فوق هام السحب ( الشعر الشعبي) على متن القوافي

أيامنا والليالي كم نعاتبها
شبنا وشابت وعفنا بعض الاحوالي

تاعد مواعيد والجاهل مكذبها
واللي عرف حدها من همها سالي

ان أقبلت يوم ماتصفي مشاربها
تقفي وتقبل وما دامت على حالي

في كل يوم تورينا عجايبها
واليوم الأول تراه أحسن من التالي

أيام في غلبها وأيام نغلبها
وايام فيها سوى والدهر ميالي

جربت الايام ومثلي من يجربها
تجريب عاقل وذاق المر والحالي

نضحك مع الناس والدنيا نلاعبها
نمشي مع الفي طوعٍ حيث ما مالي

كم من علومٍ وكم آداب نكسبها
والشعر مازون مثقالٍ بمثقالي

اعرف حروف الهجا بالرمز واكتبها
عاقل ومجنون حاوي كل الاشكالي

لاشك حظي ردي والروح متعبها
ما فادني حسن تأديبي مع أمثالي

ان جيت ابي حاجةٍ عزت مطالبها
العفو ما واحدٍ في الناس ياوالي

قوم ٍليا جيتها رفت شواربها
بالضحك وقلوبها فيها الردى كالي

وقوم ليا جيتها صكت حواجبها
وابدت لي البغض في مقفاي واقبالي

ما كني الا مسوي حال مغضبها
والكل في عشرته ماكر ودجالي

يا حيف تخفى أمورٍ كنت حاسبها
والاهل واصحابنا والدون والعالي

والروح وش عذرها في ترك واجبها
راح الحسب والنسب في جمع الاموالي

نفسي تبى العز والحاجات تغصبها
ترمي بها بين اجاويدٍ وانذالي

المال يحيي رجال لاطباخ ابها
كالسيل يحيي الهشيم الدمدم البالي

عفت المنازل وروحي يوم اجنبها
منها غنيمة وعنها البعد اولالي

لاخير في ديرةٍ يشقى العزيز ابها
يمشي مع الناس في همٍ و اذلالي

دارٍ بها الخوف دايم ما يغايبها
والجوع فيها معه من بعض الاحوالي

جوعا سراحينها شبعا ثعالبها
الكلب والهر يقدم كل ريبالي

عز الفتى راس ماله من مكاسبها
يا مرتضي الهون لا عزٍ ولا مالي

دللت بالروح لين أرخصت واجبها
وانا عتيبي عريب الجد والخالي

قومٍ تدوس الافاعي مع عقاربها
لها عزايم تهد الشامخ العالي

كب المنازل غراب البين يندبها
يبكي عليها بدمع العين هطالي

لا تعمر الدار والقاله اتخربها
بيع الردي بالخساره واشتر الغالي

ما ضاقت الأرض وانسدت مذاهبها
فيها السعة والمراجل والتهفلالي

دار ٍ بدارٍ وجيرانٍ نقاربها
وارضٍ بارضٍ واطلالٍ باطلالي

والناس اجانيب لين انك تصاحبه
تكون منهم كما قالوا بالامثالي

الارض لله نمشي في مناكبها
والله قدر لنا ارزاقٍ وآجالي

حث المطايا وشرقها وغربها
واقطع بها كل فجٍ دارسٍ خالي

اطعن نحور الفيافي مع ترايبها
وابعد عن الهم تمسي خالي البالي

من فوق عمليةٍ تقطع براكبها
فدافد البيد درهامٍ وزرفالي

تبعدك عن دار قوم ودار تقربها
واختر لنفسك عن المنزال منزالي

لو مت في ديرةٍ قفرا جوانبها
فيها لوطي السباع الغبس مدهالي

اخير من ديرةٍ يجفاك صاحبها
كم ذا الجفا والتجالي والتملمالي

دوس المخاطر ولا تخشى عواقبها
الموت واحد ولا عنه الحذر جالي

إن المنيه إذا مست مخالبها
تدرك لو كنت في جو السما العالي

مافرت الاسد في عالي مراقبها
تسعى للارزاق ماحنت للاشبالي

والشمس في برجها والغيم يحجبها
تقفي وتقبل لها في العرش مجدالي

رب السماوات يامحصي كواكبها
يا مجري السفن في لجات الاهوالي

ضاقت بنا الأرض واشتبت شبايبها
والغيث محبوس يا معبود ياوالي

يالله من مزنة هبت هبايبها
رعادها بات له في البحر زلزالي

ريح العوالي من المنشا تجاذبها
جذب الدلي من جبا مطوية الجالي

ديمومة سبلت وارخت ذوايبها
وانهل منها غزير الوبل همالي

تسقي ديارٍ شديد الوقت حاربها
ما عاد فيها لبعض الناس منزالي

يا جاهل اسمع تماثيل مرتبها
فيها معاني جميع القيل والقالي

مثل الدنانير تزها في قوالبها
في صرفها زايده عن قرش وريالي

يارب توبه وروحي لاتعذبها
بيوم القيامة اذا ماضاقت اعمالي

وازكي صلاةٍ على المختار واهبها
شفيعنا يوم حشرٍ فيه الاهوالي



بديوي الوقداني العتيبي

تل قلبي تل دلو من العد الجذوب
ناطحت به يوم تلت رشاه السانيه

يوم جيت العد خالي وهو كان معروب
ذي منازلهم عليها الذواري بانيه

خايف قلبي من الجزن والفرقى يذوب
يوم مروا بي رسمو الديارالفانيه

