اخترنا لكم شعر نبطي وفصيح

‏يا باغي الرفعه ترى العز بالدين
لا عـز للانسان مـن غيـر دينـه

والمرجله عشق الرجال المديحين
ومـن كبها يا عنك تربت يمينه

سعود القت

‏أنا أشهد ان الصمت للعاقل علاج
والعذر منكـم كان طـوّل سـكـوتي

لا كثـروا أهل الهرج ماني بهـراج
ولانـي على بلـوى الخلايق شموتي

امـا كـلام ً مطلـعـه نـور وسـراج
ولا بلاشـي تسمـع النـاس صـوتـي

أعيـش لـي سيـرة ومبـدا ومنهـاج
مـن يـوم ميـلادي لـيـا يـوم مـوتي

ماجد المسعودي

ظروفنا كثرت وقلت خطانا
‏ولا عاد ندري وش جديد الجماعه
‏
‏يطيب جرح وجرح قام يحدانا
‏والناس تحسبنا نحب القطاعه

.....

بعض المشاكل حلها بالفراسة
‏لا شان وجه الوقت وامتس حبله

‏يضيع فيها فيلسوف الدراسة
‏ويحلها لك شايبٍ يتبع ابله

.....

الحظ ماهو حظ من يملك المال
‏الحظ حظ اللـي تمّسك بدينه

‏الخير في قلبه توّثق ولا زال
‏وبعد رضا الله مرضيٍ والدينه

.....

كسبت من دنيا العناء طولت البال
‏ما ارخيت راسي تحت موطى قدمها

‏لو حدني وقتي على هايف الجال
‏روحي على الدنيا طويلٍ نسمها

‏لا تبدي الحاجه على بعض الاشكال
‏الناس تال الوقت قلت شيمها

‏احذر من اللي ينقل القيل والقال
‏الحيه اللي سمها وسط فمها

.....

إن شانت الدنيا ترا العمر مقسوم
‏محدٍ حياته جت على ما يريده

‏دايم تفائل بالامل واترك اللوم
‏عش لحضتك واللي مضى لا تعيده

.....

‏الوقـت يمضي والليالي سريعه
مـرت سنيـن اعـمـارنا ما درينا

نطـرد ورى بكـره ونـرجي تبيعه
كـبرت حـدود احـلامنا والتهينا

حكم الزمن غصب ًعلينا نطيعه
يـوم ًلنا والـيـوم الآخـر عـلـيـنا

اللـي لـنـا نـشري عـليه ونبيعه
واللـي عـلـيـنـا ليتنا ماشريـنـا

.....

الصاحب الغالي نحنّه وندراه
‏عن شامتٍ يفرح لا شاف انزعاجه

‏نستر عذاريبه وندمح خطاياه
‏ولا نبيّن عثرته وانحراجه

‏نصون رفقة راعي العز والجاه
‏ونطيب له تقدير ماهو لحاجه

.....

والله لو نتبع من الناس زلات
‏لا غير نبقى بالمجالس وّحدنا

‏لكن نصد ونحتفظ بالعلاقات
‏ونبقى على الخوّه ونوفي وعدنا

‏وصدورنا مثل الفجوج الوسيعات
‏وعن الدروب الغانمه ما ابتعدنا

.....