقه
‏المشاعر ترحّب .. والجروح تْمايل

‏سيدّة شعري العَذب وصفاه وعذوقه
‏ذي سنه " لا سلام ولا كلام ورسايل "

‏والفراق ومصيره كنت اغيّر طروقه
‏جاهداً ساعي بـ شتّى الطرق والوسايل

‏من يلوم المُحبّ إن بلّلّ الدمع موقه
‏مثل ما بلّت القيعان دهم المخايل

‏ياجميله وانا شاعر .. لا لاحت بروقه
‏فيك هلّ الجميل .. وفيك كلّه جمايل

‏بادليه الشعور .. وخيّطي له فتوقه
‏وظللي حر شوقه عن لهيب القوايل

عمر الهيت

تجيني ضحكتك مثل البشاير في عيون الضيق
‏وأنام وفي عيوني ضحكتك.. والقلب في راحة

‏بخوض من الحروب وبنتصر وأظمأ وأبلّ الريق
‏من اللي يخسر بحرب الحياة ووجهك سلاحه
‏
فارس فايح

خلِّني قبل ألمح اِسمك، وأتعدَّى
‏مثل من يلمح ورا جِيْدك سرَابه

‏طالبك لا شحَّ وَقتي.. لا تردَّى
‏لا تعلَّقني على طارف سحابة

‏قل وش يردّ الجِبل وأنت المعدَّى
‏والقصِيْد، وصفحته، وأوَّل عذابه

‏كلّ ما في نجد يا الوجه المبدَّى
‏آخذٍ من عينك النجلاء رَحابة

محمد السلطان

اتهرب من وجع راسي قبل لا اكل حبوبي
‏ليت دكتوري بعد مادوّن الوصفه شطبها

الوجع في روحي الوجله عسى مااشق ثوبي
‏من يجي بيني وبين الروح ويخفف تعبها

محفية باطن قدم رجلي على حامي دروبي
‏ماني من اللي تشكّى الدرب من عالي كعبها

ايه ياطيبي مع اغلى الناس واحياناً ياعوبي
‏ المزاجية تحدّ الذربة تقلل ادبها

ميّ اللافي

استبشرت أرض الرياض بسحابه
هلّت علي ويدي تصافح مطرها

قلت: انتي من الخير جيتِ استجابه
للدعوه اللي فيك ربّي ومرها

قالت: أنا جيت لحياتك رحابه
لوّ الحزينة صعبه اجلي كدرها

سبحان من خلّا السحابه ربابه
ياصوتها اللي خذ من الحزن وأرها

كنّ المطر بيني وبينه تشابه
لا هلِّت دموعي يهل ف نهرها

صحيح مابيني وبينه قرابه
لكنّ بنت الغيم هذا قدرها

.....

‏له نقضّت ليل مْتموج ولمّاع
‏بنتٍ على دبك السحايب تهزع

‏لا استبشرو في جيّته كل مرباع
‏خطرٍ من الفرحة عروقي تمزّع

‏لا صار له في يسر الايام مرجاع
‏مانيب من عسر الليال اتجزّع

‏وسعادتي لا اقبل عقب ربّع القاع
‏تفيض لو بالناس كلها توزّع

‏يبرى معه قلب من الوجد ملتاع
‏وتقرّ روحٍ في غيابه ، تنزّع

‏واسمي على لسانه ليا مر الاسماع
‏افزّ فزّة من سمع له مفزّع

نوران