( وحــيــد الــدرب )

على درب العنا والشوك أدوّر من شقاي ورود
وأدوّر للربيع الي رحل طاري يذكّرني


وأدوّر للظما موعد ويلقاني بدون وعود
ويسقيني عناوين السراب الي تجرّعني


وحيد الدرب لولا بعض همي والليالي السود
وباقة ذكريات من السنين الي تنكّرني


أسابق خطوتي وأزريت أسابق دربي المسدود
تلفـّت وعجزت ألقى الطريق الي يرجّعني


بعيد ومظلم وموحش وفيه من العذاب شهود
بقايا من فراق وغدر يجتاح الصبر مني


وفيه إحساس بالغربه يصورها بدون حدود
يترجمها شعِر ودموع من كبري تخلّصني


وفيه من الندم جلاد وسياط وسجن وقيود
وتأنيب الظمير الي قبل لأخطي يعذبني


وفيه من التناقض موج متلاطم بنقص وزود
ونفس(ن) عزمها لأبعد مراماتي يبلغني


ولو كانت علاقة بعضي وبعضي عرب ويهود
صمود العزم في وجه التردد يعتذر عني


وفيه الخوف ما يصدق معي ما يلتزم بعهود
من أول خابره خاين على موتي يشجعني


وفيه أكتب عن أول وآخرآلامي وأبيح سدود
عن الي قرر فراقي ولا قرر يودعني


عن أحزاني عن أشباه الفرح عن حلمي المنشود
عن أنصاف الوجيه الي تبعثرني وتجمعني


تعبتك حيل يادربي مشيت لبابك الموصود
بديتك وانتهيت من الطريق الي يضيعني


وأنا بين العنا والشوك أدوّر من شقاي ورود
وأدوّر للربيع الي رحل طاري يذكّرني

هنا تكمـــن الروعــه
اتشرف بوضع بصمة لي هنا
لاعدمنا جديدك...