ديوان شعراء السعودية في العصر الحديث (متجدد)☘️☘️

حنا من المعروف تندا يدينا



إن صار زود المال بيدين الانذال


حنّا من المعروف تندا يدينا
وان كانهم شرهوا على طيب الافعال


حنّا وردنا جمامها وارتوينا
وان فكّروا للجود يمشون رحّال


حنّا قبل يمشون يّمه خطينا
يا ما لبسنا للشرف كل سربال


وعلى البسيطة للفضيلة مشينا
في دوحة العربا لنا مجد وظلال


وحنّا على در المكارم غذينا
لو نجمع اللي فات منا من المال


إن كان شيدنا القصور وبنينا
نعطي ولا نتبع عطانا بالاقوال


ونبذل ونسكت كننا ما عطينا
وان باعوا الشيمة بدينار وريال


حنا دخلنا سوقها واشترينا
نطلع لها لو هي على روس الاقذال


لو هو عسير ٍ دربها ما انثنينا
بافعالنا نرسم دروب ٍ للاجيال


إلي نساها غيرنا ما نسينا
أسود سادات ٍ تسجل للاشبال


فضايل ٍ شمنا لها واهتدينا
بيض ٍ نسجلهن جديدات وسمال


حفايظ ٍ لاحفادنا اللاحقينا
نصبر على الشّدات لو شيلنا مال


لو سال دم دفوفنا ما شكينا
نخاف يلقى سدنا كل ختّال


. ويبني هزيلات المعاني علينا
الليل يا خالد على والدك طال


وهنّيت ناس ٍ بالكرا نايمينا
يا عز راسي شفت ما خبث البال


شي ٍ يهوّل شيّب الجاهلينا
شي ٍ من اسبابه يشيب بالاطفال


فطّر خشوم مهجرعات الحنينا
أدير قالات ٍ عريضات وطوال


قالات خلنّ المخفىّ يبينا
منهن رزين العقل بالوقت يهتال


بوقت ٍ عبوس ٍ فطّن الغافلينا
وقت ٍ من اسبابه شكى كل ريبال


نصبر ونسكت كننا غايبينا
الناس بالأيام راحل ونّزال


وتفجعهم الدنيا وهم دالهينا
وحيات رب ٍ نزل آيات الانفال


عالم خفايا نية الحاقدينا
ما اترك طريق العدل في كل الاحوال


لو يرحل المريخ للفرقدينا

محمد الأحمد السديري

يا معذبي بالحب



قلت خطا كانك تمشيت برضاي


واخطيت كانك ما مشيت بهوايه
يا نور عيني وأنت صبحي وظلماي


يا فرحتي يا سلوتي يا ضحايه
يا معذبي بالحب يا قدوة اهداي


يا روح روحي يا رجاي وعمايه
ياللي لي اغلا من قرايب دناياي


ياللي ودادك ساكن في حشايه
ياما لقربك زادت الرجل بخطاي


وياما توطيت الخطر من خطايه
يمناك وان شفتك تصافح ليمناي


يسوقني من يم قربك هدايه
وياما تناديني شفاتيك باسماي


هرجك مثل وحي نزل من سمايه
يا سراجي الوضاح في كل مسراي


ويا غاية عندي سوت كل غايه
انت المرض وانته سبب داي ودواي


وانت الخطر وانته سبب كل سايه
وش لون تنسى يا ريش العين لاماي


عقب الغلا وشبك تكدر صفايه
انخاك يالبراق يا عمير مشكاي


على اللذي بالود جدد عنايه
من جور حبه بالهوا عمست ارياي


كني ببوه مسوى لي جنايه
هو كل همي في منامي ودنياي


حجاب لقلبي عن عناي وظمايه
وش حيلتك يا منتهى كل شكواي


ان صار مالي غير جوده حمايه
حي نهب روحي وشتت نواياي


عنده مرض قلبي وعنده دوايه
طفل سلب عقلي وهو دخال حماي


مستصعب جنب طريق الهدايه
كشف لعدواني خفايا خطاياي


وفرح على مكنون عقلي عدايه
الله لا يبلي صديق ببلواي


ومن نور عيني لا يخيب رجايه
يا جاهل صبري على الحب ما قواي


ويا عمير للعذال عندي عصايه
كل يحب ولا وصل راس منهاي


يا عمير والله ما لحبي نهايه
القلب من جور الهوا ينزف دماي


