اخترنا لكم شعر نبطي وفصيح

حادي الصمت ما عندي لصمتي بديل
وأنت ليله تغافلها الجفا مادرت

وين أوديك ياهمٍ بقلبي ثقيل
جعل تسري بك الليله ليا من سرت

أيه خايف على دمعة عيوني تسيل
ماوقدرت أتجاهلها وهي ما أقدرت

كانت أصعب على نفسي من المستحيل
لين سالت على شان الغلا وأعبرت

عزتي تطلب الفرقا بيوم الرحيل
لو جروحي على طول العمر مابرت

جيت عابر سبيل ورحت عابر سبيل
والمحبه ربت في داخلي وأكبرت

أنت ياللي ليا مالت جروحك تميل
الليالي خذت مني وماقصرّت

لا تسولف ترا ليل المفارق طويل
كل كلمه على بالك فبالي طرت

شوف عيني وتلقى للمحبه دليل
مير نفسي لتقليب المواجع ضرت

طوّل الصمت وأربكت الشعور الجميل
قلت أببعد مدام أن الجروح أكثرت

خل دمعك يسولف للموادع ويسيل
ولا أنا دمعتي طاحت وهي مادرت

.....

‏ما للنشايب غير فكاك الأنشاب
‏برقع قرانيسك ونوّخ ركايبـك
‏
‏حول عن الطاره وخلك على الباب
‏جا راعي المركاض يا راعي الدبك
‏
‏أنا صريح وذا بلا أبوك يا عقاب
‏ناسبك وضعي عاد وإلا ما ناسبك
‏
‏جاين تبي تطلق بـ وقفتك الأرقاب
‏ووقفتك ما تطلق طليّين من شبك

‏عبدالرحمن بن جزا

يا ليلٍ تقلط في عيوني سهر وإسهاد
متى أشوفك تقلط سكون وطمأنينه

الإنسان مهما كان روتينه المعتاد
يكدر عليه أحيان تكرار روتينه

وداع النهار موادع اللي خرج لإجهاد
لا طاح الشفق طيحة عباير محبينه

شعوري وأنا أرفع للفجر صرخة إستنجاد
شعور الصويب اللي فقد نجدة يمينه

هنيي لو أني طير يجوب كل بلاد
تقطع بها أفاق الخضيرا جناحينه

حنين المحب يعيشه طرقة الكداد
لا سافر ترده لهفة الشوق من يحينه

هذا قلبي المنقاد يالعارض المنقاد
لو أنه يعريك فرق حجمه وتكوينه

أمرك وأنا مستبعد فكرة المعواد
ويغلب علي وجه الشبه بينك وبينه

ياغاية مراد اللي يشوفك أحق مراد
والأحق في بسمة شفاته وماء عينه

ملكني غرامك لين صرت أملك إستعداد
أناصر ضحايا الحب، وأفهم مجانينه

أدور لجرحك من يدين الطبيب ضماد
وأثر مايضمد جرحك الا سكاكينه

أنا قبل أعرفك كان قلبي عيوف وصاد
وبعدك ماصرت أعرف غير الله يعينه

لكن الله اللي مكنك والله اللي راد
تخلينه يحب الحياه .. وتخلينه

.....

ما يضاهي عزّة النفس في الدنيا غناه
‏عن دروب الذل ياخطوة العز انتحي
‏
‏الردي لو يشري المدح ما يخفى رداه
‏ندري أن ماكل من خاف ربّه ملتحي
‏
‏مشكلتنا كـل مـخـطي نبـرر له خطاه
‏نستحي في وقت فيه العرب ما تستحي

.....

