ديوان / نجم حرب

المشاركة الأصلية كتبت بواسطة نوال الشمراني

مساكم الله بالخير


صح نبضك ياشاعر القمم :


قال /نجم حرب


قلنا الكثير وصاحب العرف يعرف
ان الهدف من قولنا عزت النفس

اروح واجي بس ماقصدي الف
اقدي الاقدام عن موطن الخفس

رفيقي اللي ماشين باول الصف
طموحنا الجزلات ماهي على الطفس

عيني على المقفين ماطبعها ترف
وكبد العدو رفستها بالقدم رفس


تقديري
@جاهله@

لاهنتي وصح بدنك اشكرك على المتابعة ووضع النقط على الحروف :

خذني معك / بقلمي


اي والله اني لاتكلمت صادق
الحب يحكيني وصدق المشاعر

اعوذ بالرحمن ماني منافق
كل الذي في داخل القلب ظاهر

الا الاسرار وعالم السر خالق
للعبد اسرار ورب الارباب ساتر

اسمي على اسم النايفات الشواهق
انا الوضوح وفيني الحب عامر

الناس تعرفني بكل المناطق
املك جزيل القاف واحساس شاعر

وشعر الغزل لاشك للفكر ساحق
سيطر علي الحب والقلب طاهر

الحب مثل الباب والقلب طارق
احب بنتٍ في حلاها تفاخر

في خدها كن أصدق البرق بارق
والشعر من فوق المناكب تناثر

الزين فيها ياهل الحب خارق
لاشفتها كنك تشوف الجواهر

زين الطبيعه ماتحط السواحق
تجذب شقي القلب حاضر بحاضر

وصفتها والبيض فيهن فوارق
الزين زينٍ والمناظر مناظر

وصدقت ياللي لكلمة الحق ناطق
الزين مع شمر وحمر النواظر

وبعض الحروب بغبة الزين غارق
انا اشهد انك صادق الوصف شاطر

ياهيه ياللي مني القلب سارق
خذني معك لاجيت رايح مسافر

لاتحرق الفوآد بنار المفارق
خلك معي لوكان بجبر الخواطر

نايف عبدالله السليمي

نجم حرب

صح السان شاعرنا / القدير ابو فهد
على هذه البيات الرائعه بارك الله
فيك لقد كتبت وابدعتكم كانت
كلماتك رائعه في معانيها
دائمآ في صعود للقمه
تقبل تقديرى

الشاعر الفذ الغالي نجم حرب
صح نبضك
جزيلات المعاني تعتليها
تسلم لاهنت ونتطلع للمزيد
حقيقه قصايدك كلها ممتازه
رائع واصل وربي يوفقك
وتقبل مرور المتواضع
مع كل الاحترام والتقدير

(*بمناسبة اليوم الوطني*)

