فوق هام السحب ( الشعر الشعبي) على متن القوافي

عودت نفسي ما تحسف على شي !
لو كان غالي ارخصه لنهِ قفا

من عاش بالظلمة ترى يكره الضي
وأنا بوسط الليل صرت أتخفا !

خلف السراب اركض , أدور على في
ما مال لي ظلٍ ولا نلت شفا

داويت جرح القلب مجبور بل كي
كود اللهيب إلي تزايد يخفا

زودت في ضيمه تعذب وهو حي
من حسرتي صكيت كفٍ بكفا

خسران في دنياي لا ذي ولا ذي
طال العنابي لين كفا ووفا

يا زينها الظلمة ولو ما بها شي
يكفي أألف من خيالي وصفا

بنات فكرٍ جافله تكره الغي
يلها بها الشقيان لا يستخفا !!

الشاعره نبض الحيارى

‏لاتحرق أعصابك وتجرح مشاعرك
‏اللي مضا ماهو على الكيف راجع

‏هون على نفسك وريّح الْ خاطرك
‏ترى الهموم تزيد كثر المواجع

‏مافات فات و خل همّك بحاظرك
‏واصل طموحك وانتبه لاتراجع

‏وسارع لفعل الخير والرب ياجرك
‏والصبر وقت الضيق لك حل ناجع

‏‌ سعود عايد الحربي

تدري متى يلعب بك ألفين وسواس
وتحس نفسك فاهم الناس توّك

اليا ظلمك إنسان كان أقرب الناس
وأنصفك شخصٍ تحسب إنه عدوّك

‏الذكريات بكل الاحوال تشقيك
‏مافيه روح من الحنين استراحت

‏تحزن على ذكرى حزينه تبكيك
‏وتضيق من ذكرى جميله وراحت

‏

‏ما يلحق التقصير عزمي وباسي
‏لكن ظروف الوقت عيّت ترفق
‏
‏ما عاد ابي عقل الذكي والسياسي
‏اليوم ابي حظ الغشيم الموفق

‏

‏من طبعنا نسمع عبارات الاعجاب
‏ونشكر مصادرها بعرف ولباقه

‏لكن بعضهم لاسمع بعض الالقاب
‏لو يحصل له ضافها بالبطاقه

‏‌

‏والله لو نتبع من الناس زلات
‏لا غير نبقى بالمجالس وّحدنا

‏لكن نصد ونحتفظ بالعلاقات
‏ونبقى على الخوّه ونوفي وعدنا

‏وصدورنا مثل الفجوج الوسيعات
‏وعن الدروب الغانمه ما ابتعدنا

‏حتى معاديك لا تفرح بهفواته
‏خله وتلقى كلامه يشبه سكوته

‏الادمي عمره اقصر من عداواته
‏يكفيه عايش ولا يدري متى موته

‏غفلت عن عمري وسايرت الأيام
‏والعمر مثل العصر والعصر فوات
‏
‏وكسبت من كثرالاماني والأحلام
‏حلمٍ تعلق لا تحقق ... ولا مات
‏
‏‌

‏تعايش مع العالم وتسلم من الاحراج
‏وبعض العلوم التافهه لا تكبرها
‏
‏ودور لزلات المعرب مية مخراج
‏وزلة ضعيف الرابعه لا تعبرها
‏
‏وترى من يبيح السد ياطيب المنهاج
‏مثل مشتكي ظروفه لمن لا يقدرها
‏
‏ احمد ال سليم