منتديات قبائل شمران الرسمية


المنقولات الأدبية لكل ما هوا منقول من شعر وخواطر

إضافة رد

 
أدوات الموضوع إبحث في الموضوع انواع عرض الموضوع

قديم 02-20-2021, 02:33 AM   #1
مساعد للمدير العام ومستشار للمنتدى
 
الصورة الرمزية الحمدان
 

الحمدان is on a distinguished road
افتراضي قصة قصيدة يالله ياللي تسجد الناس لرضاه

قصة قصيدة يالله ياللي تسجد الناس لرضاه
للشاعر عبدالله بن حمود بن سبيل

جرت أحداث هذي القصة على الشاعر المعروف
عبدالله بن حمود بن سبيل
من أهل نفي من قبيلة باهلة شاعر غزل رقيق
ويصف البادية ونزولهم وروحتهم
هذا الشاعر توفي رحمة الله علية عام 1357هــ
والشالفة اللي أبي أذكرها من
أحد أحفاده فيقول اللي قالي السالفة:..
في سنة من السنين
وقت ماكان بن سبيل أمير نفي في عالية نجد
وفي نفس الوقت كبير العائلة
فحصل يوم من الأيام مشاجرة عادية في مزرعتهم
بين أحد العيال
يمكن من أحفاد بن سبيل لأن عيال بن سبيل
ثلاثة أكبرهم
سعد ويجي عقبه عبدالعزيز وعقبه ناصر متزوج
من حرمتين وقتها يمكن أحد عيال سعد
أو يكون جده سبيل من ناحية الأم
المهم جذعان واحد أكبر من الثاني
تهاوشوا في النخل يقول قام واحد منهم
ويومي بالمسحاة يبي يرمي بها الثاني
ويمكن يوم أنه يرمي المسحاة على باله الى وصلته
بيصد عنها والا يبعد عنها
وماحصل هالشئ المسحاة انطلقت ودلت في الهواء
تدور وتدور وتطقه على رأسه
فطاح الولد ونزف دمه لين مات
(قدر الله وماشاء فعل )
وتصير مشكلة ومصيبة.
الولد هذا اللي رمى امسحاة ارتاع المسكين
ولا تصور أنها بتاصل الى هذا الحد
وركب ساقة ونحاش من نفي
الى منطقة اسمها الشعراء
اللي تبعد مسافة الذلول يوم كامل تقريبا
وتلوذ هناك ويتصدد في الجبال والنخيل
ويغاب عن أهله حول السنة ..
يوم درى بن سبيل وينجن ويغضب على هالولد ويقول:
اللي فيه مافيه السفيه ويحلف بالطلاق من حرمته
الغالية من حريمة ياإن شافته عيني لاقتلة
ويدلون يهادونه الجماعة
قعد فترة وضاق صدره عقب هالحادث
وبدى يضعف جسمه وكثرة هواجيسه
وفيه كثير من قرايبه الكبار اللي يجلسون معه
في المجلس يعذلون عليه ويقولون يا أبو سعد
مايصير تحلف اليمين أنك تقتله
غير اللي مات تبي تموت واحد ثاني ...!
إلا خله واسمح له والحرمة بدالها حرمة ثانية
وماش ماطاع ابد ويقعدون يعذلون عليه إلين جاء واحد له كلمة
مؤثرة وكلامه له معنى ومؤثر
وقال ياابن الحلال تعوذ من الشيطان
هالولد والولد مهوب قصده هالشئ
هذا ومهيب نيته يقتله لكن هذا اللي صار
انذبح واحد وتبي تذبح الثاني
بعد ويالله وافق بن سبيل وقال خلوه يجي الولد سمحت له ...
وجاء الولد يوم دراى أن جده سمح له
بعد فترة طويلة حول السنة
وعاد بن سبيل قد طلق المرة
على حلفة ويوم طلق المره
وجا عقب فترة ويضيق صدره بالحيل
على المرة لأنه يغليها مرة
ومالها ذنب المسكينة تحسف بها عاد جماعته يحاولون
انهم يهدون من روعه
ويعذربون المرة في نظره حتى أنها ترخص في عينه وينساها
عاد واحد منهم وهو قاعد عنده ويقول له ياأبو سعد
يارجال اشوا أنك طلقتها الحمدلله
اللي الله فكك منها دقاقة عصلا عراقيبها صفر
ويرد عليه بن سبيل ادري أنها دقاقة ولاأبي إلا هي
ليتها تحصل ويحاول مرة ثانية ويقول دقاقة عصلا
تروع لو تناديك في عاير ارتعت
وقال لو ماابي الا هي وقالوا له قضن الحريم !!
ندور ونخطب لك غيرها
قال لو تجيبون ايش ماتجيبون ماابي الا هي
قالو الحين هي ماهيب من قرايبك
بعيدة من أقصى الناس قال أدري أنها من أقصى الناس
أبيها ولو قالو تراها بعض المرات
تروح للجيران ولا هي تشاورك بس قصدهم
يعذربونها ويشينونها بخاطره والا هي والحمد لله شريفة عفيفة مطيعة
ماتطلع من داره قال ابد ماعمرها راحت ولا تعدت إلا هي مشاورتني
قالوا أنها مريضة وعليلة وقال ابد مااخبر فيها الا العافية
فكل ماحاولو يعذربونها وهو يعيي مايبي
إلا هي مصمم على رأيه لأنه ضعف عقبا فعلا عقب
مافقدها قال القصيدة هذي:...



