اخترنا لكم شعر نبطي وفصيح

وبنحتفي به لو قليل ودوب دوبه رَش
‏وحنّا كم لنا كم نحتري وشعُورنا ظامي

‏مطر والليل من تحت المطر له مخلبٍ ينبش
‏تراب الذكريات ويبعث السّاكن من آلامي

‏اعيد بْه الزمان لساعة الفسحة وواحد طش
‏نعاس الحصة الأولى وريح الحبْر باقلامي

‏بحاجة حلم يزرع فالعمر لي جنّةٍ تدهش
‏بحاجة مزنةْ اتليها ظما لو تحفي اقدامي

‏بحاجة مجد من صخر الشقا في سيرتي ينقَش
‏اجيبه بالتّعب ما هو بمن رمية بلا رامي

‏حسافة ليت ما هدّيت لطيور الأماني عش
‏ولا حقّقت من أول حياتي أكبر احلامي

‏فراغ الحلم من بعد الفضا المليان به يوحش
‏وانا اللي كنت ما ادق الحديد الا وهو حامي

‏على الله يمكن القى في مدى الايّام ما ينعش
‏اعبّر به طريقي والشّباب سنين قدّامي

‏ما تدري بصدر الحزين اللي نزلته هش
‏علامك يا مطر دكّيت لي بشجونك عظامي

‏على روح المعنّى بالهداوة يا مطر طشطش
‏ترفّق وارو كبدٍ يابسة من مبطي صيامي

هاجر

كنت اسأل أمي يا يمه ويش يعني ممات
‏قبل لا اكبر واعرف انه رحيل العمر

‏قالت : ندسّك فالارض إلين تصبح نبات
‏ومن يومها صرت اخاف اكسر غصون الشجر

حمد المشيعلي

وش عليك إن طوّل البعد يالغصن المريف
‏السنين تخلّي الناس تترك شفّها

‏يوم تِفرحك السحابة ويجرحك الخريف
‏كل دمعة تعتذر لي عشان أكفّها

‏ولا أنا قد ضاع وقتي على الضلع المنيف
‏للهنوف اللي عباة القصيد تضفّها

‏جادلٍ لا شاقها البرق وأغراها الرفيف
‏السماء تقرأ عليها والأرض تزفّها
مشاري محمد

ياربّ ، وأنت الملاذ لوحدة المهتدي
‏يوم إن فؤادي وحيد أهدِهْ.. أنا مُتعبه

‏ خلّصني من الشعور اللي يهدّ جْهدي
‏و متعنّي بـ شي كل الناس تستغّربه

‏و ارزقني الحلم .. و الصبر وجميل سعدي
‏في راسي أحلام .. و الاحلام مترتّبه

‏تحتاج عفوك و انا اللي حسن ظنّي مدي
‏فيك أنت .. ولّا الاوادم ظنّهم ما اقربه
-
مي الّلافي

‏يحاوطك المطر من كل يمه ، وتهواك النود
‏وانا روحي عليك من الوله ولها مثل ماهي

‏وحيدٍ دون ضحكك لو بقى فالعالمين حشود
‏غلاك اللي تربّع في حشاي الآمر الناهي

‏رجاي من البشاير ما يسر الخاطر المعقود
‏وانا قلبي تحت رحمة هواك وطرفك الساهي

‏ياكثر اللي ذبحني يوم اعيّن ،، بابك المسدود
‏وانا مالي غناةٍ عن وجود المعدن الزاهي

‏لو يزعلك شي ارخصت لك عمري ، ويمكن زود
‏على شان العيون يحق اموت .. اموت متباهي

‏انا ش اللي مريحني لا جيت الا العيون السود
‏ولامع ثغرك ، وكلمه من شفاك ومن شفاهي

‏ومجدولٍ تصبّب ، فاح ريحان ومكاسر عود
‏عن البرد اختلي به وآغفى ويطول متواهي

‏مقر النور مركازة تراقي عنقك الممهود
‏بعد ما يلتهي منها النبيه .. تنبّه اللاهي

‏وانا ضاميك سُقيا زمزم الماء صافي القرهود
‏بعد قيضٍ خطف لون السنين بعذره الواهي

‏تواكبك الغصون بكل لفحه من شذاك تهود
‏تقول ان قدّها مع قدّك الميّاس متماهي

‏وش النجم البعيد و طمعته دام القمر موجود
‏قسم بالله ما حولك شبيه ولا لك مضاهي

‏احبك ، والله اني ما استحيت من الغلا والجود
‏ارددها وانا وجهي طويل ومحزمي راهي

فيصل السور

هذا زعيم العرب رمز العدل والصلاح 🇸🇦
‏فخر العروبة وقايدها وناموسها

‏على شداده ملوك الأرض تبغى السماح
‏ماعاد تقدر تجيب الراي من روسها

‏يامر بنزع السلاح وينزعون السلاح
‏ويامر بضبط النفوس وتضبط نفوسها

مشاري محمد

حفيد من بندقه ماتضرب الا الدماغ
‏عاد الجزيره يدق الشر نادوسها

‏اميرنا اللي له بيوت المدايح تصاغ
‏عرّاب لـ النهضه اللي ماقفل قوسها

‏يمشي خطى الواثق اللي مامشى من فراغ
‏كن العدا لامشا يمشي على روسها

عايض العاطفي

‏فيك تشخيص البصاير ولك مد الكفوف
‏يا كريمٍ يكرمون الأكارم من عطاه

‏عالم اللي ما اعلمه، شايف اللي ما نشوف
‏خافيٍ سره والأسرار ما هيب تخفاه

‏لا جفانا القل واللي روابعهم ضعوف
‏جعل ربي ما يرينا غضبه ولا جفاه

‏ولا انقفل بابٍ من الرزق حراسه وقوف
‏فِتّحت بيبان الأرزاق من كل اتجاه

سعد بن جدلان رحمه الله

‏ما كنتُ ممّن يمنحونَ قلوبهُم
‏فسرَقت قلبيّ عامِداً مُتعمّداً

‏لو خيّروهُ الآنَ أينَ مقامُهُ
‏لأختارَ صدرك دُونَ أن يتردّدا

.....

‏أَعُدُّ اللَيالي لَيلَةً بَعدَ لَيلَةٍ
وَقَد عِشتُ دَهرًا لا أَعُدُّ اللَيالِيا

وَأَخرُجُ مِن بَينِ البُيوتِ لَعَلَّني
أُحَدِّثُ عَنكِ النَفسَ بِاللَيلِ خالِيا

.....