اخترنا لكم شعر نبطي وفصيح

‏جيتــك اصبــح يامنــى الروح بالنور
وأقـول ياالغالي هـلا كيـــف حـالك

يالله عساك بخـير طيـــب ومسرور
ويالله عساني مانحـرم من وصالك

وعساك طول العمر بالخير مغمور
وعسى السعاده دايـم الدوم فالك

.....

‏ودعني ب السّلام ورحمة الله وبركاته
‏واذكرني كلّ ماتطري على البال التحيه

‏واتركني ل الحنان اللي شعوري معجزاته
‏اِتركني ب الجروح الابجديه يا ابجديّه

‏اِتركني عاشقٍ يكتب بدمعه ذكرياته
‏من شعورٍ صادق ماهيب نظره عاطفيه

.....

‏اشوفك وطن وتشوفني رحلة استجمام
‏واشوفك عمر وسنين ما هيب منعاده

‏معي قلب واحد لو تقسمه خمس اقسام
‏بحبك بكل اقسامه الخمس وزياده

.....

والله بخيالي ضحكتك واضحة زين
يا بنت والله الزين ما هو بخافي

ضحكت ثغر والا ابتسامة شفاتين
احلى ملامح شخص لا صرت غافي

ادري تزعلني وهجرك طواعين
ليه التغلي والزعل والتجافي

زارع عنادك مثل زرع البساتين
وانا ودادي لك على طول صافي

دايم جنون الحب مسكه رياحين
الا انت زدت وزود بالطيب ظافي

لو كنت صحراء حر محدن لك يبين
انا الوحيد اللي ابى امشيك حافي

امشيك من اقصاك لاادناك ذالحين
ممشى نمر لامن فريسته شافي

ابفترسك بناظري يااكمل الزين
وابا اتعشى فيك والضو طافي

ماابغى رموشي تبتعد عنك لو حين
خوفي يصير لي شي منك خرافي

خوفي يفز القلب واصير مسكين
شخصن ابليا روح والقلب مافي

روحي معك اهديتها قبل عامين
جتك الهدية من حبيبك عوافي

والحين قلبي مابه النبض لك لين
تنشد عن المجروح في علم لافي

ادري بشوفك يااريش العين بالعين
ادري الزعل مايرد شخصن يوافي

وادري علي تحن حن الشفاتين
هي للتلاقي بالكلام المصافي

ناطرك خلك ياحبيبي الى الحين
حتى الحياة اللي بدونك تعافي

خالد سعد الحربي

لا صرت غالي لا تغلى وانا اخوك
سيب التغلي عنك لا صرت غالي

روحي وقلبي يوم قفيَّت نادوك
يا بعد من يشغل ليا غاب بالي

فكر ومرة نادهم كان لبَّوك
والا عليهم صيح وبصوت عالي

انا الوحيد اللي مشالك على الشوك
وان صحت جيتك مندفع لو لحالي

ياصاح تكفى لا تعذرب على اخوك
جتني الهموم وكل همن طرالي

جتني الهموم وداخلي قلب مصكوك
مصكوك صكة بس يا ويل حالي

هذا خويك داخله هم مركوك
يخفيه عنَّك وانت مسرور خالي

خالد سعد الحربي

يا ليتني بينك وبين المضره
من غزة الشوك الى سكرة الموت

اوليت شاورني القدر بس مره
ولبى مطالب رغبتي قبل ماموت

او ليتي لجرة مواطيك جره
احمي قدم رجلك مثل جزمة البوت

او ليت بيديني السعد والمسره
واحكم عليها عنك مالحظة تفوت

يفداك عمر منك يشعر بعمره
انتي الحياة لنفسي وردة الصوت

سعود بن بندر

منهو حبيبك غايتي بس أهنيه
على حسن حظه عشانك حبيبه

أنا أشهد إن الله يحبه ومعطيه
اللي هداك الرب تصبح نصيبه

ياللي خذيت من الحلا كل ما فيه
ومن الطبع كل الخصال الحبيبه

تسحر بهمساتك عقل من تحاكيه
مع خف دم وملح ما ينحكي به

لك حق يوم تموق وتحس بالتيه
الله وهبك أوصاف زينٍ غريبه

قبلك و أنا بعض الجمال ألتفت فيه
وعقبك ظهر في كل من شفت عيبه

سعود بن بندر

مات حبك والبقية في حياتك
في حنايا خافقي لاقى مصيره

خذ مع الجثمان باقي ذكرياتك
تجربة حبي معك كانت مريرة

يا عدو الحب ركب الحب فاتك
لا تجيب ان طعنتني للحب سيرة

ما يعرف الحب من سوى سواتك
يجهل الاخلاص من ضيّع ضميره

حبك اللي تدعّي هو حب ذاتك
ومن يحب الذات ما يخلص لغيره

غرنّي يا صاحبي ظاهر صفاتك
غلطتي للأسف كانت كبيرة

سعود بن بندر

جيت المكان اللي بدأ حبنا فيه
وأمطرته عيوني بدمع الحنيني

وشكيت له قسوتك .. وإنكار ماضيه
يوم العهد .. وأيديك تحضن يديني

تعتب على معذور .. بس الزعل ليه
وأنا أعترفت بغلطتي لك بحيني

لو قلبك أحد قال حبيت ... قلت أيه
شف كيف حبك .. قادر يسود فيني

هذا الدليل .. الساطع اللي لك أبديه
إنك تحكم القلب ... حكمٍ متيني

إلى متى ناوي فؤادي تعنيه
تحرم عيوني منك .. ياشوف عيني

عمري بلا قربك ..وشوفتك مابيه
من دونك الدنيا .. ملل ياضنيني

سعود بن بندر

‏ما علي لا كبر ولا صغر سني
‏الوكاد إني كبيرٍ .. فالمبادي

‏ومايهم إن طاب ولا خاب ظني
‏الثقة أهم شيٍ فـ إعتقادي

‏الخطا يالاجودي ماهوب مني
‏وأعتذر لا صار مني لا إرادي

‏وإن نويت تصد عني صد عني
‏والله إن الوضع عادي وإنت عادي

.....