إن قلت وش لونك؟ فلانيب بالحيل

إن قلت وش لونك؟ فلانيب بالحيل
همي كبير وداخل القلب علّه

عيّا يرد الصّبح مسترسل الليل
وعيّا يقوم الحظ من طيحةٍ له

رجلي وغيري راكبٍ صهوة الخيل
أشقى وغيري ياخذ الكار كلّه

يا بندر امزج فايح البنّ والهيل
وبهّر بها يا بوك للكيف دلّه

أبا اطرد هموم تلاطم كما السّيل
كل ما بغى يدله فوادي تتلّه

عجزت متوني وارتدم فوقي الشّيل
والرّجل جاها من حصا الدرب خلّه

تمشي جروح الوقت في خافقي غيل
وتلمع سيوف الضّيم في الوجه سلّه

إن قمت طقّ الغار راسي من الميل
وإن جيت أبا اقعد فوق جمرٍ وملّه


الأمير خالد الفيصل