قصيدة للشامخ - مبدا كلامي ذكر رب البرية

مبدا كلامي ذكر رب البرية
الخالق الجواد نطلب نعيمه

رحمتك يالله يوم ندعي زوية
يوم الليالي همها طال ديمه

بعض الرجال اللي خطاهم لويه
تخفي خيوط الحادثة والجريمة

اعمالهم ماجاتها ريح ريا
وقفاتهم طارت بلين النسيمه

ماهم صريحين الهدف والرمية
رمياتهم ماصابت الا رميمة

رجالهم يفخر بغدرة خوية
واطول طوايلهم علاقة حميمة

ان جيت في طاري الفخر والحمية
ردوا بقوة عينهم يا قديمه

اللي يشيد بهم عبونة عمية
واللي يرافقهم قليل العزيمة

يامسندي كم من رجالن تحيا
صملاتها وقت الشدايد جميمه

تلقى بخوتها معزة وفية
خير(ن) من الرمضة وشمس النميمة

والله لو ناديت منهم تهيا
كنه على روس النوايف حويمة

الحر حرن والحديا حديا
والطير طاير لو تبخس سويمة

العيب في سوم الرجال الخفية
والمشتري كسبان لاجا صميمة

مشرى الرجال الصادقة والوفية
تجارة(ن) تنفع بيوم العديمة

ماهي تجارة مال دنيا دنية
لكن في عزوة وخوة وشيمة

الادمي يعرف بمنهو خوية ؟
نعرف علومه يوم نعرف نديمة

خضر النوافع ماستوت بالمدية
والسيف ابو حدين يذبح غشيمة

خلك دليل ولا تصير المتيه
واحشم كلامك لين تلقى حشيمة

واحرص لقى ربك وخاف المنية
واطلب عفاه ومغفرته الكريمة