{{{ مسفر بن عوظه ووكالة تويوتا وانا ؟؟؟؟؟؟ }}}

بسم الله الرحمن الرحيم
وبه نستعين


يازين منتدانا منتدى شمران ياطيبه صايرآ مثل الحكم بين الأحبابي . ويافرحتي لما اجد موضوع جديد بالمنتدى يسر الخاطر من اي فرد من افراد قبيلتي سواء كانت دعابه او رد جميل لصاحب الجميل او سالفه مفيده تنعش القلب بعيد عن اي خبر او موضوع يتعب القلب . ويانفسي ارتاحي وياقلبي ارتاح مادام دنياك اخرتها الزوالي . ماني محسب للخساير والأرباح سوى سوى عندي رخيصآ وغالي عدى عفوك ومرظاتك يارب . وموضوعي كالتالي اعتراف بالجميل لأهل الجميل / للجميل مسفر بن عوظه ففي عام 1403ه طلبت نقلي من مستشفى تبوك الى مستشفى الظهران لغرض الزواج من شيخة النساء بنت عمي ومن غير قصور في بقية النساء حيث وضعت بنت عمي في راسي والف سيف الا اخذها من الخطاب اللي تقدمو لها وتم ذلك ولله الحمد الا انه في ذلك الوقت واجهتني صعوبات واهمها السياره ومو معقول انني اروح اخطب بنت عمي وانا عاله على الغير ولاعندي سياره وماغير اتنقل من تكسي لأخر ففي حالة غضب قررت اشتري سياره فارهه وعندما ذهبت لوكالة تويوتا بالدمام لشراء كراون لون كحلي فل كامل نقص عليه المبلغ وقالو ممكن نقصد عليك الباقي وانا مااعرف احد بالشرقيه يكفلني واللي اعرفهم كلآ ورطان في الأقساط والدين وتوي شاب صغير ولالي أي علاقات الا تضييع الراتب وعدم الأهتمام بالمستقبل ومثل مايقولو يارقبه قطي شقاك ولكن السوداني موظف الوكاله لما عرف اني شمراني قال اذهب للشيخ مسفر بن عوظه وجبلنا خطاب منه ونعطيك السياره ووصفلي مكتبه خلف الوكاله بالدمام وذهبت للأخ مسفر وهو لايعرفني ولا اعرفه وعرفته بنفسي واخبرته بموضوعي فرحب بي اجمل ترحيب وفي الحال اعطاني خطاب للوكاله ومن غير اي سؤال او تردد فله مني جزيل الشكر والعرفان ومن ثم اخذت سيارتي الفارهه وكشخت فيها وكنت شبه يوميآ اتسبح انا وسيارتي الفارهه بشاطي نص القمر هافمون فما اجملها من ذكريات وما اجملك اخي مسفر . ورعاك الله ياوقتآ مضى لي مع الأحباب في دنيا هنيه . وفي الختام مع هذه الأبيات للشاعر القحطاني وعدلت شئ بسيط ويستاهل الأخ مسفر . الطيب في رايي وراثه بلا شك يتوارثوه الناس عمن سبقهم . من يدرس التاريخ واستوعب ادرك لأل عوظه اللي ترابط حلقهم . لامات مبروك يجي عقبه ابرك وشجعان سبحان ربي اللي خلقهم . عطو شمران العز نهظه تسرك وكلآ يقلد مشيهم مالحقهم . اسره كريمه فضلهم مايغرك بنو شوامخ مجدهم من عرقهم . وفي ظلهم مافيه شئ يضرك وربي على حسن النوايا رزقهم . يامسفر الخيرات لله درك وابقاك ذخر لكل من جاء يمك . والسلام عليكم ورحمة الله وبركاته . اخوك ومحبك ابو عبد العزيز