عسى خير ياواحد من ربوعي الغالين

عسى خير ياواحد من ربوعي الغالين
على الصده اللي ما عرفنا سبايبها

جفيّا الرفيق اشد من طعنة السكين
إذا مكّنوا بين السراجيف مضربها

لكن الزمن غيّر معالم صلاح الدين
ونزّل زعامات الدول من مناصبها

وانا بختصر معناي كله على بيتين
ما يحتاج اشرّق بالمعاني واغرّبها

إذا عضّتك بقعا وجور الزمان الشين
وحمول الجمال الصفر حزّت غواربها

تَـنَشّد واذا قالوا لك اني من الحيين
تراني على هقواتك اللي هقيت ابها

وترى محزمك في مامضى محزمك ذالحين
ولا خير في قومٍ تغيّر مذاهبها

وإذا قدْك متعافي وطيّب ووضعك زين
عسى السيل يسقي الديرة اللي ربيت ابها


سلطان الهاجري