ويا شن بقلبي لو تبيح خفايه
متى نواجه قرة العين مشكاي


يقفي شقا قلبي ويقبل هنايه

محمد الأحمد السديري

يازين قلبي راح مني يباريك



يازين قلبي راح مني يباريك


واصبح مقره بين الاضلاع خالي
بالحلم ياسيد العذارى يناجيك


وبالعلم له وسط الضمير اجتوالي
طابت لي اذكارك وطابت مواريك


وطابت عمامك يوم طاب الخوالي
ارضيتني وبعالم الحب ابرضيك


انت الحبيب اللي بديت وبدالي
لعل رب صورك لي يخليك


تشفي فوادي مابقن الليالي
انا على خافي ضميرك موليك


في منزل مايسكنه كود غالي
عينك تراعيني وعيني تراعيك


اشفق من الصايم لشوف الهلالي
نصبح مصابيحك ونمسي مماسيك


وانا ورا ضنك بعيد المدالي
انا لي ضاعت جهود الشبابيك


ارسي على صيد الوحش باحتيالي
ياشبة وضحه زينوا فوقها ديك


تموج للطياح روس المقالي

محمد الأحمد السديري

لولا الهرم والفقر والثالث الموت



لولا الهرم والفقر والثالث الموت


يالا دمي بالكون ياعظم شانك
سخرت ذرات الهوى تنقل الصوت


وخليتها اطوع من تحرك بنانك
جماد تكلمها وهي وسط تابوت


تاخذ وتعطي ماصدر من بيانك
وعزمت من فوق القمر تبني بيوت


من يقهرك لو هو طويل زمانك
لولا الثلاث وشان من قدر القوت


نفذت كل اللي يقوله لسانك

محمد الأحمد السديري

الملحمة الزايدية



عفا الله عن قلب يزيد عناه


وداعي غرامه للغرام دعاه
ماطاع عذالٍ يعذله من الملا


وان سمع عذاله يزيد عناه
إلى توسع خاطره ربع ساعه


على الضيق داكوك الهموم نحاه
قلب براه مجادل الضيم والعنا


الضيم من بين الضلوع براه
دع القلب ياعذال خله بغايته


هواك مايتبع طريق هواه
دع القلب ياعاذل عذلك


يضره يزيد ياعاذل عليه شقاه
كونه الايام لين أوجعنه


وعزى لمن حر الزمان كواه
يكويه من هجر النيا حامي الطنا


يضيق به مما دهاه حشاه
يحن حنات الخلوج لجنينها


والخلج مفهوم تحن ظناه
ماحزنها حزنه ولاربع مابه


وحياة من نشا السحاب بماه
على جادلٍ ما شافت العين


مثلها احيا بذكري من هويت لقاه
عشيري شرابي من مناظيم مبسمه


يجلا عن القلب الدريك ظماه
اداريه عن شىء يحسه ويغضبه


وإلى زعل يصعب على أرضاه
ان دك بي من حامى البين


هاجس وجرعت من حر الغرام طناه
تذكرت من طلابة الجود نادر


رفيع الذرا عسر الدروب مشاه
مشى بدرب المجد والنفس تدفعه


الى شامخ عسر الدروب سناه
خالد سنام الطيلات بن فيصل


حجا من لجابه والزمان وطاه
ابشكي على فرز الوغى جاير الهوى


شطون الشفاوي والشفاوي تاه
قد تاه ببحور الغرام المظلمه


دليل الخطا عن من يريد نحاه
نحاه عن حي يوده من الملا


وما فات من يومٍ يزيد غلاه
غلاه في قلبي تجدد علايمه


وتكتب على القلب الدريك اسماه
اسماه وأن عرضت مع الناس


صفقت محاني فوادى والحبيب رماه
رماه بسهوم المحاجر وجندله


قليل الفزع ظلم الحبيب دهاه
دهاه بالفرقا وقلبي له انتما


يتله ومن بين الظلوع لواه
لواه يوم انه على الحب يلتوي


ومن دينه دين الجميل اوفاه
اوفيه بالروح العزيزه ولو غلت


روح تبي روح تحب جزاه
اجزاه لو انه رماني وجادني


يمحا خطا الغالي عظيم إرضاه
إرضاه يبهج خاطري عقب ضيقته


ويرتاح قلب بالفؤاد فراه
