اخترنا لكم شعر نبطي وفصيح

‏افك الستاير و انتظر من ورا الشباك
‏متى الليل يجبر خاطري واكسر سهاده

‏أنا أحق بـ أنسام الهوى من غصون الراك
‏لو أني ما اميل أن هبت النود بزيادة

‏معي بعد هذاك الغياب الطويل ادراك
‏ادراك اللي يدري بـ الخطا كل ماعاده

‏حبيبي من الـ لبيه لا يا عساه فداك
‏ماعندي لك الا قلبٍ بما نبض جاده

‏يناديني النسيان ، و اسمعّه ذكراك
‏على صوت فيروز وعلى القهوة السادة

‏يازين الحظوظ اللي رمتني على مرماك
‏عنودٍ تقود الصيد و اليوم منصاده

‏لا تستغرب اللهفه على ضحكتك و رضاك
‏رضاك السحاب و ضحكتك صوت رعاده

‏تماديت في قلبٍ جبره الحنين و جاك
‏و معجبني انه فيك " مسلوب الإرادة "

‏تمادى علي أكثر ، مادام الغلا ولاّك
‏لك القلب مرتاح و لك الروح منقادة

‏أحبك ، قبل لا أختار في وصلك و فرقاك
‏ولا فيه احد يختار موته و ميلاده

‏وش العيد و ايام الغلا و المطر لولاك ؟
‏يا فرحة ملذات العمر و أجمل أعياده

‏انا لو دريت اني بحبك قبل لا القاك
‏ماعشت آتمنى حظ ليلى و ولادة

‏ولو اني عرفت أسمك قبل طلة محياك
‏نقشت اول حروفه على عنقي قلادة

العنود الواصلية

‏قِدْ ضاع في غبْ الوساع المساويد
‏قلبٍ عجز ياصل لـ يابس ضفافك

‏من عقْب ماهو يقطع البيد .. والبيد
‏جفافها ماكنّه الّا جفافك

‏والله لو انّ الراحه فْـ راحة الايد
‏ماشفتني قدامك ، ولا خلافك

‏لكن وش اسوّي بقلبٍ مقيريد
‏يغليك ، وانت لـ دمّ الاجواد سافك

‏متعلّقٍ بين النحر ، واتلع الجيد
‏ولا طرا في باله انّه يعافك

‏تزعل ، وتنضب لا زعلت المواريد
‏على حبيبٍ يرتجيك ، ويخافك

‏وعلى رضى قلبك تفزّ الجراهيد
‏وان لاح برّاق الحيا من رهافك

‏يميل عودك ، واتّدلّى عناقيد
‏ثمرْك .. وآحنّ لـ مواسم قطافك

‏ لا صدفةٍ جابتْك .. ولا مواعيد
‏يبدو لي ان هذا هو آخر مطافك

‏يا سِعد عينٍ تلمحك في ضحى العيد
‏ترفل بنفنوفٍ توشّى عفافك

‏يا موقّف الدنيا ، واهلها على حيد
‏مافيه احد قدْ مرّ جنبك ، وطافك

‏محسود من شافك من بعيد لـ بعيد
‏وشلون عاد اللي من قريب شافك !