يالله ياللي تسجد الناس لرضاه
ياوامر خلقه على حج بيته

تفرج لمن سده على الناس ما ابداه
راضي على مقسومك اللي عطيته

من شي يسل الحال والجسم يبراه
والناس مايشفونه إن ماشفيته

قلت آه واجرحاه من علني آه
وإن حملوني حمل غي قويته

قالوا سفا بالحال ويش اللي أغواه
قلت آه ويش المنكر اللي وطيته؟

قالوا جهلت وبان علمك لمنهاه
قلت آه علمي ياملا ما كميته

قالوا طلبنا لك من الله معافاه
قلت آه وحدته وعفوه رجيته

قالوا هله وأحباب عينه نصحناه
قلت آه هذا واردٍ ما بغيته

قالوا ندور لك من البيض حلياه
قلت آه لو غيره بكفي رميته

قالوا نشاش العود مالك بلاماه
قلت آه عود الموز بإيدي لويته

قالوا تزوج كود تدله وتنساه
قلت آه لو خذت أربع ما نسيته

قالوا من أقصى الناس وين أنت وياه
قلت آه ما أنسى يوم جاني وجيته

قالوا نشوفه عند هذا وهذاه
قلت آه عمره ماعقب حجر بيته

قالوا عليلٍ ناقلن داه برداه
قلت آه بأقرابي وروحي فديته

قالوا نشير ولا نفع ماحكيناه
قلت آه هراج النمايم عصيته

قالوا كثر شيبك وقلبك بعمياه
قلت آه لو قلبي غرير نهيته

مطاوعٍ قلبي بعجفاه وإقداه
وإلى عطى منهاج دربٍ عطيته

ياناس خلوا كل وادٍ ومجراه
قلتوا كثير وقولكم مالقيته



الحمدان متواجد حالياً   رد مع اقتباس
قديم 02-20-2021, 04:26 AM   #2
المؤسس الأول وصاحب الفكرة
 
الصورة الرمزية عايض الشمراني
 

عايض الشمراني is on a distinguished road
افتراضي رد: قصة قصيدة يالله ياللي تسجد الناس لرضاه

ياناس خلوا كل وادٍ ومجراه
قلتوا كثير وقولكم مالقيته
الله المستعان قصه مؤثره وجميله تسلم على نقلها يالامير



