فوق هام السحب ( الشعر الشعبي) على متن القوافي

‏ياشين طبعٍ عند بعض المخاليق
‏يظن فيك السوء قبل الحقيقة

‏على كلام الناس سريع تصديق
‏وينسى العلوم الطيّبة في دقيقة

سقى الله ليالً عشت فيها مع الأحباب
‏ليا جيتهم ضايق رجع خاطري سالي

‏سقى الله بلادٍ فيه للطيبين أقراب
‏وسقى الله مكانًا فيه لرسومهم تالي

‏أحب التراب اللي مشو به لو إنه تراب
‏وأمر المكان اللي لهم فيه مدهالي

‏عليهم عيوني دمعها دايمٍ صباب
‏وأنا ما خبرت العين تبكي على الخالي

تدور الليالي وانتم انتم وحنّا حن
‏لكم سهلها والصعب نطّاحته حنّـا
‏
‏فإذا قلتوا المشروه ينساق على من
‏على واحدٍ يضحك علينا وهو منّا
‏

ياليـــت والقلب حقي مثـل جوالي
يرسل ويمسح ويستقبل على مهله

وان زاد هـمه وضيقه أو شغل بالي
افرمته في ثواني وامسك الـــشغله

ياهاجسي شمر سواعيدك وقم
أنا علي من المواقف لزايـــــم

أكبر من التفكير وأدهى من الغم
لا صارت فعولك هباب وقسايم

و من عمنا خيرهنعده لنا عم
و اليا صفا وقتك فـ لاهوب دايم

ولياضيفتوا فاورد ع صافي الجم
ادحم ب جنبك ياقوي العزايم

و عن دلة الارفل تنز وقل اكرم
لا بارك الله في دلال الجلايم

و الشور صيده والرجاجيل مغنم
ان كان لك حظوه ولك حظ قايم

و لا تجي في محفلٍ قبل تعزم
ومن جاء بلا داعي يشوف النقايم

وإن شفت مايجرحك في مجلس قم
مرواحك أجمل من مجالس هلايم

ي حبني حبّاه لمنـثــّر الدم
و إكرام من يستاهلون ( الكرايم )

تغابنو العربان في الحال والضم
وفي البندق الزينه وفأم الزمايم

و أحذر ليا سليت سيفك ( تندم )
مايقصر الاشبارغير الندايم

و اجعل مراتب خطوتك طلع سلم
ي نازل السلم فلا لك سلايم

و اليا دعاك اللي تحبه فقل تم
مزاور الغاليين هبة نسايم

و جنب عن الغيبات و الذم والنم
أخس ناس ( منقلين النمايم )

وإن شفت في نفسك شفاحة هوى صم
النفس ماتشفحك لا صرت صايم

ومن يتبع الحرمات لابد يحرم
تر ماورى الحرمات غير الحرايم

ويامطاوع الخفرات تؤكل وتهضم
و تغدي فريسه للجزوع المهايم

واليا بغيت البنت فانشد عن الأم
الخال خالي والعمام العمايم

وترى النسب ريحانة قدرها الشم
ومايأكل الريحان غير البهايم

وعن ما جهلته قولك الله واعلم
أفضل و لا مبنى يجيله هدايم

ورفيقك إليا شفت منه أذى شُم
جـنــّـبه حتى أنها تبين الوسايم

أفطن من أللي كنهم شوك معــّـقم
صرايمٍ عكس السيوف الصرايم

و إليا بليت تحمــد الله و تنعم
الشاكرين أولي النعم و النعايم

وإن كان ما قسمك من الشاة مقدم
جوعك شبع ولا صغار القسايم

ومن كثر الصدقان لابد يغــّـرم
تر كثرة الصدقان ساس الوزايم

صدقان للضحكة وصدقان للهم
وصدقان لا جاب الزمان الطمايم

فإذا عرفت الراس والعين والفم
فمالك ومال جنوبها والقوايم

و أوزن كلامك قبل يظهر وتبلم
هرّجك يورّدك الضرم والضرايم

كم واحد من منطقه يشرب السم
مصطح وهروجه هروج السقايم

ولاتشكـّـا للعرب وأنت تعلم
إن التشكــّي هزّمةً من هزايم

ما يرخص الرجال غير التهمهم
وإضرب مثل ( مايشتكون الصتايم )

ومن عوّد الحـُرّمه على حاضر وسم
بكره تبيعه بيع ( لا سام سايم )

إن نوّمتك فقـــوم وإن نامت فنم
و قارن جداد امورها ب القدايم



علي بن حمري

يا وجدي على اللي رقمها خمسه وصفرين
عفيفه ولا هو بأي واحد يرقمها

سعودية المنشأ عليها شعار الدين
وتاريخ دولتنا من أبرز معالمها

تحب الملوك وتعشق اولاد باخشوين
وتسعى اتجاه الراجحي قبل يزهمها

تعدتني البارح وانا اصيح وينك وين
واقفت وانا في خاطري كنت بعزمها

‏أثر عيبها ماتعشق الشاعر المسكين
وتشرد منه قدام بالكف يلزمها

تقول انت يالمسكين يكفيك شوفة العين
وحكم القدر في كف غيري يسلمها

كل الثوانـي والـدقـائـق والأيام
للمـرأه اللـي قـدرهــا قـدر عـالي

الأم، والزوجه، وبنتك والارحام
بهجة حياتك بالشعــور الخيالي

ماهو مثيل المحتفل يوم بالعام
ومن طباعه مـا ترك قلـب سالي

أعزنا الرحمن في ديـن الاسلام
والذل دونـه يا الـذي مــا تبالي

‏الطيب سعره صعب ماهو بلاشي
‏فازوا به اللي يدفعون الثمن كاش

‏ما جاب غيب قلوبهم كل واشـي
‏بين القبايل ذكرهم يدهش ادهاش

‏مافض مجلسهم خطات الدفاشي
‏اللي يتوع بكلمة تـصطـح الجـاش

‏ليا نصحته زاد شره و طاشـي
‏انحل أمانه و انفرط تقل رشـاش !



‏عبدالله بن زويبن

‏صدتك عن بعض السوالف شجاعة
‏شيمة وعزةٍ نفس ماهو رداً منك

‏صدتك عنها طيب نفس وقناعة
‏ترفعك بعيون العرب ماتطمنك

مافيه داعي للزعل والانفعال
‏ومجادل الجاهل وكثر اللجلجه

‏خلك على ماقيل شيال الثقال
‏واللي يبي يزعجك صمتك يزعجه