اخترنا لكم شعر نبطي وفصيح

‏ترانا على سود الليالي وساع صدور
لو إنها ما خلت كل شي على حله

.....

‏مسامحك جعل كل اللي فعلته فداك
‏ضيعت فرصة عمر واخترت غلطة عمر

‏لا تحسبـني ليا مـن رحت بطـرد وراك
‏لا غابت الشمس ياتـي من وراهـا قمر

.....

سبحان مـن سـوّى ثناياك سبحان
سبحان من سوّى الخدود الجميله

خطـافـة الابـصار فـي كل الازمان
أُم الحِـسـن وأم العـيـون الكـحيله

تعجز في اوصافك قصايد وقيفان
اوصاف مثلك في البشر مستحيله

كـل القصايد والرسـايل والالـحان
في حق مـثـلك يَا فـلانـه قلـيله

.....

‏القلــوب آسرار والدنيـا عـبر
والعمر لو طال تاليه الرحيل

والخواطـر كسرها ماله جبر
لو يعيـد الوقت ماضيه الجميل

.....

‏الناس تفرق عن بعضها بالإحساس
فرق الكـــرم لا قارنو معه البخل

أحدن يحس وموقفه يرفع الراس
وأحدن يقول أبعد ترى مالي دخل

.....

طيبك غشاني والوفى في مباديك
واضح مثل بدر السماء في مداره

أكذب على نفسي إذا قلت ما أغليك
وأكذب عليك إن قلت مالك وقاره

لقيت فيك الطيب من غرس أهاليك
ولقيت في موقفك حس وأصاله

.....

يا مادحٍ نفسك بلا طيب وأفعال
عزالله أنك ما كسبت المديحه

الطيب يبغاله من الناس رجال
اللي فعوله بالمواقف صحيحه

اللي يَوَفّي في كلامه ليا قال
وفي مجلسه تلقى الوجيه الفليحه

سمح القبال ومنْطقه يشرح البال
شوفه ولا شوف الوجيه الشحيحه

.....

على رفيقك خفف ملاحظاتك
ما فيه من بين البشر كامل خصال

كن للخوي مثل الشجر في ثباتك
إن مالقى عندك ثمر حصل ظلال

.....

‏ليت الزمن وقف على ذيك الايام
‏يوم العباد قلوبهم مستريحه

‏لكنها قفّت مثل طيف الاحلام
‏ياجعل اهلها للجنان الفسيحه

.....

‏يا شينها لا صرت طيّب على طول
‏وتظهر رضا نفسك وتخفي زعلها

‏وقلوب بعض الناس تحتاج ديتول
‏يقتل جراثيم الحسَد ويغسلها

.....