فوق هام السحب ( الشعر الشعبي) على متن القوافي

الصاحب الغالي نحنه وندراه
عن شامتٍ يفرح لا شاف انزعاجه

نستر عذاريبه وندمح خطاياه
ولا نبين عثرته وانحراجه

نصون رفقة راعي العز والجاه
ونطيب له تقدير ما هو لحاجه

واليا هرجنا له بهرجٍ نقيناه
خوف يتعكر من سببنا مزاجه

خوينا عاداتنا نكسب رضاه
ونزيح همه لين يضحك حجاجه

خليل بن هدلان

‏كلامكم يَ مقولبين السواليف
‏على عيال الطيب برد وسلاما

‏غشّوا بعضكم .. يكرمون العواريف
‏اللي على خطّر بعضها تحاما

‏الله ليا حط الضعافا .. مواليف
‏حط النشاما في طريق النشاما

‏الطايله لنا عليها مشاريف
‏غصباً على غل النفوس السقاما
‏
‏ناصر مناحي

في ليلةٍ عيّا على النوم..كسري
كنت احسب إني فـ الليالي صبورة

و برحمتك جيتي مع الوقت..جبري!
نورة..ومن مثلك على الأرض نورة

على اهتمامك كيف يوفيّك شكري
و أنتي تمدين المعونه..ضرورة

يبقى جميلك في دهاليز صدري
مثلك تخلّيني وراها فخورة


...

