فوق هام السحب ( الشعر الشعبي) على متن القوافي

يا عين وين احبابك اللي تودين؟
اللي ليا طاب الوطن ربعوا به

أهل البيوت اللي على الجو طوقين
عد خلا ما كنهم وقفوا به

منزالهم تذري عليه المعاطين
تدري عليه من الذواري هبوبه

عهدي بهم باقي من السبع ثنتين
قبل الشتا والقيظ مل امحسوبه

فلت جهامتهم من الجو قسمين
الزمل حدر والظعن سندوا به

يبغون مصفار من النير ويمين
الله لا يجزي طروش حكوا به

قالوا من الوسمي نباته ليا الحين
ومن تالي الكنه تملت ادعوبه

شيالة الكايد على العسر واللين
والى وطاهم موجب رحبوا به

زاد التشا معهم بليا مواعين
وإن شافوا الضيف المطرق عدوا به

والى تريض يذبحون الخرافين
ومن زاد بيت الله تفرش عصوبه

والى عطوا يعطون روس البعارين
وإن فات منه مشي ما حسبوا به



عبدالله بن سبيل

البر دجتـه و البحـر رحـت يمّـه
أدرج سبب حظ علـى الله مساعيـه

يوم إن ولد اللاش رزقه علـى أمـه
رزقي على اللي ميّت القشـع يحييـه

مانـي وانـا بنـدر ببيـاع دمــه
يقطعك يـا بيّـاع دمّـه و مهفيـه

اللـي يبيّـع لابـسـات الأزمــه
ثور يبي بيـض العماهيـج تغنيـه

يزعل ليا جـت ليلـة الـدول يمّـه
يرضى بسوق المال بأخيـه و أبيـه

خطو البخيـل اللـي يكبّـر معمـه
يقرا الكتـاب و واجـب الله مخليـه

أما هـرج لـه فـي رفيقـه بنمّـه
والا عطا و أمـه تضيّـع هقاويـه

يا مل قلـب كـل مـا مـات همّـه
دارت دواليب الدهـر ليـن تحييـه

فـرّاق شمـل النـاس عيّـا يلمـه
وقتن يشيب الراس من شايـة فيـه

أحدن ينـام و حـط راسـه بكمـه
و أحد تخم النـوم عينـه و تخطيـه

و أحدن يحاول بالردى بنـت عمـه
و أحدن يحاول ستر عـذرا عوانيـه

تخالـف الأنظـار شرقـن و يمّـه
كلٍ هدف رايه من النـاس مرضيـه

أنشـدك ياللـي كـل شـي تتـمـه
تقرا الكتاب كـل فـرض تصليّـه

ويش القليـب اللـي عميـق مجمّـه
ما سرّ غرسه ماه عطشـى سوانيـه

سم السبب يا عارفـن عنـه سمـه
سم السبب يا عارفـه قبـل اسميـه

والله يـا لا لا كلمـة قيـل ذلّيـت
لاترك مقاصى اللاش نقص و مهونة

لا شك ضرّاب المثـل بـه تقدّيـت
من حرّك المجنـون ناطـح جنونـه



بندر بن سرور

‏من عادة الوقت لامن خاب يوجعنا
‏ ومن عادة الصمت يحكي كل مافينا

‏واصدق دروس الحياه اللي تعلمنا
‏ دنيا قصيره تضحكنا وتبكينا
ذائقة
‏

الموت هين والبلى وش ورا الموت
عند الحساب يهون سهم المنايا

باكر نموت وتصبح قبورنا بيوت
وعقب القصور لضيقات الزوايا

في جوف الأرض وكل من حولنا سكوت
وتعاقبن بالقبر عوج الحنايا

يارب يامنجي نبيك من الحوت
سترك وعفوك يوم كشف الغطايا

باكر ليا جينا على داعي الصوت
شيبان واطفال وشباب وصبايا

ندعى وحنا بين باكي ومبهوت
رحنا لها ننقاد مثل السبايا

