اخترنا لكم شعر نبطي وفصيح

لا صار ساس البيت مبني على الطيب
كـثـرة عـواصيـف الـزمـن ما تـضـرّه

يبقـى بعين اهل الوفاء والمواجيب
قــدره كبـيـر ولا نـقــص ربــع ذرّه

.....

‏العدو احيان ما منّه مضرة
غير حقدٍ ينقله في وسط جوفه

البلاء في صاحبٍ كل ما تبره
يجحد المعروف ماكنه يشوفه

.....

‏يا صاحبي ما على الدنيا واهلها ضمان
وما كل واحد يحس بكل ما يوجعك

وقت الرخا الناس فعلاً كلبوهم اخوان
ووقت الشدايد اخوك اللي يوقف معك

.....

‏تـرا الـرجال انـوع بالـوجـه والجاه
والقرم والـقـاصـر ما فـيـهم تـشابـه

احـدن ليا صكـتك دنيـاك تنـصـاه
واحدن ليا شـان الزمن صـك بابـه

.....

‏ياللي تقول الجود عند العرب مات
الـجـود تحـمـيـه الوجيه الـشريـفـة

اسأل عليه اهل الشرف والمروءات
لا تسأل اصحاب النفوس الضعيفة

.....

‏من طاب معنا معاه افعالنا طابت
وان شـان شنا و هقواته عفسناها

وجيه نسآل عليها كـل ما غابت
ووجيه نسحب عليها ونتعداها

.....

‏يالله استرني بلطفك دام سترك ثوبي
واغفر لعبدٍ كساه الذنب واصفح عنه

ما لنفسي غير نورك في ضلال دروبي
والمُنى عفوّك وحسن الخاتمه و الجنّه

مذنب ولاجيت اقارن رحمتك بذنوبي
اذكر ان ذنبي عظيم وعفوّك اعظم منه

.....

‏لا تُلْحق الـدنيا كـثير التحـاسيف
لو يلحقك فـ الوقت منها خلافي

اضحك وقزرها مزوح وسواليف
وقلبك على كل المخاليق صافي

ايامنا ماهـي بـ دايم على الكيف
واعمـارنا ماهـي بـ دايـم عوافي

.....

‏نسعى على الدنيا كما البدو حوّال
ولا نـرتجي مـن غير ربـي شـفـاعـه

ولا غـابـت كـنـوز الدراهم والامـوال
يا الله فـي كـنـز الـرضـاء والقـنـاعـه

.....

‏صبرك على نفسك وصبرك على الناس
يعطيـــك عــن كثــر المشـاكل منـاعـه

لا تــأيد المخطـي ولا تحنـي الــراس
والصبر فـي بعـض المواقـف شجاعـه

.....