ديوان شعراء السعودية في العصر الحديث (متجدد)☘️☘️

حكاية المينا


اضمن لي ان البحر ما فيه حوريّه


وأضمن لك انه يكون حكاية المينا
اللّه يرحم جدارٍ كان له فيّه


وكانت تسمّي علينا كل ما جينا
نرمي تعبنا عليها كل عصريّه


نتبع قدرنا وتتبعنا خطاوينا
انا.. وذاك.. وهذاك .. وكانت بنيّه..


تطّلّ من جرحها .. وتبشّرّه فينا
كل ما استلان الزمان احدٍ.. بكت هيّه


وكل ما استهان المكان احدٍ.. تباكينا
وفي يوم كان الدفا صوت الشماليه


نادت: حبيبي.. وجينا نرفع ايدينا
خلّت يديهم وجتني وانكسر فيّه


صوت ..وصدى صوت: تكفى لا تخلينا
رجعت المّ الشتات وضاعت يديّه


كل ما جمعته تبعثّر تحت اسامينا
ورحنا نعدّي .. وكلٍ عبرته حيّه


حتى الزوايا بكتنا يوم عدّينا
انا وذاك وهذاك.. وكانت بنيّه


وقبل نتفارق كتبت اللي يعزينا:
اضمن لي ان البحر ما فيه حوريّه


واضمن لك انه يظل حكاية المينا

فهد المساعد

الحصاد


كل ماجبت كبوه قلت كبوة جواد


وطال كبو الجواد وطال معه العدي
كنت أجمّع قروش ٍ بيض لجل السواد


ويوم ساد السواد أنشلّ معصم يدي
آه ياهي غروسي طوّلت بالحصاد


يوم نوّخت حلمي عند باب الجدي
يالحبيب الكبْر ماخلْق لجل العباد


خلق للي ينادي: يالعباد أعبدي
جيت مثل الغريب وكنت مثل البلاد


وقمت أباهي وأصوّت يابْلدي يابْلدي
أحسب أني كسبت الكسب يوم الجهاد


وجبت راس العنيد وشلت حمْل ابعدي
وأثر كسبي عيون ٍ ماتذوق الرقاد


وشاعر كل ماضاقت عليه يحدي
هيه ياللي بديت بشي مثل الوكاد


وأنتهيت بظنون ٍ حاربت مرقدي
أعتبر كل عمري معك كبوة جواد


وألف شكرا على أني صرت اعرف آعدي

فهد المساعد

باب النسيان



كل مافي الأرض ينذر بالمفارق والغياب


اللقا .. والشمس .. وحروف الرسايل .. والقبور
وش بقى يوم أكتشفت أن آخر الدرب السراب؟!


والبحر دمع لسواحل هاجرت عنها الطيور!
مالحزني صوت؟ .. مدري هو خطأ والا صواب!


بس أعرف أني حزين وصوتي الليله جهور
من يدّثر صوتي الليله ويكسب له ثواب؟!


مالها يالشعر غيرك أنت .. ياجبر الكسور
يكفي أني .. لابكيت بدونك أشعر بإرتياب


وكل ماأبكي فيك .. أشوفك لي .. عن اللي فيّ .. سور
أدري بيوتك عرايا .. لكن أوزانك ثياب


لبّس جروحي من أحزانك وألبّسك الصدور
كان ياما كان والنسيان للعشّاق باب


عاشق ٍ لاشدّ درفة باب .. صاح بلا شعور:
يقدر النسيان ينزع غصن من فوق التراب


بس مايقدر يقرّب للتراب وللجذور
كيف أبنسى ذكريات الطيش الأول .. والشباب


ورفقة الليل العتيقه .. وأول الفجر الطهور
والمواعيد وشغبها .. والوله قبل العتاب


وساعة ٍ كم كنت أحاول في عقاربها تدور
والمكان اللي وهن سقفه من الفرقا وشاب


من بعد ماكان يحضّنا مثل طفل ٍ غيور
والمطر لا لوّن الشارع .. وقلنا للسحاب:


بللّ أيدينا .. ترى العشّاق أياديهم زهور
كيف أبنسى والرياض لسيرتي مثل الكتاب!


