( بنات الحاره ) حنين الى الماضي

انتهينا وابتعد ظنّك وخالف ظنّي
بعد ماكان الغرام يضمّنا باصراره

وانسحبتي وانسحبت وماضحك لك سنّي
والجفا شب الفتيل وشدّنا تيّاره

كنّي الي حط تابوته بكونه كنّي
وكنّك الي شب قصره من بقايا ناره

اختفيتي من حياتي من عروقي منّي
واختفيت من الحنان الي خفوقك داره

وانطمس ماضي جميل بواقعي يسجنّي
واندفن طعم الحياه ومافضحت اسراره

اذكر اليا جيتك ادندن طرب واغنّي
قلتي الله يسعد اهلك موهبه جبّاره

واذكر اليا قلت بيت ابغى اسحرك في فنّي
صار قصة نوف واشغلتي بحبي ساره

الله اكبر غبت غبتي رايح ولكنّي
التفت واسأل وعقلي يختلي بافكاره

يسألك باقي مراييلك تسولف عنّي؟
يسألك عن باب قلبك يستشف اخباره

تذكرين ايام قلتي لو بتقدر خنّي
والله لاودي صوَرٌك لحمده السّحّاره َ

ياترى باقي تقولين لخواتك انّي
ياترى باقي يعرفوني بنات الحاره

عيد ميلادي ومسباحي هذاك البنّي
فاكرتها او نسيتي حبنا وازهاره

اعترف حنّيت واللي يرحم اهلك حنّي
اذكريني بس ..نعمة حبنا تذكاره

ولا انا وانتي ظنون وخان ظنّك ظنّي
صعب يرجع حب غطّاه الزمن باستاره



علي سعد ظافر