اخترنا لكم شعر نبطي وفصيح

يا ربّ مالي عالمقادير اعتراض
سلّمت أمري للأمور القاضيه

يا كم خجلت ادعيك مابيدي وفاض
كيف املك الدنيا ويديني فاضيه

والله لو يعلو على وجهي امتعاض
إنّي على المكتوب كلّه راضيه

مها

‏نظرتي لنفسي يلخَّصها كلامي
‏عاذلي كوكب وانا كلِّ المجرّه

‏والمكان اللي ينزّل من مقامي
‏تنقطع رجلي ولا في يوم امرّه

.....

‏يا حـظ مـن يدعي له الناس بالخير
‏كاسب قلوب الناس من فعل طيبه
‏
‏فــي كـل قلـبٍ لــه معـزة وتقـدير
‏وطـاريه عــند الناس كـلن يـجيـبه

.....

‏بطون الايام مهما خيبت ظني
‏بتلف وتدور ماني ناشدٍ عنها

‏حتا لو انها خذتك وردتك عني
‏مردها تزين وارجع واخذك منها

.....

‏ياللي خذتك الظروف لسكة الراحلين
‏الدور عقبك خلي وانواره طافيه

‏ترا دموع المفارق والجفا والحنيين
‏ماتشبه الا مريض وفاقد العافيه

.....

يا خاطري لا تحسب الضيق ذبـاح
ضاقت خواطـر نـاس قبلك وراحت

إصبر وتلقى للفرج فيه مفتـاح
واصبر ولو كان السدود استباحت

.....

‏الطيب قصرٍ ما تجيه العذاريب
‏والتربيه هي سور قصره وساسه

‏من لا تربى في شبابه على الطيب
‏ماهو بـمتربي ليا شاب راسه

.....

‏احـلامنا راحت معا هبة الريح
‏وهمومنا تملا الفجـوج الفسيحه

‏نواسي المجروح وحنا مجاريح
‏وضحكاتنا تمثيل ماهي صحيحه

.....

‏للوقت ميله وللضيقات دمعه عين
‏وفيـ ذاكرتك اجمل اللحظات محفوره

‏وتظن قلبك تخطى اللي تحبه لين
‏في ذكريات السناب تشوف له صوره

.....

‏شجاع لكن ما تبرى من الخوف
‏راعـتني الدنيا بشتىَ الوسايل

‏اللي حياته كلها ظروف بـ ظروف
‏يخاف حتى من ظروف الرسايل

.....