عايض الشمراني غير متواجد حالياً   رد مع اقتباس
قديم 02-20-2021, 07:12 PM   #3
مراقب عام وأداري للمنتديات
 
الصورة الرمزية ريحانة شمران
 

ريحانة شمران is on a distinguished road
افتراضي رد: قصة قصيدة يالله ياللي تسجد الناس لرضاه

شكرا على الكلمات الرائعة اخي الغالي
بوركت جهودك ولك اجمل تحياتي وارقاها
نقره لعرض الصورة في صفحة مستقلة



التوقيع

نقره لعرض الصورة في صفحة مستقلة


ريحانة شمران متواجد حالياً   رد مع اقتباس
قديم 02-22-2021, 09:07 AM   #4
المدير العام لمنتديات قبائل شمران الرسمية
 
الصورة الرمزية حسن بن عبدالله
 

حسن بن عبدالله is on a distinguished road
افتراضي رد: قصة قصيدة يالله ياللي تسجد الناس لرضاه

أخي العزيز الحمدان
شكرا لك على هذا التواجد الفعال
والمشاركات النافعه والمفيده
فبارك الله فيك وجزاك الله خير



التوقيع

نقره لعرض الصورة في صفحة مستقلة




( ابوحوفان )

حسن بن عبدالله متواجد حالياً   رد مع اقتباس
قديم 02-27-2021, 10:17 PM   #5
مشرف قسم / الرياضه والرياضيين
 
الصورة الرمزية ليث محمد
 

ليث محمد is on a distinguished road
افتراضي رد: قصة قصيدة يالله ياللي تسجد الناس لرضاه

اخي الحمدان
شكرا على المشاركة الرائعة
سلمت يمناك ولا عدمناك..
دمت برضى الله وفضله



التوقيع

نقره لعرض الصورة في صفحة مستقلة
ليث محمد غير متواجد حالياً   رد مع اقتباس
قديم 03-19-2021, 02:09 AM   #6
مشرفة قسم عالم حواء
 
الصورة الرمزية شمرانية الروح
 

شمرانية الروح is on a distinguished road
افتراضي رد: قصة قصيدة يالله ياللي تسجد الناس لرضاه

شكرا اخي الحمدان
تسلم الايادي والله يعطيك العافية
ارق تحية واجمل تقديري

نقره لعرض الصورة في صفحة مستقلة



التوقيع

نقره لعرض الصورة في صفحة مستقلةنقره لعرض الصورة في صفحة مستقلة
شمرانية الروح غير متواجد حالياً   رد مع اقتباس

إضافة رد

مواقع النشر



أدوات الموضوع إبحث في الموضوع
إبحث في الموضوع:

البحث المتقدم
انواع عرض الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code متاحة
كود [IMG] متاحة
كود HTML معطلة

الانتقال السريع

المواضيع المتشابهه
الموضوع كاتب الموضوع المنتدى الردود آخر مشاركة
يالله يامولاي ياللي عليك الاعتماد جندب المالكي بـوح الـقـصيد للشعراء الأعضاء 13 08-09-2021 06:22 PM
يالله ياللي تبدل الضيق بافراج الحمدان المنقولات الأدبية 4 09-15-2020 11:00 PM
يالله ياللي نطلبه دايم الدوم الحمدان المنقولات الأدبية 3 09-02-2019 06:23 AM
يالله ياللي كل الأمات ترجيك الحمدان المنقولات الأدبية 6 07-16-2019 01:28 AM
يالله ياللي ما لخلقك تفاوت يوسف الشمراني ديوان الشاعر يوسف بن محمد بن حسن الشمراني 4 07-21-2016 12:14 AM

Powered by vBulletin® Version 3.8.7
Copyright ©2000 - 2022, vBulletin Solutions, Inc. Trans by
جميع الحقوق محفوظة لـ منتديات شمران الرسمية