فوق هام السحب ( الشعر الشعبي) على متن القوافي

والله ماينكر فضلها غير جاحد
‏هي جنه الدنيا وروح المواعيد

‏ماينحصر حب امي بيوم واحد
‏بوجودها كل الليالي لنا عيد .

‏سامحــوني لو حصـل مني خــطا
واعـذروني وان حصل مني قصـور

الحــــياه الفــانيه أخــــــذ وعـطا
ســنة الدنيــا على مر العصـــور

‏لا ضـاقت الدنيـا عـلى الجيـد ضـاقت
تنزل علـى قـلـبه بضـربه عمـيقـه

وان قـررت فـي أي لـحظـه وراقـت
تحـسب علـيه الـثانيه والدقـيقـه

زرع الجميل اثمــر بردات الجـمايل
والقبيلة مصنع الفعـــــل الــــجميل

عمر الفسالة جرم في شرع القبايل
ترك الشرف والعرف فيها مستحيل

اصل الرجال اقحـاح يادار الاصايل
ما يبلغ العزة ســـوى غير الاصــيل

على مدار اليوم جالس على جوالي
فاتح النت ومن تطبيق الى تطبيق

مامعي شي بس من ضيق حــــالي
ادور على شي يبعـــد عني الضيق

ولنّي وحيد ومامعي احـــــد غالي
صــرت اعبس الوجه وابزق الريق

‏كبر البيوت وصغرها مالها دور
من ناحية طيب الرجال ورداها

كم بيت ياكبره من الناس مهجور
من قل ماتلقى كرامة لحاها

وكم بيت ياصغره وبالناس معمور
إمّا غداها فيه وإلا عشاها

‏من أول العربان لاجاهم الضيف
العود يدرج والدلال معموره

واليوم لاتنشد عن العود والكيف
اهم شي تاخذ مع الضيف صوره

‏ما للبيوت العامره طعم يا سعود
إذا خلت في يوم من حس شايـب

بيبانها طرما وجدرانها ســــــود
ويصفق درايشها قوي الهبايـــب

في كل ركن لحزنها اثبات وشهود
على فراق مهونين الصعايــــــب

كانوا هنا وكان السعد ماله حـدود
وكان الرضا يملا قلوب الحبايــب

ماكل عاوي في الفلا نحسبه ذيب
بعض البشر يهدر و وضعه عويله

ولا كل من يقنص يجيب المكاسيب
الطيب بيِّن مايبي له دليله

راع الردى لا تجبرونه على الطيب
العبـد مالـه غيـر مـالله كتـب لـه

اشهد شهادة حق مدح الردي عيب
مثل الصلاه اللي على غير قبله