فوق هام السحب ( الشعر الشعبي) على متن القوافي

يالساني احذر عن فمي لاتعدى
قدام لاعضك على الضرس والناب

واحذر تودي هرجةْ ماتودي
واليا بدت قالوا لك الناس كذاب

اللي تعشى بالكذب ماتغدى
والي تعالج به من السقم ماطاب

واذر ثم احذر بالردي لاتجدي
حاجتك ماتقضي وسرك مع الباب

من يوم مايفهم حقيقتك صدي
واصبح يسولف بك مع الناس الاجناب

عز الله اني تبت وابا اتعدي
توبة نصوحٍ عن دروب الخطا تاب

واحدي عن اصحاب الردي وأتحدي
خله يقولون العرب ماله اصحاب



عبدالله المسعودي

يامستغيب الناس ماني غيوبي
ماني لغيري لا اباودي ولا اجيب

عن عيب غيري شاغلتني عيوب
من يشغله عيبه ماشاهد لاحد عيب

الصدق مثل الريس من الدروبي
اللي ماتغني عنه كل المجانيب

والكذب ظلمه فوق وجه الكذوبي
ظلام ليل ولاظلام الاكاذيب



عبدالله المسعودي

في الرجال معاكز ٍٍ(ن) ومراكز
مثل اليمين تمد قبل إشمالها

وفي الرجال مثل الجبال الشمخ
فيها الذراء والماء و طيّب فالها

وفي الرجال حوينيٍ ٍ ودويني
له مجلس ٍ عند الرخم وأشكالها

وفي الرجال مثل المهمهيه
الانذال لا تغزي ولا يعزى لها


....

اكتب ويكتب لي وانا اقول حتيش
حبرٍ على القرطاس ماهوب كافي

والوضع ماهو قابل للمطاريش
يامير بشرني عساها عوافي

سجيت يوم غصون قلبي مواريش
واليوم يافرز الوغى شاب قافي

عروق قلبي يالسديري معاطيش
امسي وانا مقفي واعاين خلافي

رافقت حجاج الهنود الدراويش
وسريت مسرى الذيب رجلي وحافي

وطال المسير وصار بالجو تشويش
متى على الله يصبح الجو صافي

شي يخدش ثومة القلب تخديش
وسره يعود الى القلوب النظافي

يكفيك لايح كلمتي دون تفتيش
وعندك خبر ماقال صقر النصافي

ومدام انا قلبي جزوع الى نيش
حساس من كلمه سريع العيافي

ارض خلا لومابها لقمة العيش
اخير من رزق عليه اختلافي

والرمز يكفي الحر والخاتمه ويش
واقبل تحياتي وانا شاب قافي


رشيد الزلامي



رد الأمير محمد السديري يقول :