فهد العيبان

بين طيّات الوجيه الضاحكه والمسفهلّه
ما عرفت أكتم هواي، ولا عرفت أخفي مرادي

مرحبا، ما مالت غصون الشجر وأشتاق ظلّه
للحميميّه تحته، وللقصيد، وللتهادي

بـ القبال اللي تعجز الناس عن خالي محلّه
والحضور اللي بَعدْه حضور خلق الله عادي

تشتهيك الأرض، وغيوم السماء، والكون كلّه
والذهول في وجهٍ أبطى يشتهي طلّتك هادي

في مراتع -معشر الشعّار- ما دوّرت حلّه
قبْل أهيم في لِبّتك وأضيع ما دوّرت وادي

ما على وجه البسيطه بنتٍ تضاهيك لِلّه
قولي لـ من يبغى مثيلك: لا حياة لمن تنادي

جيتي أشهى من كلامٍ ساقه الطاري لـ حلّه
وأشهى من "لبيّه" لامن جاوبت صوت المنادي

تعرف عيونك رهيف الحب فـ الصدر وتدّله
لين بعدك صرت أشوف الغيد باللون الرمادي

أقبلي والريح تجمع شعرك شوي وتفلّه
كم عطى ربي يدين الريح من حظ الأيادي

منتظر مثل الكريم اللي ما ردّه يوم قِلّه
لا معي قلبٍ يبور، ولا معي صبر المهادي

لا انسدل فستانك اللي يعقد الحبل ويحلّه
فوق لينٍ يشتهيه العطر مانيب متحادي

أقبلي والعيد عيدك والشِّعر دقّه وجلّه
معك صار العيد غير وفيك توّ العيد بادي

ماجد النفيعي

ضحكتك طفلةٍ تلعب بقلب مهيوب
شبت الجمرتتين وهبت أنفاسها

من ظمأ روحي الوجلا شربت الهبوب
والسراب يحدى الغيمة ونسناسها

أشعب الركب شرق وكل هقوة جنوب
من متى خطوتي ما تتبع إحساسها

و أنتِ يالحسنة اللي بين كل الذنوب
كَلْ حلاج نفسي وأبو نواسها

آتصوف بعيد من الخطايا و أتوب
و آتزندق و أعصر الخِمرة بكاسها

بين جادل ثليل وبين راح مخضوب
هزت الليل عنوة وظفرت راسها

حولت حافية ترقص ما بين القلوب
بنت تقرأ حواميمي ووسواسها

يعتدل كل مايل عند خصر معصوب
وين ما لاعب الذعذاع مياسها

كلما لاح برق من الثنايا جذوب
رحت أراجع يقين النفس و إياسها

أنتشيت آتقهواها منايا و أذوب
ذوبة الحبر والمعنى بقرطاسها

ياحبيبة مجازاتي شروق وغروب
بانوا البدو والديرة بكت ناسها

عمري اللي مضى قبلك ماهو بمحسوب
لو تشد السنين بروح عسّاسها

إيه أحبك لو آحبك نداها طنوب
كلمةٍ ضيعتني داخل أقواسها

ليتني كل ما مريت ذيك الدروب
ما أتتقى عن أسوارك وحرَّاسها

شاهر اللغبة

الطموح الأولي مايعرف استسلامي
لا أزال اخطي خُطاي وهامتي مرفوعه

تشهد دروب المشقّة سعيي ودرهامي
-كلّ خطوة سيّرتني للحلم مدفوعه-

كلّما اكبر سنَه تكبر معاي احلامي
حالها حال الفجر ما قد حجبت طلوعه

وانت ياشخصٍ معاه الحلم يصبح سامي
من غلاك الجمّ صاير لإفتقادك لوعه

فيني من الشوق ما يملا فراغ أيامي
تفضح المشتاق لك تنهيدةٍ مسموعه

آتوجّد كلّما لاح السراب لظامي
ياوجودي لا استطبت الحاجه الممنوعه

عن جنون العاطفه صار العقل متعامي
وقلبي اللي بين ضلعيني خرَج عن طوعه

الحبيب اللي يضحّي في سبيل هيامي
كم على باب الرجاوي احتريت رجوعه

آتحلوى كلّ هاجس يجلبه قدّامي
وآتفدّا ضحكته لي وآتفدّا دموعه

يدري اني اكتبه وانه سبب فإلهامي
وادري انه حافظٍ حبّي مابين ضلوعه

.....

دارنا دار والعوجا لنا ملّة
والبيارق ترفرف فالسماء العالي

حن هل السيف وأهل الكيف والدلّة
وحن هل الدين من أول ومن تالي

ذا وطننا وحنا ظلنا ظلّه
دون حدّه نحارب كل عَيّالي

ما نعرف التخاذل لا ولا الذلّة
لا دعانا غدينا عيال رجّالي

محمد العجلان

‏إليا احتمت مابين دم وذخيرة
على يدين صقورها طارت أرقاب

اخذ الكلام وجاك منّي قصيرِه
من يستفزّ رجالها ياكل تراب

‏‌ عاتقة

‏يا مشرّف بي على روس الطوايل
‏العتب كفّى ودمع العين وفّى

‏لاحدٍ منّا على الشّوق يتحايل
‏الغلا لا بان ماعاد يتخفّى

‏كان ماتشفى من الوصل الغلايل
‏لا تساقيني من المُوت المصفّى

‏راثعٍ باللي ورى العوج النّحايل
‏وإن تواجهنا ترحّب وتتحفّى

‏من سعى لرضاك في شتّى الوسايل
‏كفّن آماله على بابك وقفّى

‏ما أنت مثلك فالقديم من الرِّسايل
‏فيك واحد حيّ والثاني توفّى

عبدالعزيز العبلان

‏تزعجني افكاري وانا "عبد الحليم"
‏واضدها بـ امر المعين المعتني

‏واتحمل الخافي وانا "عبد العليم"
‏لو انه ارهق روحي وعل بدني

‏ولو تقسي الايام انا "عبد العظيم"
‏اعظم شؤوني للمشيئه تنثني

‏ولو يمتحني جانب "الفقر" اللئيم!
‏ما والله اخافه وانا "عبد الغني"

‏اضرب مخاوف بكره بخوف القديم
‏بني الهدام أخير من هدم البني

جزاء الغيداني

‏ما دام إن العمر فاني.. وكل الليالي قصار
‏تعال أقطف زهر عمري ترى ما حول قلبي سور
‏
‏تشوف إن الطريق أطول وأشوف إن الأماني كثار
‏ولا تكفيني الدنيا لو أشرب من هواك بحور

‏وأشوف إن ضحكتك غيثٍ حيَت عقبه صحاري قفار
‏مثل ما الأرض ممطورة ثرى صدري غدا ممطور

‏يطول الدرب أو يقصر معك لين آخر المشوار
‏عيونك قبلة أحلامي ووجهك فالطريق النور

.....