حافظتني بيت بيت .. وحي حي .. ودوُر دوُر
من كثر ماكنت أدوّر في شوارعها جواب:


هو صحيح الحب أعمى! أو عيون الناس عور؟!
كنت أشوف الحب عذب .. وهم يشوفونه عذاب!


كان هذا الحب سر! .. وقلته وكلي سرور
علمّوني في المدينه كيف لاحبيت أهاب


لكن القريه قمرها قال: كُن للحب نور
في بلادي كنت عاشق .. بس شاعر بإغتراب!


لين صرت الشاعر اللي تعشقه كل البحور
علمّيني يالقصايد هو خطأ والا صواب؟!


لارفضت أنسى عيون ٍ عشتها شعر وشعور
هذا أنا لحالي .. هزيل الحال .. وأشعر بإكتئاب


كن قلبي جال بحر ٍ هاجرت عنه الطيور
أجرع الفرقا وأقول الحب عذب .. وللعذاب ..


كل قلب ٍ لاحرمه الوقت من خلّه .. يبور
ولين هذا اليوم أدوّر في المدينه عن جواب:


ليه في شرعك .. يكون الحب معنى للفجور؟!!

فهد المساعد

آخر الصيف



تغيّرت بنت الضلوع المهاديف


تغيّرت والله .. وانا في رجاها
مدري متى؟! أو وين؟! أو ليه؟! أو كيف!؟


لكن اعرف أنه تغّير غلاها
هي سلمتني للزمن والصواديف


وانا اتذّكرها .. ولا اذكر خطاها
شهور .. كن غيابها في الصدر ضيف


مافيه ضلعٍ ماتقوّس وراها
حاولت فيها ترجع .. وقلت: ياحيف


هو من متى والأرض تنكر سماها؟!
كم كان وجه الحزن في عيونك مخيف!


كم كنت أواسي دمعتك في شقاها!
نسيتي أمواج الزمن والعواصيف؟!


وضلوعي اللي كم غفيتي وراها
ودعتي البحر .. ورميتي المجاديف؟!