فراه في وسط المحاني وعذبه


وان عذبه سهل عليه أدواه
دواه عنده سبايب مصايبه


واشفاه من كوثر نظيم شفاه
ارجيه لو دونه من الناس حاسد


رجاي بالله ماقطعت رجاه
ارجيه لو دونه جموع تصدني


وحبل الرجا يضفي على رشاه
وقد قيل للعراف في ماضي مضى


هذا لهذا من هذاك رواه
يمنى بلا يسرى قليلٍ حصيلها


ورجلٍ بلا ربع يخاف اعداه
ماهبلك ياباغي من النذل فزعه


رجواك من عند الجبان سفاه
رفيق الرخا ينسى مودة رفيقه


ليا ضاق به شين الزمان نحاه
عوين الدهر مايامن الجار جانبه


وليا عرض للشامتين شناه
على داره السودا تبني خيامها


عوين الدهر شين السواد غشاه
خذ يالبيب القلب مني وصيه


حميدان في ماضي الزمان لقاه
إختر من الخلان حي توده


تسبق على فعل الجميل يداه
دليل على العليا بعيد من الخطا


الطيب في دنيا الحياة مناه
ماجال في قلبه من الخوف جايل


وان كاد مرقا الطيلات رقاه
ولا ضعف النفس العزيزه الجارته


ولاهروولت للمحصنات إخطاه
يفرح به العاني ليا حده القصا


وللضيف معسول الكلام نباه
وان جاك من يمة معاديك ريبه


من قبل ماتاطا عليه وطاه
صديقك صديق له وضدك يضده


وعلى روس عدوانك تدير رحاه
هذاك حطه لك رفيق موالى


عونك ليازاد الزمان بلاه
مايفصل القالات الا رجالها


ولاكل من شيد بناه حماه
ولا كل من ركب الجواد عدابها


على حامي الهيجا وحر لظاه
ولاكل من نوى لدار رحل


لها يموت مالحق هواه إمناه
ولاكل من رام المراجل ينولها


ياعسر مقضبها على يمناه
ولاكل من ركب المطايا غزابها


ولاكل من رام الغريم قواه
ولاكل من يبرم عهود وفابها


يطغى على فعل الجميل رداه
ولاكل من ودع لسر يصونه


وكم واحدٍ سر الصديق أبداه
ولاكل من حصل حلالٍ صخابه


يبين بالوقت الشديد صخاه
ولاكل من جالس هل العلم عالم


وكم عالمٍ ضر العباد خطاه
ولاكل من ناله جميلٍ يرده


ولاكل من شاف الحريب نصاه
ولاكل من سل السنان صطابه


يموت وسنانه جضيع إخباه
ياناشدٍ عني وانا لي قبيله


لها المجد زايد بالرفاع بناه
وكمل مقام المجد عامر وشيده


طريق المعالي للدخيل مشاه
كونٍ جرى على واضح النقا


الاشراف جضت من عظيم بلاه
مزنٍ تزبر فوق سلى صواعقه


تشظّف من خشوم الجبال حصاه
نشا من ثنايا برك ترعد مخايله


من الشرق غيظ بالصدور حداه
غيظ مخيف يطحن الغيظ


والغضب وماطال من روس الخشوم طماه
امطر على الاشراف وانهل وبله


عليهم تنثر بالغزير طماه
قوز الشريف اكبر علايم دلايله


سيله تدفق هد كل انياه
سيله عجاج الخيل والبيض والقنا


وروس النشاما بالحزوم غثاه
تشهد على ماقلته العامريه


جضت أسبيع من عويل ابكاه
تبكي على فتخان الإيمان غلمه


تعشوهم اللي بالحروب اعصاه
والضبعة العرجا تعشا بدربهم


وكم ضيفوا ذيب يجر إعواه
والطير يلقى البر من ضرب شلفهم


مضاريبهم يعي الطبيب إدواه
وش حل بالاشراف غالب وراجح


اقفو كما صيد حدته إضراه
اقفو على قب تخافق مع الوطا


تنازا بطوعات الرقاب حذاه
من ولب عطبين الهوايا آل زايد


لهم صانع السيف الصقيل حناه
حناه وارهف شذرته يوم كمله


وعطاه لمن هم بالحروب عداه
حيث أنهم يروون حده من العدا


بأيمانهم روس الفهود عشاه
