اخترنا لكم شعر نبطي وفصيح

‏علمي عينك .. ونظرتها العميقه
‏لا تموتني .. وانا مفتون واعزل

‏انتي احلى حلم شفته بالحقيقه
‏كيف اشوفك مقبله ولا اتغزل ؟

‏اجمل من الورد واطيب من رحيقه
‏واعظم من الشعر والشعار واجزل

‏للفجر والصبح وانسامه صديقه
‏وللهدوء اللي يضم الليل منزل

‏ودي اخذك لسماء الدنيا دقيقه
‏واخذ القمرا من يديها وننزل


جزاء الغيداني

‏غمضي عينك وراسك لا يفارق كتفي
‏من هنا حتى تهبهب نسمة الفجريه

‏يا فؤاد القلب ، يا روح الهوى ، يا نصفي
‏يا مشاعر فرحتي ، يا السيره العطريه

‏يا سبايب قوتي ، يا احلى سبايب ضعفي
‏يالمزوح الرااايقه.. بالساعة الجديه

‏يا البشاير ، يالسعد ، يالفزعه اللي تكفي
‏يا ذعاذيع البراد نهاية الصيفيه

‏يا علاج الراس لا جاه الصداع النصفي
‏يا انشراح الخاطر من الحااله النفسيه

‏يا بخور الصبح ، يا نور الصباح الملفي
‏يا مسايير الحبيب و قهوة العصريه

‏يا القصيد النخبوي من بدعي ومن وصفي
‏يا عيون كتابتي ، يالهاله الشعريه

‏في قدومك كل ما يزعج مزاجي يقفي
‏وكان قفيتي تعود الضيقه الوحشيه

‏اشتكي من دمع عيني واشتكي من نزفي
‏لا لبس يوم التعب .. عباته الليليه

‏تطول يدينه ويركز خنجره في حرفي
‏لين يقبض روحه بصوره شبه وحشيه

‏اسمعي صمت العذاب اللي يقوله عزفي
‏حسي بموت اللحن والنوته الحرفيه

‏دندنه حزن ومساها من عناها مطفي
‏تمشي خطاها على جرة خطى المرثيه

‏واعذريني لو تعدى حد صبري وصفي
‏وسامحيني لو اقول اللي اقوله.. فيه

‏معك راحه ترمي حمول المتاعب خلفي
‏اقربي عسى يدك تشفي جروح يديه

‏وقصي حبال الهجوس اللي تقرب حتفي
‏وعمّري ليل السهر بـ احلامك الورديه


جزاء الغيداني

‏يالله الغفران بالعشر التوالي
‏يا عظيمٍ نرتجي عفوه و خيره

‏ظلنا في يوم نحتاج الظلالي
‏يوم ظلّك مالنا مزبان غيره


مساعد الرشيدي رحمه الله

‏رجّال ما صلى صلواته الخمس
‏ماهوب حول المرجلة كل أبوها
‏
عبدالله حنيف الشيباني

كنت أسري التيه غافل و أستمر الهجير
حتى تمعنت قول الله ألم ترى

كم همت وادي وحثيت القوافي مسير
لين أذنت روحي بتويقت أم القرى

يا رب بين الذنوب و بين صوت الضمير
عبدٍ فرش عتمة الثلث الأخير و سرى

تجري به الروح مايدري لوين المصير
يخاف بكرة يموت ، وما يناظر ورا

آمنت وأنت الغني وأذعنت وأنا الفقير
ياكثر مابعت للشيطان ذنب و شرى

ألبس من الدمع ملبوس الندم واستجير
وأنت أهل للمغفرة تعلم يارب وترى

عبدك ولد عبد ابن آمتك و أنت الكبير
اللي تعبده ملوك وترتجيه أُمرى


شاهر اللغبة

‏ياربّ وأشواقي لشوفتك تكبر
‏ياربّ وعيوني لجنّتْك ولهى

‏آنا عجزت القى فدنياي معبر
‏والناس مدري كيف ابرضي زعلها

‏ليلٍ يلم الحلم ويكبّه اغبر
‏وبنتٍ ترجى الصبح يشرق بأملها

‏وش تنفع الرجوى اذا الحظّ مدبر
‏وقلوب خلق الله تضيق بأهلها

‏لي روح من عمق المعاناة تصبر
‏ولأحلام عمري روح مكتوب أجلها

.....

طلبتك وانت غفّار الخطايا رازق النشّاد
تفيض برحمتك عاللي هلَك من كثرت ذنوبه

انا ياربّ احبك حبّ مايطري على العبّاد
واخافك خوف لو وزّع على اهل الأرض ماتوا به

.....

ملاذي من مقادير الحياة وداري وملجاي
أمامك يُكشف ستاري واقول لدمعتي هلّي

على بابك وقفت ادعيك طالبتك تجيب دْعاي
إليك المشتكى ياربّ في ترحالي وحلّي

اعرفك فاتحٍ بيبان عفوك ما تردّ الجاي
وجيتك راجيه عفوك، اذا ما جيت لك من لي

......

‏أتودَّد ضحكتك وأعشق قليلك
‏وأرتمي في رمش عينك وأتقيَّد

‏من صباحك وش خذى طرَّاف ليلك
‏أنت لو سادَ الزعل فيك، متسيَّد

‏يا حبيبي قبل لا تَطْلِق جديلك
‏واحدٍ ما شاف وَجهك لا يعيَّد!

محمد السلطان

‏منزالك الأهداب.. يا ناسع الجِيد
‏إليَا تجوَّد كلّ خلٍّ — فـ خلَّه!

‏أساوَم عيونك، وأداريك، وأزيد
‏أمانتك سيف الزعل، لا تسلَّه..

‏مهما تثنَّت في هوَاك العناقيْد
‏أنا أعْرِفك، وأعْرِف هوَاك، ومحلَّه

‏وشلون أساوِي ضحكتك فأوَّل العيد؟
‏وضحكتك أرقّ من أوَّل العيد كلَّه!

محمد السلطان