من وصلك هذي الشواطي سواها؟!
ياما كتبتك فوق روس المشاريف


قصايدٍ مر السحاب وقراها
ويوم المطر مرّت عليه السواليف


حوّل يبي ضحكتك تسقيه ماها
وياما انجرحتي من فراق المواليف


وقسوة قلوب الراحلين وجفاها
طيب علامك كل ماارسلت لك طيف


عوّد عليّ بدمعةٍ مابكاها!!
حقك عليّه يالعروق الملاهيف


دام السوالف واصله منتهاها
الله عطاها من هنا لآخر الصيف


إن عوّدت للقلب .. والا نساها

فهد المساعد

الريح والناي



ليلة فراق وبرد وبروق ورياح


وصوت المطر يفصل اخطاها عن خطاي
نقرب .. وتنبت فالوطى بيننا رماح


حتى تلاقينا..لقا الريح والناي
آخر لقا يغزل من الغيمة وشاح


وأول لقا يمضي .. بلا موعد جاي
مسحت عن وجناتها صبر وجراح


وأنا جراحي كانت أكبر من بكاي
قلت أذكريني ماهما بارق ولاح


وأيّاك تبكيني ترى الدمع نسّاي
إذا سألوك الناس .. قولي لهم: راح


بالك يجي طاري وداعي وفرقاي
ترى الفراق الموحش .. فراق الأرواح


أما الجسد لو غبت تحييه ذكراي
صدّت .. وفي وجناتها الدمع ذباح


وأنا أعتذر لعيونها عن سواياي
تبكي وأنا أمسح دمعها كل ماطاح


كنت أحسب كفوفي بتمسح خطاياي
لو اجرحتني وقتها .. يمكن أرتاح


لكنها.. وبدون كلمة ولا راي ..
أقفت توّدع عمرها اللي معي راح


وأقبلت أودّع عقبها عمري الجاي

فهد المساعد

الغربة



أيوالله أن شوفته تستاهل عنادي


اللي عشانه تركت الدار والتربه
مااقول لك شوفته نستّني بلادي


لكنّها يافهد نستّني الغربه
وش عاد لو قلت عني ضايع وغادي؟


وش أبركه من ضياعٍ دلّني دربه
تبغاني ارجع! وأنا ياصعب معوادي


مادام همّي نساني وأنقلع سربه
الهم هاللي تشوف انه عليّ بادي


ياليتك تشوف كيف يصير في قربه
الله يحرم ... عيوني لّذة رقادي


أنّي معه .. مااعرف حزني ولااشعربه
هرجك فوادي وأنا ياخوك في وادي


الله يخلّيك ... حالي لاتعّذربه
راضي بحالي كذا ... واللي يجي عادي


لعيون منهو ركز في قلبي الحربه
بصوته شقاوته مزحه طبعه الهادي


يملا عليّ الفضا .. من شرقه لغربه
يكفيني أنه غدا هو شربي وزادي


أو تقدر تقول أنا اللي زاده وشربه
ياخي أذا الحب عيب! فشفني آنادي:


سجل ..... أنا من عرف عيبه وجاهربه
وسجّل هنا كلمةٍ تستاهل عنادي


بقولها قبل أسافر وأترك التربه:
والله ماأقسى من الغربه عن بلادي


الا .. شعوري وانا في بلادي بالغربه

فهد المساعد

المواني


حبيبي دام انا أصلاً حبيبك وانت والفني


اجل وشفيك تزعل يوم افضفض وانفض ايامي؟
انا لولاك.. قلت: ان الزمن ب اموت ما انصفني


وانا لولا الزمن ما كنت اهوجس وانت قدامي
هي الدنيا كذا .. لا جيت ارتّب للكرى جفني


تكاثر غفوتي حتى تصير ابعد من احلامي
هي الدنيا كذا .. وان كان ما صدّقتني ..شفني


شف عيوني .. وشف وش لون جلدي يستر عظامي
شف..أو.. لا.. لا تشوف.. ان كان ودّك صدق تعرفني


تتبّع سيرتي .. او سكتّي .. او جرّة اقدامي
تتّبعني واذا مرّيت دمعي لا تضاعفني


تعدّ بخطوتين وشف طموحي كيف مترامي
هنا طحت.. وهنا حظي عثر..وهناك وقفّني


وهنا ماردّوا اللي كنت اناديهم بالآسامي
تهجّى فالمواني لين تقرا سالفة سفني


تتبّعني من اول جرح واترك عنك هندامي
وانا اقول: ان تشوف اللي يحدّك ما تحلّفني..


.. وش اللي حدّني ابقى على جال النهر ظامي
امانه بس لا تزعل عليّ .. ولا تخالفني


لو ابكيتك من همومي .. او ابكيتك من هيامي
انا لولاك..قلت: الوقت هذا ما يشرّفني


ولولا الوقت قلت اني خذيت اكبر من احلامي

فهد المساعد

العيش والملح


هذا انت خنت العيش والملح يامن


تسب ناسٍ خانوا الملح والعيش..!!
كنت احسبك..وش احسبك؟!..كنت ضامن


أنك تداري خاطري لو على ويش؟!
ماكنت اظنك قاسي القلب لامن


ضاقت علي وجيت لك قلت لي: ليش؟!
وش ليش؟! انا مابي لك ايّة تضامن


مابي لك الاضحكةٍ كلها طيش
مابي لك الا ضحكةٍ لو تزامن


مع ضيقتي طارت هموم وخفافيش
ارقد بها عن غدر الايام وامن


واحيا بها مدري بها اموت واعيش!
واسجّ فيها عن هوى كل طامن


وأروي بها عروقٍ عليها معاطيش
بس انت خنت العيش والملح يامن


تسب ناسٍ خانوا الملح والعيش!!

