فوق هام السحب ( الشعر الشعبي) على متن القوافي

حنـا لنا صدات في بعض الاحـوال
مانطلق الساقـيـن مـن دون داعي

الـمـجـتـمع تلقابه الوان واشكـال
لاتصـيـر في كـل الامـور اجـتماعي

رد السلام ونـاشـد الحـال بالحـال
وسـلم لـيـا مـريـت تسليم سـاعي

اذنـك لاترخيها على القيل والقال
وشوفك على الغرات خله ضباعي

والله انا في زمان (ن) مـايطمّــن
فـيـه ذيب وفـيـه داب وفـيـه حـيّه

لو تـروح لصاحبك تـبغى تـطمّن!!
قال مدري ويش عنده فـي مجيّه؟

تبسّم ترى الدنيا مثل آلة التصوير
تصورك في غفلتك وتوزع الصورة

وجوه البشر وجهين وجهٍ بشارة خير
ووجهٍ يجيب الهم شوفته وحضوره



عبدالله الطلحي

‏مع العزله اللي تكتم الصدر والانفاس
ولا الجمعه الي لا مزاجي ولا شفّي !

انا العاقل الي كل ما ضايقوه الناس
يوقف دقيقة صمت ويصد ويقفي

لا اله الا الله الواحد الفرد المعين
العظيم الخالق المقتدر جل وعلا

نطلبك ياكافل ارزاق خلقك كل حين
يالله التوفيق و العفو يارب الملا

تضحك الدنيا لهلها وتاليها الزوال
والغنا في عزة النفس والعرض النزيه

لاتغبط اهل الطمايع وعبّاد الريال
حظ من قام بصلاته وبر بوالديه

الناس شتى بالمظـاهـر والافعـال
وكلٍ يشوف الناس في عين طبعه

كم واحدٍ في ظاهره خوش رجال
وخافيـه قرد ولابسٍ ثـوب ضبعه

كذاب خايـن له دغايـل ومحتـال
صديـق هو وبليس واهداه قبعـه

وكم واحدٍ عادي ولاهو على البال
لكـنـّـه بـالأمجـاد مقــدام ربـعـه

أصحابك اللي بالسوالف سلاطين
وان حدت الحاجه ماتلقى بعضهم

حاول تصفيهم على واحد اثنين
ودور من اعيال النشاما عوضهم

يارب أنا في رجاء رحمتك لاصرت عود
في ساعةٍ ماعرف جوري من الجوهره

لامن جسمي بدا ينقص وعمري يزود
والشخص ماميزه رجال وإلا مره

وأسمع بذان الصلاه اللي ماعنها صدود
وتهوم نفسي على الممشى ولاتقدره

وأعضاي ماعاد تتحمل ركوع سجود
من دون في دون لكن يالله المغفره

ظروف الزمان المر تمشي على المقلوب
ودروب الصبر صارت طويلة ومنعاجة

صبرنا على سـود الليالي صـبر أيوب
لكـن صبـرنا عـيًا يسـوي لـنا حاجـة

بنـادم يحـاول بـس مالة عن المكتوب
وكلن حسب قسمة و حظة و منهاجة

احـد جاتـة الدنيا على غاية المطلوب
واحد مثل ماقالو ظروفه على الصاجة