إلى عدا فيهم حريب وزارهم


يعدلون بحدود السيوف صغاه
وجريس ماطاله من الظيم طايل


اسود الشرى عمن يبيه حجاه
اسود الشرا بالضيق تنجي دخيلهم


ويروون من دم الرقاب ظماه
فكوه ثم اغنوه يوم انه التجا


وجه أبن بدران يزيد ضياه
تجمل مع جريس اليماني وعزه


الزايدي يوم الدخيل عداه
يشهد العامر مامضى من فعايله


يوم إن غالب بالجموع نصاه
يبي دخيل البيت ماخاف خالقه


دخيل عطبين السهوم إرماه
واقفا ذليل يتبع السير بالسرا


وحرب عناله بالفواد شكاه
أقفا مثل ماجا وهو يشكي العمى


اقفا من الذله يحر قناه
عيب على مثله لياهد ينثني


يبدل من عقب الهدير إرغاه
وأبن صباح أذروه وبن خليفة


رمح آل زايد ظلهم بافياه
اخذ ثارهم من ضدهم يوم كادهم


رمح من العز القديم عصاه
يشهد به الهدار واللى جرابه


دخيلهم ثاره عطوه إقضاه
فكو حقوق للدخيل ابن وايل


جميلية نالوا حقوق وجاه
من ضرب من لا صددوا عن حريبهم


يصكون باجباه الخصيم جباه
دخيلهم باعلى السماكين منزله


له بين نجم الفرقدين متاه
كنه بجنات تظله غصونها


والنايف الطايل يحل رباه
تعلوا لعرش المجد من قو عزمهم


مصابيح ظلنات تريح رجاه
مراجيم عدوان مرابيع ملتجى


ليا جف من وبل المزون ثراه
إلى قطبت عسر السنين وجذبت


ولاعاد يذكر بالرياض كماه
يهوشون بوجيه تكاشف من النقا


والضيف مايقصر عليه إقراه
ياناشد عني وأنا لي قبيله


قصر الندا زادو عليه إبناه
اشادوا فعول بالفضايل وسلمهم


للجار كل باللسان حكاه
بني زايد ادوا جارهم من جداره


ولا أحدٍ من اسباب الإله وداه
لهم وادي سهل الدروب ودونه


نار ينزح عن احماه سناه
سناه مصقول الحديد الصافي


وعزم القلوب الصاطيات لظاه
عذروبهم للضيف ترخص نفوسهم


والجار مضمون السلام إغطاه
وجه الندا يندا كمت ماطر الحيا


يبين عند الموجبات نداه
تعييي على الشيمات حفاظة الشيم


ووجيه الندا لازم يبش حياه
قصيرهم يارد على العد قبلهم


ولاشكا يوم الورود ظماه
إن زادت إسنينه تجدد معزته


وكلٍ خطا جاره عليه رفاه
وان ذبح خير عند وجهه


وكسب الفضيله بالحيلة إمناه
على الطيب شبان وشيب


تزاحموا والطيب يتعب للرجال مداه
دواسر كنيوا على دوسر الفحل


واسمٍ على فعل يبين إقداه
من الهضب للافلاج مكدين


ضدهم وحريبهم مر المذاق عشاه
وادي العقيق مطهرينن جنابه


ولا ديس بين العالمين إحماه
من عصر ابن بدران هذي ديارهم


والدار محدٍ للخصيم عطاه
راسين مثل جبال هضب آل زايد


وهم ليا شان الزمان إحماه
حموه يوم إن القنا يقرع القنا


ولمثلهم رب العباد بناه
من الفرعة العليا إلى الخرج


حدهم به الجار ما كِّدر عليه صفاه
الدار ما تصلح لمن لايصونها


الدار عوره والرجال إرداه
دارٍ خذوها بالمراهيف عنوه


وهم نورها الصاطع ينير ضياه
بني عقيل أخلو مغاني ديارهم


بعد دمهم بأرض العقيق سقاه
من غلمة ما باعوا العز والشرف


يوم الردي فعل الجميل نساه
تشهد مشاريف اليمامه بفعلهم


فعل تعد العالمين ثناه
هرج بفعل يشبه الماس بالذهب


وهرج بلافعل يقال سفاه
نعد قول ماتكذب مثايله


راويه أصدق من طيور قطاه
نعد مجد الطيبين وفعلهم


واذكار فعل الطيبين طراه
