صاحبي وقف جـزاك الله خيـر

صاحبي وقف جـزاك الله خيـر
انزل وأذن نبي نصلـي العصـر

لقضينا الفرض سو اللي يصيـر
الصلاة ابدا علي من كـل امـر

خلنـا نرتـاح أتعبنـا المسيـر
طََوَل المشـوار والسكـه وعـر

ودنا نجلس على جـال الغديـر
وانتمتـع بالربيـع وبالـزهـر

ريحة القيصوم والشيح العطيـر
تنعش اقلـوبٍ توطاهـا الكـدر

خيمةٍ بالبـر مفروشـه حصيـر
تسوى عندي فلةٍ وسـط الخبـر

شب نارك دامنا وقـت العصيـر
بهر الدلـه وقـرب لـي التمـر

اه من جرحٍ لجا باقصى الضمير
مايطيب الجـرح والدنيـا قهـر

والقهر لصرت محتـاج لحقيـر
حاجتك عنـده ولا عنهـا مفـر

وانت مضطرٍ ولا لك من مطيَـر
هـذه والله قاصـمـة الظـهـر

يتركك تمشـي بخـطٍ مستديـر
لاقضى الـلازم ولا قـدم عـذر

وان نخيته جاك مكسوفٍ حسيـر
وان بدا لـه غـرةٍ منـك غـدر

وانهزم عنك مثـل زول البعيـر
مرخيٍ راسـه تقـل يتبـع اثـر

تزكي الاحرار لصـاح النذيـر
لنخيت الحر جـا يهـدر هـدر

يرتكي للحمل لو حملـه عسيـر
مايمل الحمـل لـو حملـه كثـر

وان زبنته خايفٍ بـه مستجيـر
دون عمرك حط مالـه والعمـر

وش يجيب السيف للموس الشطير
ذا لقص الراس وذا لقص الشعـر

لايغرك منظـر العـود النظيـر
كل عودٍ يرجـع اصلـه للبـذر

وان بدا لك لازمٍ لو هو صغيـر
قبل اخذ الشور والعـزم استخـر

شف حبال الليف مع كثر الجرير
شق دربه في جلاميـد الصخـر

وان وصلت لقمة التـل لاتسيـر
ماورى القمه تـرى الا منحـدر

والعوافي نومـةٍ عقـب الاخيـر
فوق طعسٍ ناعـمٍ رملـه حمـر



احمد بن عبدالرحمن العريفي