صيف وسحابه

ياصاحبي دام الخطا ماله اعذار
روّح ولا تسدل عليّ الكآبه

يرضيك اشوف الهم وآعيش في نار
وانت آخر المشوار صيف وسحابه

تيّار واسبح دايما ضد تيّار
واعمار ضاعت في الورق والكتابه

ملّيت انا من سطوة السّارق المار
تعبت وانت تجيد دور العصابه

الله ولا حبّن يوردني العار
والله ولا عشقن توالت حرابه

والله ولا زفّ الغرابيل بالطّار
غابه وانا ماعيش في وسط غابه

الى متى تخطي على قلبي البار؟
والى متى تذعن وتسمع عتابه؟

قم نفترق ونقول للعالم اقدار
ويوم القضا كلّن يوفّى حسابه

والحب خل الحب مال الغلا كار
لا تظلمه وتهين حضرة جنابه

بينك وبينه ياهوى الرّوح مشوار
تشبه علاقة عكرمه بالصّحابه

النّار في قربك وفي بعدك استار
والنّاي منك ارحم وصوت الربابه

خلّ الشّقا يغسل ذنوبي ولو جار
خلّ الأمل يسمع هواي انتحابه

يمكن اذا ابعدنا لقينا الف تذكار
أخير من قصر(ن) يعوّد خرابه

مادام جرحك في الهوى ماله اعذار
ارحل ولا تسدل عليّ الكآبه