فعلٍ على فعلٍ تحاكا به العرب


مجدٍ يكذب من يعد ثناه
من رام فعل الغانمين وشانهم


السيف يروى من عداه شباه
من رام فعل الغانمين وسلمهم


الجار عن الخصم العظيم وقاه
من رام فعل الطيبين وقدرهم


يبذل لياضاق الزمان قضاه
ان كف همال الحيا وامحل الوطا


وشحشح عن الطفل الرضيع غذاه
يكرم لياضاقت على الناس وامحوا


ويصبر ليامن الزمان وطاه
النذل مايقدر على طيب الثنا


والليل مايشبه صدوق ضحاه
يجود الفتى بالجود من زايد


الحيا يخاف من العايبات قضاه
قولوا لطلاب الثنا يتبع النقا


ولايلحق العرض النزيه شناه
ومن سار بدروب الردى زاره الخنا


ويلبس من اسلاب السواد كساه
ابعد عن الانذال وترك ديارهم


يفكك من الوجه الخبيث نياه
الاجواد آيات الندى في وجيهها


والانذال شرى ما يذاق جناه
الاجواد ما تنوي بك البوق والردى


والانذال عيب ما يعد غياه
الاجواد فعل الخير لذة نفوسهم


والانذال ملزوم يشاف خناه
الاجواد جنات تعاقب أنهورها


والانذال صلدا من صخور صفاه
الاجواد تاصف لك طريق يدلك


والانذال لعسرات الدروب إقداه
الاجواد مثل الورد عطر روايحه


والانذال **ومٍ يطير سفاه
الاجواد فيهم باب يسر ومعزه


والانذال عسرٍ ما عليه شفاه
الاجواد زلة جارهم يدمحونها


والانذال تجزا الاقربين جناه
الاجواد مثل النهر حلو شرابه


والانذال صباخٍ ملاح ماه
الاجواد تبذل فضلها دون عرضها


والانذال دنسين العروض عراه
الاجواد مثل الريف سعد سعوده


والانذال قحط الزمهرير شتاه
الاجواد تامن شرهم وانت عندهم


والانذال شر مايطيب بلاه
الاجواد مثل الصبح تمشي بنوره


والانذال ليلٍ مظلمٍ ممساه
الاجواد حبات الندى يبذرونها


والانذال تبذر بالرخيص رياه
الاجواد فعول الخير ما يجحدونها


والانذال حزم مايطيب حفاه
الاجواد ماتلحق عزيز مذمه


والانذال تنطق بالصديق زراه
الاجواد عز الجار والضيف


سلمهم والانذال بعيون العزيز قذاه
من طاوع النفس الذليله على الردى


يرخص ويظهر للرجال خفاه
من طاوع النفس الذليله على الردى


نسى الجار والضيف العزيز جفاه
من طاوع النفس الذليله على الردى


تقصر عن العز الرفيع إخطاه
يموت طلاب التماني على الشقا


سراب دو والظلال غطاه
يموت طلاب التماني بحسرته


وكثر التماني ماتعيد صباه
يموت طلاب التماني ومثله


من يرجي الحنظل يزين نماه
يموت طلاب التماني ومكسبه


كما صايحٍ صوته يرد صداه
أبا التماني لاتمنى وخلها


ترى التماني والحلوم أشباه
يقولها لك من هوى القلب


عذبه وداعي غرامه للغرام دعاه

محمد الأحمد السديري

قالو تتوب وقلت بالطرف مصيوب



قالو تتوب وقلت بالطرف مصيوب


والله ماتوب وصافي الخد ماتاب
قالوا تحملت المواثيم وذنوب


قلت الذنوب لها موازين وحساب
قالوا ترى مايفعل العبد مكتوب


قلت افهم الي تذكرونه يالاصحاب
قالوا جهلت وعقلك اليوم منهوب


وكشفت سرك بين ربعك والاجناب
قلت الهوى لقلوب الاحباب مرغوب


ايات حبٍ صورت وسط الالباب
قالوا بعقلك ضايع الفكر منكوب


قلت الموده ماتداويها الاطباب
عقلي معي ماني من العقل مسلوب


انا الغريق وكل شيٍ له اسباب
كان انكم تدرون بالي شفى ايوب


وجدٍ سطى بالقلب والحب غلاب
