أنا على المقناص

أنا على المقناص قلبي يرفي = فترة ونرجع يم أهلنا مناكيف

بديار لفروق الحبارى تلفي = جنوب من حزم الجلاميد وطريف


الطير هو غاية مرامي وشفي = أقدرة تقدير الأجواد للضيف

من كبر قدره شايله فوق كفي = وأرعاه تسع شهور بالقيض والصيف

وأداهله لا شفت ريشه مصفي = على الدعو واخفف النسر تخفيف

نقله يشرفني وشوفه يكفي = عن شوف ناسٍ ما تعرف المعاريف

لا شفت لي نو بروقه ترفي = نويت أجهز موتري للتكاليف

القيض كله جالسٍ ومتعفي = وبرد المكيف نشف الدم تنشيف

متى سموم القيض عنا تقفي = وسهيل قبلي يعمد الفجر قد شيف

والنار يصلح شبها للتدفي = والبرد نوجس من نسيمه هفاهيف

قمنا لعزبتنا نشيل ونضفي = ونكمل الناقص ونملا المطاريف

اللي نشيل من اللوازم مكفي = مكتفين العفش بالحبل تكتيف

يمكن الى جينا البقالة نوفي = حاجات نشريها كمالت مصاريف

والصبح من حزم ابرقيه مقفي = صوب المعضم والهضاب المقاييف

بديار جعل أشجارها ما تجفي = تعلها غر المزون المراديف

في رفقة اللى نارها ما تطفي = على الشرف والجود ربعٍ مواليف


مجلاس طلقين الشوارب بصفي = على الدلال اللي بهن ساخن الكيف

خويهم ما أوجس كلامٍ يحفي = غير المزوح الطيبه والسواليف

عقال وزن عقولهم ما يخفي = ولاهم على الفاضي خفاف وملاقيف

http://www.anashed.net/audio/al_meqnas/al_7awayem.ram




دار الشمال وسرني يوم داره === بعد البطا وانا اتحرا لها دوم
عقب الرطوبه والندا والحراره === هب البراد وبشر الوسم بغيوم
في موسم نرجي بشاير اخباره === نفرح ليا جتنا مكاتيب وعلوم