ضــاقـــت بوجـــهـــي ...

العيـــد هــلّ وزغـــرد النـــاس فرحه
وأنا أحـس أنـي من النــص مقسوم

اللـي شرى بشت وطــيب لصبحه
وأنا شريت من العنــاء همّ بالكوم

وجـه الفرح يلبس على الراس طرحه
ووجهي غدى من لـوعة الوقت ملطوم

والحـزن شيـــّد داخــل القلب صرحه
وثوب السعدمن شدة الضيــم مخروم

الأمس مثــل اليـــوم والغـد ّشرحه
الأمس مـــرّ وباقــــي الغــد واليوم

من حرقتي أحس في الجـوف قرحه
أضحك بوجه الناس والجوف مسموم

وعــــدّ دمــع العين لــو شـح نضحه
يندى جبينــــي بالعرق مثل محموم

من عقب ما دنيــاي بالفــــرح برحه
ضاقت بوجهـي وكل موجود معدوم

وأرست مراكـــب ذكـــــرياتي بنفحه
على ضفاف الموت وأصبحت مرحوم

وعمق الألم طــوله تساوى بسفحه
ولجت في مــوجه وأنا ماعــرف أعوم

كانت مشاعـــرنا مع الوقت سمحه
وكنا نعزي النفس عن ضحكة اللوم

حتى أنفـرط حبل الصبر فرط سبحه
وحظـــي تعثّـر كل ما حـــاول يقــوم

ما فيــــه فـرق بين خسـره وربحه
ومــا عـاد أميز بين خــادم ومخدوم

صــرخـت حتى لازم الصــــوت بحه
وحاولت أخفــي كـل ماكـان معلوم

ياشـين وجـــه الوقت ياشـين قبحه
ثقيـل طينــه جرت خطــــاه بالشوم

غرز بمجــــرى الظهـــر ياخوك رمحه
حتى أنبثق صـدري من الجرح مكلوم

أرهقـــــت عمـــري ليـن مليت كدحه
وأصبحـت كنـي راعـــي ضيّـــع القوم

يا قطعــــة منــي فقــــدتك بلمحه
هبّ القدر وأخــــذك وأخـذ لـذة النوم

واللي فقير الحـــال مـن دون صحه
لامن ذكــرته صرت بالهــم محكوم

ياليتني أصحــى على قـول مزحه
ويقول لي شخص تراك أنت موهوم

لألعب على أوتار الطــرب لعب دحه
وأجاوب أهل الطــار بلــحون مضيوم

شرعـــــت لك يالصبــر باب وفتحه
أن جيت والأ مــانت ياصـــبر ملزوم

وشلـــــون أعيّد دام مافيـه فرحه
ومحد ٍيغيـّر شيء من الله مقسوم





منقول