انا غريقٍ مع هل الحب منسوب


في زمرة العشاق بالحب منصاب
ماطف لي زادٍ ولا اريد مشروب


الي صفا لي صاحبي عسل الانياب
يغضى بعينه وافهم العلم مقلوب


واسري عليه بليلةٍ نورها غاب
ويرخص لي الغالي الى حل ماجوب


وعن القرايب حط لي ستر وحجاب
وابعدعن الشكه ولا انوش له ثوب


الا الحديث وقرعة الناب بالناب
اخاف يصبح زين الاوصاف معيوب


وهو عليه من الشرف كل جلباب
وعرضه نضيف ابيض ولا فيه عذروب


بولا حكوا فيه البعيدين واقراب
عليه وجدي فايقٍ وجد يعقوب


وقلبي من اسبابه بوسط الحشا ذاب
يلومني من لاشكى حب نبنوب


طفلٍ قرونه ماتغطيه الاسلاب
طفلٍ نهب عقلي بضحكات وعجوب


فتان لقلوب العشاشيق نهاب
اصبح هو الغالب وانا منه مغلوب


غدا بعقلي بين شاري وجلاب
ان كان شفته صفق القلب مرعوب


بالصدر كنه بين لاوي وجذاب
والدمع من موق النظيرين مسكوب


يخضر ديارٍ ممحله عقب الاجداب

محمد الأحمد السديري

الله من هم بالأعماق مخفيه



الله من هم بلاعماق مخفيه


خيم على مكنون قلبي وكادي
لو هو بحيد ذات من حرصا ليه


وخلا جلاميده هشيم رمادي
يا عين هللي صافي الدمع هليه


واسقى لعطشان الثرى بالريادي
يا ناشد اللي زايد الغبن باريه


أنبيك عن ما صار كان انت غادي
للغرب قلبي ما سمع صوت داعيه


وللشرق قلبي سمع صوت المنادي
متذكر غال على البعد ناحيه


لو حال من دونه ديار بعادي
حق على الحق فوادي مشاهيه


برضاي حاديني من الشوق حادي
يا ناس خالد ما سلى القلب ناسيه


وعيني محاربها لذيد الرقادي
عنها لذيذ النوم همي يناحيه


يحداه عن موق النظيرين حادي
من غاب قلبي زايد البين كاويه


فكري معه والقلب باسماه شادي
فيما مضى ما يشده البال كاميه


وصبرت صبر ما قواه المهادي
اقسمت باسم اللي حبيبه يناجيه


اني للحق شف قلبي مرادي
أروح يم اللي بلاشك نغليه


مالي على فرقاه صبر وجلادي
أرجى عسى رب السموات يبريه


وعسى لها من خالق الكون هادي
ما خاب منهو باعظم اسماه راجيه


رب الفضا محصى جميع العبادي
قالو تحبه قلت بالروح نفديه


الشاهد الله كل هرجي وكادي
دايم يصور لي على البال طاريه


غال إلى شفته يربع فوادي
يفز قلبي كن عيني تراعيه


وعندي على كل المخاليق بادي
جيته وشفت الطيب بأنت مواريه


وارتاح قلبي عقب غبن ونكادي
واليوم قلبي مكننه عراويه


وشيدت رايات الفرح بالمبادي
بالضحك قلبي جاوبنه محانيه


وغذاه من عقب اللهيب البرادي
الحمد لله غالي شاف غاليه


وشفنا بشير الخير والشر غادي
وداعة اللي كل الإسلام ترجيه


مجري غزير المي في كل وادي

محمد الأحمد السديري

سرى البارق اللي له زمانين ما سرى
صدوق المخايل بارقه يجذب الساري

على فرعة الوادي وسيله تحدرى
تغني طيور الما على حاير الجاري

مرامي غزال(ن) عقب عرفه تنكرى
عليه الله أكبر كل ما حل له طاري

برى الجرح منه ومني الجرح ما برى
وهو يحسب انه يوم طال المدى باري

نطحني يجر الثوب حدر المشجرى
جميل المحاسن لاضخيم (ن)ولا عاري

ابو لبةٍ(ن) مثل القمر ضاح واسفرى
ليا غابت القمرا تقدى به الساري

ترى سلبة العاتق الى صد ما درى
كما سلبة العرجون فى صفحة الذاري

صويب الهوى مسكين مشيه على ورى
