والله ما يكبر في عيون الرياجيل

والله ما يكبر في عيون الرياجيل
الا مواقيف الرجال العظيمه

ولا الردي دايم ردي مثل ماقيل
راس ادمي واللي تشيله بهيمه

عنّـز على الله ثم على صفوت الجيل
الطيب الطيب يامال الغنيمه

لا تلتفت على اهل القال والقيل
اللي يشيلون الرجوله ظليمه

ترى الجمل والعبد والداب والسيل
لازم ثقتك تكون فيهم عديمه

الحق في مانزل الله لجبريل
على الرسول اللي رضع من حليمه

واللي مع الساحر حمامه ومنديل
اول خيوط الفاحشه والجريمه

افلح ترى تالي النهار اول الليل
تماكن الفرصه وذب الخريمه

ورجل ٍ يشح بجاهه ووجهه بخيل
ويمنن تبادر بالمكارم كريمه

غنيمتٍ ترقابها الجدي وسهيل
وغنيمتن منها السلامه غنيمه

وخسارتن يطلع وراها محاصيل
الذ من فوزن بطعم الهزيمه

النفس تقبل مثل ماتقبل الخيل
وتصد لو ان النعم مستديمه

شين تخافه من عقوبه وتنكيل
وشين تعافه من كرامه وشيمه

لو كان تضحك من كلام المهابيل
لا بد تبكي من دموع اليتيمه

والوقت نفس الوقت مافيه تبديل
يمضي وينسخ لك جديده قديمه

تكثر بركته بالدعاء والتهاليل
وتقل من قل النوايا السليمه

ودك ترجالك سراب وتماثيل
وطرقي وقتك قيض وأرضك وخيمه

ولا تدور حاجتك عند دعبيل
خبلن يزم نفيسته في خشيمه

لون ما الله فضل الناس تفضيل
لفضل الأشجار معنى وقيمه

الناس منها الفود ماهوب بالحيل
والأشجار منها فود حتى الهشيمه


الشاعر .. مدغم ابو شيبه

اخي الحمدان
شكرا لك على هذا التواجد الفعال
والمشاركات النافعه والمفيده
بارك الله فيك وجزاك الله خير

مراقبنا العزيز الحمدان
قصيدة رائعة
جزاك المولى الجنه
لاعدمنا روعتك
ولك احترامي وتقديري

موضوع رائع
فشكرا لك لحد روعتك
تسلم الايااادي وننتظر قاادمك
كون بخير

اشكركم على تعقيبكم الرائع
وتواجدكم بمتصفحي لاعدمتكم
لكم مني أجمل التحايا واطيبها