اليوم هذا عندي اخبار وعلوم
ماريد كلمة ليش بس اتركوني

اشوفني في نشر الاخبار ملزوم
ماهمني لو البشر يزعلوني

الاوله رب السموات قيوم
امره علينا بين كافٍ ونوني

خلق جميع الكون من شي معدوم
هو الذي ان راد شي يكوني

والثانيه صلوا على خير معصوم
اعداد ماهل المطر بالمزوني

انزل عليه الوحي بالتين والروم
قرآن يتلى لين يوم الغبوني

والثالثه يوم الجهل صار بالقوم
كلٍ يقول الصبح دونك ودوني

اهل الجزيره بينهم صاروا اخصوم
وكل القبايل بعضهم يسلبوني

كاد الجهل بالناس يبقى الى اليوم
لولا ولي العرش من فوق كوني

ثم الزعيم اللي حرب حالي النوم
لين التعافي عم كل الطعوني

مرحوم ياللي وحد الشمل مرحوم
عبد العزيز وكلكم تعلموني

وساروا على نهجه شغاميم وقروم
بحكم الشريعه كلهم يحكموني

واليوم حنا بعهد سلمان زيزوم
تسلم لنا يابوفهد ماتهوني

سيفك محنا والعدو صار مهزوم
السيف سيفك والغريم مغبوني

ويسلم لنا اللي كنه يشاهد الحوم
صقرٍ تعلا فوق وهز المتوني

محمد بن سلمان يسلم لنا دوم
ياطير غرد فوق ذيك الغصوني

ومن غير علومي ذي ماعندي علوم
هذا مجهودي ياعرب واعذروني

نجم حرب
نايف عبدالله السليمي

مساكم الله بالخيرات

شاعر الألق
صح نبضك يالنجم

سلم إحساسك والبنَان

لاهنت
@جاهله@

نجم حرب نجم الإبداع
صح لسانك وإعلان شأنك
مبدع مبدع بمعنى الكلمه
وألانزعل منك وانت بهذا الإبداع
الله يعز ال سعود نور أظهره الله
لهذا البلد
دمت كما أنت
تحياتي لك

ياهل الهوى والحب دوكم نصايح
ان كان فيكم من يود النصيحه

الاوله هذي بنود اللوايح
وما الوم من شده غرام المليحه

والثانيه درب المحبه فضايح
من يسلكه لازم يشوف الفضيحه

والثالثه لاصرت بالحب طايح
مجنون ليلى كيف تعرف مطيحه

والرابعه افحص جميع الشرايح
من قبل ماتبدا تثبيت الشريحه

والخامسه لاصرت للزين رايح
لاتمدحه من قبل تسمع مديحه

والسادسه لاجتك منه المدايح
هذا دليل ان النوايا صريحه

والسابعه ياهل الطعون الجرايح
من قبلكم نايف اطعونه جريحه

على وليفٍ عقبه السد بايح
ان مات قبلي جعل ماالله يبيحه

هذي بنود الحب ماهي مزايح
الصدق عنواني وعلومي صحيحه

نجم حرب
نايف عبدالله السليمي

عندي نصيحه لاهل الاسلام بالذات
سب الدهر مايجوز لوكان تلميح

لان الدهر ياناس رب السموات
سبحانه اللي عذب القوم بالريح

انزل قرآنه عظمه وسط آيات
على نبيٍ وضح العلم توضيح

صحيح بعض الناس فيهم جهالات
كم واحدٍ بالدين يحتاج تصحيح

قلته وانا كلي اذنوب وخطيات
بس احمد الله لي شهاده وتصريح

ادري العلم ماهو صرف الشهادات
والنوح دمعه ماهو دمع التماسيح

شاعر وشاطر وامتلك صوغ الابيات
امرجح المعنى على الوزن ترجيح

اقبل النقد ولا استمع لانتقادات
اعرف منهو يروح النفس ترويح

يامعشر الشعار ياهل الجزيلات
خلوا عقيدتكم تفوق التماديح

ونصيحتي للكل مره ومرات
سب الدهر مايجوز لوهي تمازيح

نجم حرب
نايف عبدالله السليمي

طال الجدال وطال شجبٍ وشرا
بين الوطن وبين واحد سعودي

قال الوطن هو ليه مني تبرا
اكلت من خيري وخنت العهودي

قال السعودي جرني حيل جرا
عدم فهمي للدين ونقصي وزودي

قال الوطن العذر ماهو يسرا
مفروض تعرف مقصدك بالوجودي

قال السعودي يوم جيت اتجرا
اسباب من يبيح قتل الجنودي

قال الوطن بعض المشايخ تضرا
مشايخ التضليل كبار الزنودي

قال السعودي آه وين المفرا
مطلوب للسلطات برا الحدودي

قال الوطن ان كنت صادق تحرا
حكومتك بالعفو دايم تجودي

قال السعودي ليت محمد يمرا
الله ولاغيره ثم آل السعودي

وتم التصالح عقب كراً وفرا
بين الوطن وبين واحد سعودي

نجم حرب
نايف عبدالله السليمي