ترى النقص فيه وحيله أقوى من الضاري

سليمان بن شريم

ياليت ربي ماخلق حب وفراق


يامعدي المرقاب خله لمشتاق
حول وخل معذب القلب يرقا



ياليت ربي ماخلق حب وفراق
ولا خلق حب على غير فرقا

محمد الأحمد السديري

يالله انا من جود حسناك طالبك



ياالله انا من جود حسناك طالبك


عفوك ومدك حيث منت بخيلى
يالادمي دنياك هذي تعذبك


لوطفت فيها مالقيت الدليلى
كل على مذهب امامه يخاطبك


يبيك من زايد ذنوبه تشيلى
واليا عصيت اهل المذاهب تعاتبك


كل يقول ابيك يمي تجيلي
ولو انتحيت بعيد بالسؤ تطلبك


وكل بصاعه من ذنوبه يكيلي
احد يصحح لك حديثه ويرهبك


واحد يقول الحق عندي نزيلي
واحد يخيفيك في كلامه ويدبك


وابليس يضحك له وهو مستشيلي
الناس عوجان المناطق تكذبك


وعن الصحيح الكذب معهم بديلي
ان مارضيت بقولهم نتف شاربك


وتكبر ذنوبك لوغناك تهليلي
ناس على درب الفضيله تحاربك


وعلى دروب الشر تهذل هذيلى
ودروبهم عسرات عوج وتتعبك


ما تستوي لك لا ولا تستويلي
ينبيك عن دنياك ماضي تجاربك


وعزي لحالك كان عرفك قليلى
اتبع نبيك واترك اللي مجنبك


واقضب مماشى سنته لا تعيلى
اللي بغار الثور للرشد يندبك


وابوبكر عنده نديم وخليلى
نصايحه للرشد حذرا تغايبك


هرجه صحيح وكل فعله جميلي
سنة نبيك للفضيله تقربك


المصطفى ماله شبيه وعديلي
واحذرك عن نقالة السو تقربك


ومن يتبع العايل لزوم يعيلى
لوانت ما تغضب ترى الناس تغضبك


وعقب المعزه يجعلوانك ذليلى
وترى ردي العرق للعيب يجذبك


وتصير بدروب الردا له عميلي
وبنت الردي حذراك حذراك تعجبك


واحذر تصير لمثل هذي حليلى
وعن ما يعيب النسل عرب مناسبك


وعليك في بنت الحصان الاصيلي
يجي ولدها فارق عن قرايبك


ويقف في وجه الخصيم القبيلي
ان كبرت القالات بالفعل يعجبك


ويبرد همومك كان قلبك غليلي
مثل القطامي في هداده يشببك


والدم من مخلاب كفه يسيلي
ليا صارما صلبين الارياء مكاسبك


تراك بين الناس تبقى هزيلي
وترى دروب الخبث يالعبد تذهبك


ويفوت عمرك ما تحصل حصيلي
احذر يابن حوا تطمن لحاجبك


الا لرب للخلايق يزيلي
الي بعفوه عن عذابه يرغبك


وعينه لكل الخلق دايم تخيلى
في لوحه المحفوظ يا لعبد مذهبك


نزل بحق وكل ما به فضيلى
ومعاشر الخايب مع الناس يذربك


وتصبح قليل الميز عقلك هبيلى
ومعاشر الطيب على الطيب يجلبك


ويرقيك للعليا بظل ظليلي
لا تقرب الأجرب بالامراض يعطبك


يصير جسمك مثل جسمه عليلي
ممشا الخفامن صافي العقل يسلبك


ويصير لك يم الرذيله سبيلي
وعن مارد الانذال نزه مشاربك


واشرب نظيف لوورادك طويلي
ولياك تنسى يابن الأ جواد واجبك


والي يروم المجد حمله ثقيلي
يا لادمي وان كان كبرت مصايبك


ازبن على محي ا لبلاد المحيلى
ازبن على رب بعرشه يراقبك


وناجه وبعد العسر يره جليلي
ناجه ولاجل ارضاه وجه ركايبك


وخلك لعلام السرايردخيلي
هو الذي ينجيك من كود صايبك


ويذريك من كربات هول مهيلي
يا لعبد مكن عند ربك مقضبك


وفكر وقدر وانتبه لاتميلي
ولحد من الخلاق يالعبد حاجبك


هو الذي مده وعفوه جزيلى
وهو الذي في ما فعلته يحاسبك


وهو الذي بارزاق عبده كفيلي

محمد الأحمد السديري