يارب تهديني قبل لحظة الموت
وتغفر ذنوبي ياكريم العطايا

أشكيك هم داخل الصدر مكبوت
وايامي اللي بالخطايا ملايا

ان لاذ بك من كان ضايع ومبهوت
في من يلوذ المرتكب للخطايا

يارب ياقادر على كل طاغوت
لاياقف اللي وحدوبك خزايا

رحماك لامنا صحينا من الموت
واليا وقفنا عند بابك عرايا



سعد بن الهماش العاصمي

ياسلام الله على أميـر وأمـارة عسيـر
عد هبـاب الـذواري وهتـاف المـزون

ياحسين الخُلق والخلق ياصافي الضميـر
ياجمل زومـان بـزال حمـران العيـون

بأسم أهالي بيشه أحمل لك الـود الوفيـر
والجماعة كـل أبوهـم عليـك يسلمـون

ياطويـل العمـر لا دعوجـي ولا خبيـر
ناشيء مستور ماني من اللـي يشتكـون

والحوايج والنوايـب وتحديـد المصيـر
تدخل الرجال من حيـث ربعـه يدخلـون

واقعي خلاني انشر عبـر موجـة الأثيـر
شعر وانا ليس شاعـر ولاهـم يحزنـون

يالأمير ان سني صغير فأن أملـي كبيـر
فيك يامـن فيـك كـل القبائـل يأملـون

جايك اطلب بوي عطنيه تكفـى يالأميـر
وش يطيق أبو ثمانين من ريب المنـون

بويه انقى من حمام الحـرم لـو مايطيـر
لاتصدق فيه راعـي النمايـم والظنـون

فيه مافي ذيب يوسف يصير أو مايصيـر
ياعوين الذيـب وأبـوي دائـم يتهمـون

أرحم الله يرحم أبوك وأفعـل فيـه خيـر
وأعف يابو كف بيضاء وبو قلب حنـون

أكسب أجري وأجر غيري وجير المستجير
عزك الله من مزبن وعزك مـن زبـون

فرح أخوانـي وفـاج البواكـي بالبشيـر
لا تحزن بأمهـات الطرابـش والقـرون

الله اللي بيـده الخيـر والشـر الشريـر
مايعـذب أهـل بـلاد وهـم يستغفـرون

مادام انه يستحي مالـك الملـك القديـر
لابكيتك خلص العود من عـوج الشبـون

لاتخلـي بـوي دون النبشتـي السديـر
والملف يدور بيـن المحافـظ والسجـون

والـولـدوالعود والعـلـم الأول والأخـيــر
ملك أياديك الكريمات جعلـك مـا تهـون

دمت لي يادايم السيف ولغيـري نصيـر
والسلام ختـام واللـي يريـد الله يكـون


محمد بن ثايب الشهراني

يافهيـد لاحقـران والله ولايــاس
أدري واعرف إنك تسـد اللزومـي

مير أنت تقطع راس مع تركبة راس
مثلي بهـا الدنيـا تطيـح وتقومـي

ونصيت رجالٍ معه فهـم واحسـاس
قد صارع الدنيا وسـاق السلومـي

قد صارع الدنيا على كـل مقيـاس
قبلي وقبلك فـي بحرهـا يعومـي

وليـا تعـذر مابعـذره لنـا بـاس
قبلت عـذره والحشيـم محشومـي

كـم واحـدٍ ثنـا واياديـه يـبـاس
عود على ظنـه يعـض البهومـي

تاره يقول أصبر على مر الإفـلاس
يوم ان ماعمري خلقـت معدومـي

وتاره يقول اصبر ترى الصبر نوماس
وترى الهزيل اللي يلـوم ويشومـي

مير الحظيظ اللي غنيٍ عـن النـاس
عن مدحت الطيـب وذم الرخومـي

هذا يرص عروق كبـده بمهـراس
وهـذا يعديـه السمـا والنجومـي

وهذا يحطه مثـل عنتـر وجسـاس
