بعض مما في نفسي لفقدان أخي علي بن جروان رحمة الله عليه (رثاء)..

بسم الله الرحمن الرحيم

كتبت كثيراً من القصائد في فقدان أخي علي رحمة الله عليه لاكنها لم تعبر عن الألم ولم تكن كلماتها بحجم محبتي له وألمي على فراقه ولم أشأ أن أنشرها في وقتها واليوم بعد مرور أكثرمن عامين أحببت أن اوثق بعضها هنا ..

أتذكره لأدعوا له بالمغفره والرحمه ..
رحم الله علي رحمه واسعه وأسكنه فسيح جناته وموتى المسلمين جميعاً ..

.................................................. ..............

يالله ياشافي قلوباً مثقلات(ن) بالجراح ... يالواحد المعبود يارحمان ماغيرك ولي

تجبر عزا نقس(ن)ولاها الهم عقب الانشراح... هم الفراق اللي كسر قلبي وقرب مقتلي

فارقت أخوي اللي منومسني مثل نور الصباح... ان قلت ابوي أبوي وان قلت اهلي هوأهلي

ياوجد حالي وجد شيخ(ن) عقب قاد القوم طاح... وياتل قلبي تل ظميان(ن) لميحان الدلي

على فراق اللي لياعدوا هل الجودات لاح ... مثل البروق اللي يجيك الغيث منها هملي

العام انا وياه في دار(ن) مداهلها براح ... واليوم ياعيني عليه ابكي ودمعك سيلي

أنا أشهد اني من بعد فرقاه مكسورالجناح... ياويل حالي كل ماقالوا دفن تحت الصلي

وأنا أشهد ان الهم خيم في فؤادي واستباح ... عقلي وقلبي والمكان وكل شيئ عندي خلي

والموت حق ولاعلى الدنيا مقرومستراح ... يارب صبرني على نار(ن) بقلبي تصطلي

وأدري بان الحزن مايبري دموعي والصياح ... لاكن تجبرني دموعي لاذكرتك ياعلي

ياليتهم خلوني أوادعك ياطيرالفلاح ... وأحضن كفوف(ن) ماتمد الا العطايا الجزلي

وش عاد باقيلي في الدنيا سوى طعن الرماح... اللي غرسها الموت في قلبي وصعب(ن)تنجلي

فيارب لاتقطع رجاي من الرجال أهل الصلاح... اللي تنومسني ليانادا صلي(ن)في صلي

ويالله يامجري على الدنيا نسانيس الرياح... تغفر ذنوبه ياقدير وياكريم(ن) معتلي

..............................
..القصيده الثانيه..

يافوح قلبي على فرقالك فوح الدلال ... لما تقربلها رجل(ن) كريم أجودي

فنجالها لابرد مامدبه للرجال ... يركي عليها من الجمر الحمر موقدي

ماكنها الا على كبدي وقلبي تصال...وافز من حرها ولاأهتني مرقدي

عليك يامن بطيبك بانيلي ظلال ... من صغر سني وطيبك تنثره في يدي

علمتني كيف أوقف فوق روس الطوال...وبين الرجاجيل لي عدي ولي موردي

وعلمتني بان ساس الرجل نبل الخصال...حتى عرفت الطريق اللي عليه اهتدي

ورحلت عني وشفني اليوم باخس حال...اقوم واطيح واخطي الدرب واحدي حدي

وين انت يابومحمد يوم حمل الثقال...انت انت ولا هلي مافيهم اللي ردي

عليك رحمة الاه الكون رب الجلال...وياجعل قبرك من الجنه وسيع(ن)مدي

.................................................

..رحمة الله علي رحمه واسعه واسكنه الله فسيح جناته..