الـحــب ياليـتـنـا مــــا عـرفـنــا ه

الـحــب ياليـتـنـا مــــا عـرفـنــا ه

الحب ياليتنا ما عرفناه
الحب سقم القلوب السليمه
من صابه الحب ياما اصعب دواه
قتل رجال العصور القديمه
من خان يا صاحبي خانه الله
لا تلقي السمع لهل النميمه
اللي يقولون حساد وعداه
بالكذب يبنون بيت الظليمه
وأنا على العهد والله منساه
عندي على العهد صير وعزيمه
ياسيد الحسن لك عندنا جاه
وايظا مع الجاه حشمه وقيمه
لو قلت اه ثم اه ثم اه
ثلاث والناتج المستديمه
ما ترحم اللي يحبك وتجزاه
وتمد له فالحب مده عظيمه
زولك هدف حبنا لا عدمناه
يازين فرحة نديم بنديمه
لك فالظماير قصور مبناه
و القلب لك فيه قبه وخيمه
هذا بساط المحبه فرشناه
عليه شرع الخصيم وخصيمه
الياس من يمكم ماقطعناه
ما تقنع القوم باول هزيمه
اللي نحبه نبي نتبع ارضاه
اللي على سيرةٍ مستقيمه
كن القمر لا بدا في محياه
ووصاف واجد بغيره عديمه
ادعج غنج لا مشا يقصر خطاه
اهيف حشا شربة الماء تضيمه


الشاعر خلف بن هذال