مايمدح الرجال بالشكل واللون

ما يمدح الرجـال بالشكـل واللـون
ابحث معه لينك تعـرف القريحـة

تراك تعرف عنه وأنتـم تهرجـون
يبين لك من كـل جـودٍ نضيحـه

المستريح اللي من الشـك مأمـون
مع كل خلـق الله علومـه مليحـة

كم واحدٍ حيٍ لـه النـاس يثنـون
وإلى توفـى قـالـوا الله يبيـحـه

وكم واحد لو هو با الألحاد مدفـون
ذكراه عند الناس بيضـا صفيحـة

وكم واحدٍ يجمع ملاييـن وخـزون
مـالٍ تنميـه اليديـن الشحيـحـة

لا تشكره رملا ولا فـك مديـون
ولا حل مشكلة النطيـح ونطيحـة

ولا له على جاره من الفضل ماعون
لو إن جيرانـه تشـوف الذبيحـة

وكم واحدٍ جيران بيتـه يحمـدون
للجـار ريـف وللجماعـة منيحـة

وكم واحدٍ منه العـوادي يخافـون
زبن المخيف اللي كثيـر فحيحـه

ربعه نهار الضيـق فيـه يتـذرون
لاجا نهـارٍ فيـه لجـه وصيحـة

وبعض الرجال بهم شريفين وعفون
كل علـى ماقـال يرجـع لكيحـه

وبعض الرجال بضحكهم يستغلـون
يجيبها مـن نـوع زلقـة بطيحـة

هذاك بين له من الهـرج مدفـون
خلـه إلا شافـك يزيـن سميحـه

الهرج لـه نقـال والـرد للشـون
مزح الجزع يثـر بكبـدك جريحـه

هذا وأنا ماني من الناس ملسـون
لا شك أرفض مـن تزايـد جميحـه

قلته وكل الناس غيـري يقولـون
راع الظليمـة لا تباطـى مطيحـه


مرشد البذال

مشااركة رائعة
شكرا على مجهودك الطيب
بارك الله فيك وفي عملك
ودمت بخير

المشاركة الأصلية كتبت بواسطة ريحانة شمران

مشااركة رائعة
شكرا على مجهودك الطيب
بارك الله فيك وفي عملك
ودمت بخير

الريحانه الغاليه
أشكرك لتعقيبك الرائع والمميز
كُل الموده والتقدير لاعدمتك

المشاركة الأصلية كتبت بواسطة عبير بنت شمران

ألاخت الغاليه عبير بنت شمران
منوره بمرورك الرائع والمميز
لك مني أجمل تحيه وتقدير لاعدمتك