اخترنا لكم شعر نبطي وفصيح

حتى الكلام الزين حظ وتوافيق
ماكل واحد في كلامه موفق

احدٍ كلامه بلسمً للمعاليق
ماله شبيه إلا العسل لا تدفق

وحدٍ كلامه يفتق الكبد تفتيق
إن كان قوله حق وإلا ملفق

.....

بين صدّفه جَابها العُمر و وداعٍ بـ أختياريّ
‏ما عرف قلبي يطيع الواقع أو يرضي ضميره

‏كنت اظن إن مرّت الأيام بـ يجف أنتظاري
‏ما هقيت إن الأمل يستمطر إليا جفّ بيره

‏كيف صارت وَحشة الغربه تغنّي في دياريّ
‏ذبلت أنوار الشوارع و انطفت شِبه الجزيرة

‏وديّ اقسى ودي انسى ودي ارسى في مساري
‏و أمسك يدين اليِقين اللي تخافه كل حِيره

.....

من تركنا ساعه الحاجه وقفى
لايجي لاصارت الدنيا عوافي

بيض الله وجه من كفئ ووفى
الرفيق اللي مع الصدقان وافي

د. ماجد عبدالله

‏ما فيه داعي لـ الزعل والإنفعال
‏ومجادل الجاهل وكثر اللجلجه

‏خلك على ما قيل شيّال الثقال
‏ومن يبي يزعجك صمتك يزعجه

.....

‏اللي يضر الناس بتضره الناس
‏واللي يسوي الخير مردود خيره

‏ طبع الزمن دوار والعرق دساس
‏وكلن على طبعه يرده مصيره

.....

‏لصبحت في صحه وربـك معافيك
لا تشتكي مـادام مـسـتـور حـالـك

رزقٍ يـسـد الـحـال لـو قـل يكفيك
خلك عزيز النفس لايضيق بالك

ولا تجعـل الدنيا تـصـدك وتغـويك
عـن ديـنـك اللي يعتبر راس مـالـك

واطلب كريمٍ عنده الخير يعطيك
الـواحـد الـلي مـايخـيـّب سـؤالـك

.....

تضيق الاماكن لا استضاقت قلوب الناس
مثل ما استضاق البيت يومه خلا منَّه

تمنّن علي في جيته وانتخى الاحساس
يلوذ الشعور ان جات الاشياء على ظنَّه

لو اني تمنّنت وسقيته بنفس الكاس
يخوفني الحبّ ان غدا فـ آخره مِنَّه

تحمَّلت ما لايدركه قلبه الحسَّاس
أحنَّه، لو ان قلبي من الهجر ما حنَّه

تطيح الدموع ان زارني طيفه العسَّاس
واحسّه يلبّي داعي الشوق ويكنَّه

وأنا مع جروح البارحه كلّنا جِلَّاس
نعزّي بعض في قلب محدٍ درى عنَّه

صداع الفؤاد اقسى ألم من صداع الراس
اثر لا الألم واحد … ولا الونَّه الونَّه

وانا لو شكيت الحظ ما قد شكيت الباس
ولا قد سكبت الماء على نار "يمكنَّه"

حبيب الليال السود ماذاق طعم الياس
مأمّل على نار الهجر تنقلب جنَّه

واذا يعرف الهجر الصريح و رجع محتاس
أعرف الغياب وأعرف آصدّ ممتنَّه

.....

معي حلمٍ تعثرت بـ طرفْه وطحت
أنا ما اخترت اعيشه .. والله اللي اختار

-ثلاث سنين- ماعمري شكيت وبحت
وسعيت بقلب ما هدّه عنا التكرار

جعل تفداك يا حلمٍ عشانه صحت
دموعٍ عشت احايلها بشقى الاعذار

أبي عقب العنا اقدر اقول ارتحت
ولا ينقال عانت وفشلت باصرار

مصير الوقت ينشد يوم كيف اصبحت
واردّ الصوت والضحكة تَعمْر الدار

.....

‏ما كلَّفك تسأل علي يومك رحلت
‏حتى الغريب لجرحي الدامي فطن

‏ضاقت معاذيرك على القلب وسألت
‏وش ذنب قلبي يومه اختارك وطن؟

‏الحزن حلَّ بخاطري يوم استحلْت
‏من رحت والضيقات فالصدر قلطن

‏لا هزِّك الشوق وتحسّفت وخجلت
‏شوف الليالي وش عطيت ووش عطن

.....

‏والله لو لا الحسد بين القرايب
ما اظن رفعت فالمحاكم قضيّه

والله لو لا الغيبه ام المصايب
والنمّه إنهم في حياةٍ هنيّه

والله لو خلوا كلام الزلايب
إن الغلا في زود صبح وعشيّه

والله لو طاعوا فيهمٍ وشايب
إن المحبه بينهم سرمديّه

لكن عساهم يتركون النشايب
ويتعاملون بصدق واخلاص نيّه

.....