انا من ورى ابها بين ساحل وبين هضاب
اسوق الركايب بين وديان وجبالي

ليا رحت عقب العصر عديت في المرقاب
اغني على المسحوب واجر موالي

قعدت اتذكر ياسعد ربعنا الغياب
وأنا دارين ما مر الأول وطى التالي

لو احاول انسى ما مضى وادرك الاسباب
أنا شايف أن القلب مهوب متشالي

اضيع دليل الراي واخطي طريق الباب
ولا عاد افكر في خروجي ومدخالي

واسامر سواد الليل ونجومه السكاب
واسولف على نفسي وانا بالخلا الخالي

هواجيس قلبي بالدقيقه تجيها اسراب
وانا ما بكيت الماضي إلا من هبالي

وش الفايدة ياعين، حكم القدر غصاب
حياة ابن ادم هكذا شمس وظلالي

خلاص انتهاء مافات وامر الله الغلاب
وكلاً معرض للضماء واشهب اللالي

صواديف بقعاء غيبها مثل سم الداب
ومادام راسي حي بمشي على فالي

انا اشوف راسي من زمان العجايب شاب
ولولا رجا الله كان وشلون ابا احتالي

زمان يهين الروس ويقصر الاشناب
ولا يصفي الا للبغيضين الانذالي

ألا ياسعد مر الجعيثين وعطه كتاب
تكرم وسلم سيد الشعر مرسالي

ابا لقبه سيد الشعر سيد الألقاب
اديب الادب يوم اكثر الناس جهالي

يخاطب رجال العلم ويدرس الطلاب
موازين شعر وللشعاعير مكيالي

قصيده عجايب ومعجباً فيه أشد عجاب
وهو شاعراً بالشعر تضربه أمثالي

وله مجلس ماحط دونه ذرا وحجاب
مداخن وعود ازرق وكيفات ودلالي

وقله ترى دنيا ابن شايق شقا واتعاب
عقب مافقد ربع لهم صيت وافعالي

فقدت الطرب والأنس والربع والأصحاب
وفراق النشامى زاد شري وغربالي

وفقدت التواضع والتراحيب والآداب
وفقدت الثقه من يوم فارقت الأبطالي

قرانيس حر يشهر الكف والمخلاب
حراراً تخلي صافي الدم شلالي

حراراً هددهم خفة النفس والرحـاب
عليهم عيوني دمعها يهمل اهمالي

أنا والله أن ابكي عليهم كالأغراب
اببكي على اللي مابعد ضيقوا بالـي

ولا حسوا الخاطر ولا سببوا لانشاب
حليب الصديق وللعدو سم قتالي

أنا من بعدهم مثل سعدون عقب عقاب
حياتي بعدهم عندي ارخص من ريالي

فلا كل رماياً طرح شارة المضراب
ولا كل من قال اركب الخيل خيالي

ولا كل غايب نفقده يا سعد لا غاب
ولا كل رجال يعوضك برجالي

سقى الله ليالاً عشت فيها مع الاحباب
ليا جيتهم ضايق رجع خاطري سالي

شباباً على ما قال الاول رجال أجناب
جذبهم عريب الجد والعم والخالي

سقى الله بلاداً فيه لطيبين أقرب
وسقى الله مكاناً فيه لرسومهم تالي

احب التراب اللي مشوبه لونه تراب
وامر المكان اللي لهم فيه مدهالي

عليهم عيوني دمعها دايماً صباب
وانا ما خبرت العين تبكي على الخالي

ولا طاح بيتاً باقياً له عمد واطناب
بيوت المعزه عز في كل الاحوالي

اقول الصحيح وحاسباً لرجال حساب
وانا عارفاً منزال غيري ومنزالي

الاجواد واجد والمراجل لها كساب
لكن واعد العشرة ليا صرت جمالي

يطير الشرار وكل ناراً لها شباب
ومن ولع النيران يصبر على الصالي

تجارب حياتي مع جزا والدروب صعاب
لقيت الرجال انواع والوان واشكالي

صديق الشدايد ما خذا منك علم وجاب
وسيع الصدر يضحك ولا هوب زعالي

صديق الشدايد ما ينافق ولا يغتاب
يدله غريب الجار ويزبن الجالي

وصديق الرخى عقاب ومصادقه عقاب
شجاع الحكي والمدح بالقيل والقالي

وصديق الرخى ما غير صوره ولبس ثياب
يا ليته يبرقع ماله شماغ وعقالي

وعندي نصيحه جد ماقلتها لعاب
أقول الصحيح ونايم القلب يصحالي

ترا خوة أهل الطيب يالطيبين أطباب
يطيب السقيم وخوة الاش سلالي

تغانم شبابك يا بيض الوجه دامك شاب
ترى البدر لو يطلع قمر عود أهلالي

فلا تهجر المسجد وخلك ورى المحراب
ترى روضة المسجد لها منزلٍ عالي

ولا تترك اللي يزهمك خايفٍ مرتاب
ترى الذل ما نجى الثعل با لتحيالي

ولا لندى غير الفدى لو تروح أرقاب
ومن ضاع رايه يا خذ الشور ويمالي

ومن با شرك بالعذر لاتلحقه بعتاب
ولا تشوف نفسك شيخ والناس عمالي

ولا تهين نفسك لو تجي بين ضرس وناب
وهيبتك لا تنقص ولو ربع مثقالي

وبنت الردي لا يعجبك زينها الجذاب
تراها كما المخيال خيل وتخيالي

ولو شفت حمر خدودها واثمان أعذاب
لا بدك تمنى ليت ما جالك أعيالي

ولدها لا ياشاف النقى والملاقى هاب
ذليلٍ بخيلٍ فيه خفخاف وجفالي

أخذ بنت قرمٍ طيبٍ ساسها ما عاب
تنومسك بنت الشبل ويجي لك أشبالي


أعيال الذياب تصير مثل الذياب أذياب
وعيال الثعالب مثلها زهر الاذيالي

وفرخ الصقر مثله وفرخ الغراب غراب
وبوم الخراب ايقابل العش ويلالي

الى صار راسك فوق يا طيب الانساب
فلا ينحني لقدام رجلين ونعالي

لكن الله اللي يكتب الرزق يا خطاب
هو اللي يفك الباب ويقص الاقفالي

ولا يهمل الا واحدٍ عايفٍ الاشباب
ولا ضيع حقوق البشر غير الا همالي

وترى للقصايد كيف والكيف له شراب
وانا ما شرب الا كيف راسي بفنجالي

ولا طاوع الجاهل ولا جامل النصاب
أقدم يمين الحق واحط معذالي

ولا نيب و الله طيبٍ له مع من طاب
ومن طاب لي برخص له الحال والمالي

أكذب وانا خابر واجامل وانا كذاب
سنين مضت هي صدق والا يورى لي

تلخبط جهاز المخ وانهارت الاعصاب
وفورت دمي وارتفع ضغطه العالي

لكن في رجى اللي من رجى رحمته ماخاب
هو الواحد العالي وهو ربنا الوالي

وهو الخالق الرازق وهو المعطي الوهاب
له الملك كله والكمايل والاكمالي

رئوفٍ رئيفٍ رحمته تنقذ المنصاب
يغيث الديار الممحله عقب المحالي

شديد العقاب ويعتق المذنب اللي تاب
عسى ما يواخذنا بسيات الاعمالي

كما قاله الله فصبروا يأولي الالباب
ترى الصبر زين وكلمة الحق تنقالي

واصلي واسلم عد ما تنبت الاعشاب
وما لاح براقٍ سرى يشعل أشعالي

على المصطفى اللي وحد الدين والاحزاب
شفيع أمته يوم الهوايل والاهوالي


عبدالله بن شايق

زمّليني من هواجيس الغياب اللاإرادي
إن ذبحني طاري الفرقى وش أنتي مستفيده

اعبري بي لا اغدي عادي و أنا مانيب عادي
*الحريص تورّده للموت غلطته الوحيده

يا رب .. نفسي تزعلني وترضيني
‏بين الملذات والطاعات منشطره

‏انا موحدّك لو قصرت في ديني
‏اسوي الذنب لكني على الفطره

‏يارب طالبك ترزقني وتهديني
‏والستر والعافيه والسيرة العطره


...