ياطير ياللي بالهوى تنفض الريش
ياللي تهز اطراف ريشك خفافي

ياللي نهضت الصبح عقب المغابيش
وقت الصباح وكلٍ ابصر وشافي

اعطيك سر مخزنه بالنشانيش
انحر رشيد ولك بداره ملافي

رشيد من ربعه عداة مداغيش
وصل كلامي للعديم السنافي

قل له عرفت اهل القلوب المغاشيش
اللي عصو باللي ثمانه رهافي

زين الصباح ينفش الخد تفتيش
عين العنود اللي ترب السعافي

برق يفوتك لو مزونه مراهيش
لاتستخيل امطار سحب مقافي

العام قلت اطلب هل الخيل والجيش
اهل البيوت موسعين الرفافي

الى غدى فعل المراجل تناويش
افعالهم مثل الغتر بالكشافي

وقلوبهم للضيف دايم هشاهيش
وعدوهم اسقوه سم زعافي

دور مع الاجواد ضاف العكاريش
وابعد عن اهل الكيد والستر ضافي

رزق ورى النذال جوع وعراميش
والشرب منهم يالزلامي عيافي

اجزم وشم واعرض وبعد عن الهيش
مافيه كود الشوك مثل الشلافي

وفيه العقارب والافاعي محانيش
والفعل وسط قلوب الاشرار خافي

الى عصو مالك بنجد مهاويش
شرع للشريعه لحافي

راحت سنين الخيل مع حزب الجيش
وهذي سنين يالزلامي عجافي

رشيد اهل خلك ترى عندهم طيش
ويفرقون اهل القلوب المشافي

‏احسب ان ما للجمايل على الدنيا جحود
‏لين معروفي بذلته ب ناس وجحدوه ‏

واشهد ن من يفعل الجود في من لايجود
‏مثل من حجج على غاربه ذباح ابوه


حمد هادي المسردي

يالله يامجري القمر من مغيبه
يامرجعه للشرق من عقب تغريب

تفرج لعين من وجعها مريبه
عيّا يفيد بها الدوا والتطابيب

هذا لها خامس شهر مستصيبه
بين الرجا والياس والخبث والطيب

على الذي من دونه ارض تعيبه
ما ياصلنّه متعبات المناجيب

ليت الهبوب اللي تجيني تجيبه
لاشرّقت من نجد من غير تجنيب

لين اني اقضب مقدمه والتوى به
عقب التفرّق والبطا والتغاريب

يقرا لمظموني وانا اقرا لغيبه
سراير تكشف بليّا مكاتيب

اللي على فراق شوفه غصيبه
نهار قفّينا على الفطّر الشيب

ادعج غنج كنّه عيون الربيبه
شيهانة تفرس بكل المخالب

المترف اللي مايماتع صويبه
جرّبت منه وكل شي بتجريب

العين خرسا من طربها غضيبه
فيها لطرّاد المودّه مغاليب

والراس ذيل اشقر يشعشع سبيبه
يسبق اذا جنّ السبايا جناديب

والخد قنديل الدجا ينسري به
عليه من شغل النصارى كواليب

وعوده كما البردي ليان رطيبه
يومي به النسناس بين النبانيب

وملامس مانشت منها لبيبه
الين من الديباج دمث المقاضيب

وريحه كما ريح الزهر في شعيبه
في مربع علّه من الوبل تشعيب

ممطور امس ومدرس ماوطيبه
واليوم شمس وفاح طيب على طيب

لاوهني الذيب يرفع قنيبه
وانا قنيبي بالخفا شقًت الجيب

ماوالله اصخي به وانا خاطري به
لو غتّرت سود العوارض من الشيب

يا اهل الهوى سود الليالي صعيبه
ياما سمعن بفراقهم عقب تقريب

خطّ بسجلي مالغيري قريبه
عطف بلطف واجتماع وترحيب

وصلوا على سيد البرايا طبيبه
ماافترّ دولاب الهوى للطواليب




سليمان بن شريم المري

في وسط نجد اتبع هوى كل نسناس
واطرب لشوف طيورها وتغريدة

اعشق ليالي نجد لو أنها ادماس
وأيامها عندي جنان سعيدة

شمي لعشب رياضا يقعد الراس
وما فات من ساعات عمري يعيده

وله أيضاً:

الى هب الهوى يزداد وجدي
على شانه يجي من يم نجدي

وله أيضاً:

أنا من نجد يكفيني هواها
ويبري لوعتي شربي لماها

وأيضاً:

ان كان بي عذروب حبي لاهل نجد
احبها واحب شمة هواه

احبها يوم انها درة المجد
دار تمكن بالضماير غلاها

دار غلاها باجد مهجتي بجد
دار لنا دار ظلالي سماها




محمد الأحمد السديري

الرفيق اللي يجي لك محبه واحترام
قم بماجوبه ولا لك فضل ولا صنيع

قدم اللي تقدره من حفاوه واهتمام
والبشاشه ثم قدم له اللي تستطيع

واعرف انه ما يبي لا شراب ولا طعام
العرب كل بخيره ودنياهم ربيع

بس لك عنده مكانه ولك قدر ومقام
والرفيق اللي يقدر ترا قدره رفيع

والبخيت اللي رفيقه يمره للسلام
ما يجنب ويتعدى مع الخط السريع


....

‏الطيب مايصعب على راعي الطيب
والا الردي ماهو ، على الطيب طايل

كلن يقول ، انه على المرجلة ، ذيب
القـول قـولن .والفعايل .فعايل

ياللي تحسـب الطيب يشــرى وينباع
الطيب كايـد والمواقــــف توافيــــــق

احدن نظـــر عينـــه على واطي القاع
واحدن طلـوعه فوق روس الشواهيق.



....

‏بيض الله وجه من سدد وقارب
‏وكمل الواجب....وعن ربعه تغاضى
‏
‏الصبر مطلوب في وصل....الأقارب
‏ومن يشيل...الحقد ماعمره تقاضى
‏
‏منصور بن عطيه بن جفين