فهد المساعد

الحسد


الشعر أبوي .. ولا بعد قلت: لبيه


إلا ل بحّة وزنه وصوت قافه
ماقبلي أحد ٍ قد تربّى على يديه


ولاغيري أحد ٍ سْمْع صوته وشافه
أغليه .. وأخافه .. وأحبّه .. وأداريه


وأخاف لاأفقد دهشتي فأكتشافه
على كثر ما أبيه وأتعب وأنا أبيه


ماقد شكيت لغيمته من جفافه
إن ألتفت في حالي .. الله يحييّه


و إن ما ألتفت .. ما ألحقت عمري حسافه
ياما على غفله غرقت فشواطيه


وياما رمى في قاع صوتي ضفافه
وأمسيت أغني له .. وأشيله .. وأشاكيه


كنّي مكوّم كل ماكان طافه!
أحاول أقوى شي مانيب قاويه


وأحاول أقبل شي نفسي تعافه
اسمع من هروج العتب والمسافيه ..


مازوّد حمول التعب والمسافه
ناس ٍ بلوني بالحسد والمشاريه


مافيهم اللي وسط قلبه مخافه ..
لا .. والمصيبه .. ويش أنا منحسد فيه؟!


في الشعر ودروب السهر والكلافه!!
قولوا لذاك اللي سهادي على ايديه


وش جاه مني؟! لعنبوها ضعافه
ان كان حاسدني على الشعر والتيه!


يجي يبادلني .. وأخط أعترافه:
يعطيني راحة باله اللي تقدّيه


وأيامه اللي ماتعرف الصلافه
ونذر ٍ علي لأعطيه .. وأعطيه .. وأعطيه


حتى يملّ من الشعر والصحافه

فهد المساعد

بايعها


.

ما كل ضحكه تهزّ القلب يشبعها


وما كل دمعه تمرّ العين تبكيها
من شاف ضحكة زماني قال: بايعها


ما يدري اني فقيرٍ ما اقدر اشريها
يا اللي نثرتي سنينٍ كنت اجمّعها


تكفين هذي حصاد العمر لمّيها
كم كنت اهدّد بك الدنيا والوّعها


كل ما اذكرتني..واذكّرها وانسّيها
بيدينك اللي احس وكن اصابعها


تقول: بدري على الضيقه وطاريها
بعيونك اللي اناديها وانا معها


اللّه ياكم زعلتي يوم اناديها
كنتي تحسبيني اسرح عن مدامعها


وانا ما غير اتهجّى رحلتي فيها
اي واللّه اذكر عيونك يوم اطالعها


اقرا بها انشودةٍ كنّا نغنيها
كانت تروح وتهجّ البال واتبعها


تاخذ عيوني من الحزن وتودّيها
لايام كنت ارمي بدنياي واجدعها


أيام ما .. كنت اكحّلها.. ولا اعميها
طفلٍ سلاحه دموعه يوم يزرعها


من فوق خدّه وكفّ ابوه يرضيها
اكبر همومه من دروسٍ يراجعها


واقصى طموحه متى ينجح ويرميها
طفلٍ وكل امنياته كان مطمعها


يكبر وتكبر هنوفٍ كان يرجيها
كبَرْت..و كبْرَت.. وضعت..وخفت اضيّعها


خلّيت همّي رضاها يوم اداريها
كل ما طعنّي زماني رحت ادلّعها


يوم الزمن ما ترك لي غير اياديها
ما كنت افكّر تجي في يوم واسمعها


تقلب حياتي من اعلاها لواطيها
حتى اقبلت تبكي الدمعه وتردعها


ثم قالت..وكن موتي بين اشافيها:
جيتك أحلّف عيونك قبل اودّعها


ما اشوف دمعة عتبها لين اخلّيها
تبغى تروح وتخليني واطاوعها


تبغاني اسكت واقول: اللّه يهْديها!!
يا أول احلام روحٍ كان دافعها


انك سندها وحاضرها وماضيها
يا سنيني اللي قضيت العمر اجمّعها


يا ذكرياتي من اولها لتاليها
لا تتركيني اعيش العمر بايعها


ضحكة زماني بدونك ما اقدر اشريها

فهد المساعد