وصية من شاعر لابنه

الشاعر/محمد عبيد الزعيم الوابصي البلوي
الله يرحمه
(يوصي ابنه عبيد)

لاشفت دلون فيه .. فتقٍ .. وشقا
اعرف ترى الماء مايجي وافي فيه

‏ولاشفت حبل السانيه فيه دقا
اخذ الحذر من قبل تقطع مثانيه

ولا اوحيت جرح بالمعاليق لقا
اعرف ترى ماعاد ينفع تداويه

‏والجرح .. لامنك تركته .. تسقا
حم الحديد الصلب بالنار واكويه

والظلم .. لاونه لبس ثوب حقا
لابد مايخلع .. ثياب ~ تغطيه

‏ومن طق باب الناس بابه يطقا
فـي خيـر ولا شر ربه يجازيه

ماصابكم .. مااخطاك مهما توقا
وما اخطاك ما يصيبك ولو صاب راميه

‏وعن لازمن يلزمك حرصك تتقا
لاخير فـي رجل يخلي عوانيه

وفي عشرة الانذال حرصك تهقا
كم واحد بالنذل خابت هقاويه

‏وحرصك ورى المقفي تصيح وتنقا
من باعكم بالرخص .. بيعه بغاليه

ووسط المجالس .. لا تهرج وتلقا
أصمت ترى بالصمت ميزه لراعيه

‏وليا هرجت اهرج بلطف ورقا
وافصح لسانك لاتجي لكنتن فيه

انا انكر الاصوات صوت النهقا
وفم الرجل واحد وثنتين اذنيه

‏بعض العرب بالوزن مايزن اقا
لكن بفعل الطيب تندا أياديه

وبعض العرب دمه كما دم بقا
دمه ثقيل وباردات .. علابيه

‏وبعض العرب مثل الذهب له تشقا
اتعب على الطيب .. لياما تلاقيه

ياعبيد هذا .. واعرف الى تبقا
حق الجوار وضيفكم لاتخليه

‏هذا كلام ابوك .. قولن منقا
قولن قليل وزبدة الهرج تكفيه

لولاي ما اكتب بالقلم عل الورقا
واملي هواجس خاطري يوم تطريه

‏شب الحشا في داخالي واحترقا
لكن بيوت الشعر لاشب .. تطفيه

وصلاة ربي ..عد ماالنور شقا
على نبين تمم الله .. مساعيه