يا رجل يا للي في غيابي تكلمت
علمك على بالي ورمزك فهمته

يا للي بحجه مستحيله توهمت
حولت حظك وسط بير وهدمته

سيلك تدفق من شفاك وتخرمت
ليتك عن اللي ما استحقه ردمته

وإن كان هادف لك هدف يوم هاجمت
العقل شوري والتزامك بصمته

وكان الجهل سيطر عليك وتقدمت
ما ظن يثبت قولك اللي زعمته

وإن ضعت مع جيش الطواري وهايمت
بركت للحق المصيب وغرمته

غادي وخيل لك خيالك ورهمت
وسم الحنش لو تلحسه ما جغمته

غروك ناسٍ من نسمهم تسممت
واللي عطى لو ما تبي ما حرمته

أنصحك وألا ما علي لو تقحمت
دام أحتمل زلة رفيقي حشمته

ونصيحتي وجهة نظر ما تغيشمت
شبحي بعيد ومن غدا ما غشمته

وليا بغيت أهدي هدية وقسمت
ما هس بالميزان قسمٍ قسمته

أنا ليامني بالأوضاع ساهمت
أصور الواقع نظر لا رسمته

ماني غشيم من التجارب تعلمت
وإن مال ميزان القريحة حكمته

لأمعنت بأسلوب المعاني وخاصمت
خصمي بجزلات المعاني خصمته

بلحام سكرت الملاحم ولحمت
وعلى منافيذ الملاحم برمته

لا سقت طاروق القريحة وصممت
حذفي على اللي يستحقه رجمته

وبعض الكلام أخير من رده الصمت
وإن جاء من الجاهل غلط ما جرمته

وعن بعض ما نسمع ويهرج تشيمت
وسلم الرجال أهل السلوم احترمته

ولو كل ما ثارت عجاجة تحيزمت
تهت الطريق وكل عابر صدمته

مهما حصل بأسلوب عقلي تحكمت
ورأي الحكيم المعتدل ما لطمته

لو كان به ناس توجه لي الشمت
مهما يقال بغيبتي ما حلمته

بعض الكلام الياسمعته تلطمت
وفيض المجالس ما أزعجتني نغمته

طبعي على تأديب الأخلاق داومت
ومن ضاع عن درب السنع ما دعمته

لا بس حرامي من شفا السيل وأحرمت
والعلم بالقلب المفتح حزمته

وحقيقة الواقع بها ما تحلمت
من مصدرٍ ماثوق سر وكتمته

إن شافها وإلا نصيته وسلمت
وحددت له مرسام حد ووسمته

ودليته اليمّه وبالله تعصمت
إلا أن تراجع صاحبي عن وهمته

ظنه ظنين اليا قريته وترجمت
بالحق وإسناد الوثايق هزمته

وإن ضاق صدره من كلامي تبسمت
وإن مد لي كف الرضا ما شتمته

ماني سفيه إليا إحترك عود برعمت
واللي مجنب سيرتي ما عزمته

وإن دار دولاب الهواجيس وأبرمت
معناي عن نقد العوارف عصمته

ما بعت في سوق الضغاين ولا سمت
ما أخطي ومن ميَّل عليه خزمته

ما أفطر على تشويه الأوضاع لا صمت
ورأس الصديع إليا اعترضني حجمته

وبسلوم لزمات الرجاجيل لا زمت
أسير مع سلم الرجال ولزمته

وليا سفهت التافهه ما تندمت
وما عون خلاق المشاكل خدمته

وأنا مع اللي يفتهمها تفاهمت
ومن لا تطرق منهجي ما زهمته

وإن حدني حادي قوامه وقاومت
سبحت مع موج البحر واقتحمته

جهزت نفسي للعبور وتولمت
عمق البحر لوهاج موجة دحمته

وجهتها بيضا صريحه وحكمت
أحكمت مضمون الجواب ونظمته

تم الجواب اللي نظمته وتممت
والوصل من راع البريد استلمته

وصدرتها بأسلوب هادي وترجمت
ومن لا ظلم نفسه حشا ما ظلمته

أدخل على الله بالخطأ ما تذممت
وحق العباد وقدرهم ما هضمته

وجو الصداقه ما سهجته ولغمت
معرض عن الغايب ولا آكل لحمته

ودام أمتلك نفسي عن الظلم حرمت
لو كان تجذبني لشخص أتهمته

لبستها ثوب المناعة وسجمت
وأرجي عسى الجاهل يوطي رضمته



بدر الحويفي الحربي

راسي ملك متواضع وصدري وطن
واخاطب اصحاب العقول الرايده

ياللي تراكا لك على اسفنج وقطن
غيرك تراكا للحمول الكايده

وكم واحدٍ يظهرخلاف اللي بطن
ومن ابسط الاشيا يدورفايده

لو عايدك(عيدالفطر)خلك فطن
يبيك لاجا(عيدالاضحى)تعايده

معروف بعض الناس علة في البطن
تبقا تعاني منه مثل:الزايده


...