قصيدتي الأولى أديها لكم بعنوان ( أعتذرت )

أعتذرت وقلت .. ما للشّوف بغيابك مكانه
لا رحم درب(ن) عسف شوفي لتابوت التجافي

والله إنك يالحبيب .. لعمري الباقي عنانه
كافي إنّي ذقت طعم المرّ من فرقاك كافي

شآن فات وكل وقت .. وله مع الأيام شآنه
ذنب وأذنبته .. ولاكن خاطري يازين صافي

والغلط مرجوع .. قد قالوه .. وأعطونا بيانه
والبيان مصيب منه أبني سند شعري وقافي

واللسان حصان والكفو أحتمى خطوة حصانه
ماهرج في دوج وإن هو قال شي هرجه سنافي

ذاك .. وإني جيت لك شاعر .. وأنا كلّي ميانه
معترف بالسالفه .. وآقول ..صار الثلج .. دافي

آتلذذ .. حين أقرّب منك .. وبهرجك .. هدانه
والحروف يسوقها الفكر المهذّب والثقافي

جعل حظّي .. ما يبور .. وما يذوّقني دوانه
والغياب الله يجلّيه .. وعسى ضاويه طافي

شوقي أكبر من حدود الوصف لو يشرح لسانه
والطريق اللي عليه الشوق .. ما ينفاه نافي

ياكم أتعبني حروف الدرب .. بسهوم الّلعانه
وياكم أتعبت الهجوس وما قبل عنها أنصرافي

آتذكّر .. بسمتك .. وآقول .. يا منبت حنانه
وآتذكّر .. نظرتك .. وآقول .. يالله المشافي