تسامي وروحي مالنا ف المحبه دار
ولو قلبك من الحب واضح على عينك

لا تبدين بارسالة محبه وطيش صغار
تشوفين نفسك واثقه بااول سنينك

حذفتي علي من الغلا طير صيد وطار
ولاشاقني بالزين ثغرك وخدينك

تحسبيني اسهل من يراضى بدون اعذار
لا يذبحك تفكيرك عساء ربي يعينك

انا ماني ضعيف يجيب الردى والعار
على شان سود عيونك ومسكت يدينك

وانا ماني من اللي يهتكون عرض الجار
ولاهمني منطوق هرجك ولا زينك

تسامي وصدي خطوتك عن طريق المار
ترا الدرب هذا بالهوى يمكن يهينك

.....

لي أيام سارح مايشد إنتباهي شيء
يمر الكلام المختلف كنه العادي

تحاصرني الدنيا وأموري مثل ماهي
الإزعاج يملي مجرياتي وأنا هادي

أحس أني أملك كل حاجه مافيّ يْدي
وأحس أني الخسران من كثرة عنادي

وأحس بشعورٍ مضطرب بين شمس وفي
مع اللي مغربني وأنا أعيش فـ بلادي

يجوز أني أفنى من شعور الوجع والكي
لو أني ما أغني .. كل ماطاب مقعادي

أنا زهمت الشعر مره .. وقال شوي
متى ماتواعدنا يجي حسب ميعادي

حبيبي لا زال يمرني لـ إنعكاسك ضي
مثل مايمر الحسد فـ قلوب حسادي

متى مانتشر ريح المطر في زوايا الحي
يعم السكوت .. ويرتفع صوتك ينادي

متى تخاف ينسى ويتمادى بدرب الغي
يشوفك متى ماشاف نور القمر بادي

مع الشعر لك ميعاد مادام راسي حي
وأنا كل يوم أهيم لي في طرف وادي

.....

طويتك حافظة الصفحه ممله والسنين كتاب
كتاب العمر عنوانه نغيب أن ضاقت البقعه

فمان اللي كتب بعد هذا العمر نصير أغراب
ولا به شيء يعطيني على وصلك أبد دفعه

فمان الشوق والذكرى وأماني لمة الأحباب
فمان الله وخذ حبك ما عاد الصدر يتسعه

.....

‏تبرّيت من صوتي بعد ماعلي قسّاك
‏ووقفت لا ذاكر دروبي ولا ناسي

‏أعرف أتكلم لين أجي لزعلك ورضاك
‏أشوف الكلام أصغر بواجد من أحساسي

‏وأنا والله أن البسمه اللي تمر شفاك
‏ أدوّر عليها كنّي أدوّر أنفاسي

.....

لا توصيني على اللي فات يالعمر المولّي
السنين تدور، والأحداث ماهي مستمره

أتداعى .. لا هدأ روعي ولا عيّنت خلي
وأفهق شماغي، وأجرّ الصوت، وأفك الأزره

ماتنسيني وجيه العابرين الغايب اللي
باقيٍ في عيني طيوفه وفي قلبي مقره

وش عليه أن غره المحبوب وأغراه التغلي
ذاخرٍ له من سنيني عقد، ومن الأرض دره

لي على الأطلال وقفة خاطر ولحظة تجلي
وشرهةٍ كم ضيعتّها الفاتنه، في كل مره

أتطوى بين طيّات الغلا، وأضيع كلي
وأتجرع سكرة العشاق، لين أموت حرَّه

للجديل اللي يحجب الشمس، ترحالي وحلي
سرمديٍ كل مافلّ المساء .. لله دره

لا تزعلك الليال السود يالريم المفلّي
أضحك أنت، وتضحك الأيام وتعود المسره

أن فقدتك في مشاوير السنين البرق، من لي
وأن ذكرتك ماعليّ من الزمن خيره وشرّه

.....

حلّيت ليل، وعشت متبعثر شعور
‏ماجيتني عادي ولا رحت عادي

‏تيْه الدروب، أمرها ستة شهور
‏وأوجست بي غربة وطن في بلادي !

‏ماعاد تاسعني من الضيقه صْدور
‏لو كنت أجر خْطاي في كل وادي

‏حبيبي الغايب، سنا كل ديجور
‏في غيبتك دلّ الوهم جوف غادي

.....