اسمع صدى صوتك مع ضجه الناس

اسمع صدى صوتك مع ضجه الناس
والحس يسري للضمايـر حسوسـي
انسى معاك العزم والفكـر واليـاس
وحبك بقلبـي للضميـر امغروسـي
واهيم في بحـر بالامـواج غطـاس
واسج وانسى عن ربوعي جلوسـي
قربك شفا للـروح والنـود نسنـاس
وروياك سعدي عن ليالـي نحوسـي
يامـورد الخـد المعسـل بالالعـاس
ياضي جبينه في الظـلام الدموسـي
العين عين اللي على الكـف حبـاس
والصيد لـه بمعـودات الفروسـي
فرخ الحرار امذهب الريش طلمـاس
اشقر عليه امـن النـداره هيوسـي
ياضي ضيا خده كما نـور لمـواس
والا شعاع الشمس قبـل الغلوسـي
عنق الخشوف اللي محاوز عن الناس
دق العنود اللـي تـرب الطعوسـي
يرعى زماليـج بهـا الـورد نفـاس
يقطف دنق في مرتعـه ومحروسـي
كنه يحش القلب مرهـوف لمـواس
حش الصريم اللـي نـواه اليبوسـي
عليه من فقدي ووجـدي ولحسـاس
مثل الضريم اللي عليـه امحموسـي
نـار اتواقـد هبهـا نـود لـسـاس
موقد غضاها مـن حطبهـا يبوسـي
مادمنـي حـي فـلا بقطـع اليـاس
حبل الرجا والا قطعـت النفوسـي
طيفك يراودني مـع غفلـه الحـاس
ويسود جوي والمشاعـر حبوسـي
واتيه في صحرا ولا جيد مـرواس
واهيم فـي دنيـا عراهـا لبوسـي



شعر سمو الشيخ محمد بن راشد ال مكتوم