وهـذا عليـه مفتحـات الثلـومـي

هذا كلام اللـي مجـرب وحسـاس
ماجا على الحروه يبيـع ويسومـي

يامعدن الوجـدان ياطيـب السـاس
يكفيك من عرفـي قلايـل علومـي

ترى الرجل ستره حياتـه والالبـاس
كم حاجة تخفي نظرهـا العزومـي

وكم من غناةٍ نورها عيـن لمـاس
تورث وحايشها يمـوت محرومـي

داست عليه وراح مكتـوم الأنفـاس
عليـه عمـدان الحوايـم تحومـي

وكم طيبٍ رده عن الطيـب هـلاس
قـد نكلـوه مخرميـن الخشومـي

جحادة المعروف مكيـال الانجـاس
مثل الرجـال ولا عليهـم وسومـي

عسى فناهم فنية الملـح بالطـاس
اللي عليه النـار تلحـق بشومـي

مكيول ماه من الهماليـل بالكـاس
مكيول من صافي حـدار الغيومـي




الشاعر سبيل الحربي

ياصاحبي هانت عليك المحبه
لاوحسايف عقب هاك المواثيق

جمر الغضا في وسط قلبي تشبه
نارٍ حطبها يابسات المعاليق

كاسٍ مليته بالوفا لاتكبه
خلّه يبلل بالوصل يابس الريق

صبّه بقلبي ثم ملّه وصبّه
وان كان ودك غرق القلب تغريق

دام الهوى راسي وراسك يهبه
خذ سجّةٍ ترى زمانك توافيق

ترى حلاة العمر مع من تحبه
شخص تريد من جميع المخاليق


ََ

طعنة الرجال من كف الصحيـب
فالوقوع اشد مـن طعنـة عـدو

واشجع الطعنات في وجه الحريب
واجبن الطعنات طعنـات القفـو

وانت ياللي صرت فالهقوه قريب
هقوتي مشـوار وقرًيـب بـدو!

لو ملكت الشعر ولسان الخطيـب
وشانت الاخـلاق ماقالـو كفـو

ما تفيد الارض ياسيـل الجذيـب
لو ثمان ايـام تحشوهـا حشـو!

عارفيـن الليـل مبـداه المغيـب
وعارفين الصبح جـلاًي الغشـو

مايعدل الكيف فنجـال السريـب
ولايمده راعي اسلـوم وغـزو!

وان غطسنا في تجاويف القليـب
يفـرق الاوزان قانـون الطفـو!

ظلم ابوعداي واطمـاع الصليـب
اودعت صدام في وسـط القبـو

مير تب قدام يجرفـك الشعيـب
واطلب التوبه ويشملـك العفـو!

سريت ليل الهوى لين انبلج نوره
امشي على الجدي وتسامرني القمرا

طعس وغدير وقمر ونجوم منثوره
انفاس نجد بها جرح الدهر يبرا

يا نجد الاحباب لك حدر القمر صوره
طفلة هلال وبنت اربع عشر بدرا

حبيبتي نجد عيني فيك معذوره
معشوقة القلب فيها للنظر سحرا

فضة شعاع القمر في نجد مسحوره
منشاف لمع قمر في خدة سمرا



الأمير خالد الفيصل

ياليل خبرني على أمر المعاناة
هي من صميم الذات ولا أجنبيه

هي هاجس يسهر عيوني ولا بات
أو خفقه تجمح بقلبي عصيه

أوصرخه تمردت فوق الاصوات
أو ونة وسط الظماير خفيه

أوعبرة تعلقت بين نظرات
أو الدموع الى تسابق هميه

أعانى الساعه وأعانى مسافات
وأعانى رياح الزمان العتيه

وأصور معاناتى حروف وابيات
يلقى بها راعي الولع جاذبيه

ولاني بندمان على كل ما فات
أخذت من حلو الزمان ورديه

هذي حياتي عشتها كيف ماجات
آخذ من أيامي وأرد العطيه



الأمير خالد الفيصل