حي من داره عليه بني ذاري الهبوب
كل ما سجيت مريت داره ثانيه

هلت الدمعه وضاقت علي كل الدروب
باح سد النفس من عقب ما هي كانيه

صابر بالعزم وأنا على الصبر مغصوب
لي سنين ما حصل لي حياة هانيه

يوم عديت الطويله مع وقت الغروب
قلت هذي قدرة من حياتي دانيه

ويش بك يا عين ذا الليل ما عندك اسلوب
استخفيتي بجسم عظامه وانيه

لو عذلتوني وقمتوا علي من كل صوب
تفهمون النفس من حكيكم متغانيه

ويلهم من كلمة الظلم خالين القلوب
من يقولون القلوب الحزينه جانيه



عامر بن نوطان

يامضـيـق الدنـيـا ويـاضـعـف الإنـســان
شف قرب ضحكك في الزمن من نحيبك

لاتحـسـب إن الـوقــت لاشـــان مـــازان
ولاتـحـســب إنــــك بـتــعــدا نـصـيـبــك

الأرزاق مـكـتـوبـه ولـلــدهــر عـــــوان
والــلــي كـتـبــه الله عـلـيــك بيـصـيـبـك

العمـر عسـر ويسـر وأفــراح وأحــزان
تــــرزق بـمـولــودك وتــدفــن قـريـبــك

هـذي هـي الدنـيـا لـهـا أشـكـال وألــوان
تـضـحـك لـــك وتـلـقـا بـهــا مـايـريـبـك

ياصاحـبـي لــك عنـدنـا مـنـزل وشـــان
وأنــا إعتبـرنـي سـيـف كـفــك وجـيـبـك

وفـي كــل دار لــك بـنـي عــم وإخــوان
وأنــا ولــد عـمــك وإخـيــك وصحـيـبـك



محمد بن فطيس المري

يانور عيني ليه شوفك شفاقه
هذا جفى يا زين وإلاتغلي

على غلاك الزود ماله لواقه
واضن ماله بالضماير محلي

ودك غدى بالروح و الرجل ساقه
من الملا كله طويت السجلي

حتى وليف(ن)لي هروجه رقاقه
اناوفي(ن)ماتهاون بخلي

فارقت شوفه وانت سبةفراقه
واليوم مادري بئي دار يحلي

اليا شافني ياخذ علي اندلاقه
يمشي طويل وطول حسه يهلي

وإلا انت والله يانصفقت إنصفاقه
قدام وجهي ما تمتع بحلي

وإني طويت رشاك طي العلاقه
والحال فيهامن هاك اليوم حلي

حادور مابه للمخاليق طاقه
إن طال في طيله غدى في كلي

كانكم خلان لي و رفاقه
قدام زلال بروحي يزلي

يانورعيني ذوقوني ذواقه
غر(ن)ترى قلبي عليهن مغلي

طول النسم بحدود عقل ورواقه
يرفى لحالي ليال مضنلي

والله ماطلبكم وراهن لحاقه
وانه دوايه من بلايه وشلي

واني لكم يانور عيني عتاقه
انا دخيل حظوظكم قبل اولي

واناتراي ماني خطاة الهقاقه
الي علىغيبه انكان دلي

واللي يدل الناس كثر إصطفاقه
لو مل وجهه بارد(ن)مايملي

ياعود ريحان على جال باقه
شابك عليها زعفران مظلي

ياريم وانت احلا بخف ولباقه
ياعنك ماشح بحلاك المحلي

عليك عنق من المهاودراقه
ومن الصويتيه توزي ودلي

ومن الحرار بنورعينك رماقه
ومن الحمامه مشيها بس قلي

وإلا انت بوصاف وحلايادقاقه
مدري وش انت للعذارىمخلي

ربي عطاك و حط فوقك وساقه
اشقرقضيض فوق الامتان هلي

وقلبي عليك اليوم غادي حراقه
انته تبا تجديه وإلا تتلي

وتحط من دوني خليل(ن)عشاقه
وانا يسد من العناء ماحصلي


سبيل بن سند الحربي

حنا على الخوه نسوق المواجيب
وان بارت الخوه ماحنا بحاجه

لوجيهنا قيمه ولصدورنا غيب
ما الله خلقنا ريشةٍ في عجاجه

للطيب طيب وللموده تراحيب
وللجد حد وللسماجه سماجه

ابعد عن اللي لازعل ينكر الطيب
اللي تقلب عشرته مع مزاجه


ناصر الرزيني

البارحة.. من ضيقه الصدر محسوس
غابت علي الشمس في راس قمه

رجلي على جمره و كبدي على موس
عامين و الثالث على آخر متمه

صديت عن وادم به الحبل ممسوس
وعن وجه بن عمٍ يهين بن عمه

ادري بمسيري عكس والدرب معكوس
وادري ان سلاح الداب نابه وسمه

ما قلت جعل الروس تفدا لها روس
اقول وجهٍ تمدحه لا تذمه

ماكل جاسوس بسميه جاسوس
لو نعرف اللي كلفه بالمهمه

لكن بيت النمل والذر والسوس
ماهو بيت اللي كبيرٍ معمه

الناس نبت بروسها ريش طاوس
تفاخروا لين انكر العبد عمه

تنومسوا في شي ماهوب ناموس
مثل الصلاة اللي على غير يمه

اللي معه دفتر سنادات وفلوس
ويرهن مقابلها كرامه وذمه

يعطيك في الحسنى ندوات ودروس
ويصرف لك الاخلاق من راس كمه

ان عاف ماكن الطمع فيه مغروس
وان طمع في حاجه نسى ابوه وامه

ما نوس يا لوادي و لا انته بما نوس
مهم ولا فيك حاجه مهمه

اللي على جالك يصيدون جاموس
واللي وراهم ياكلونه بدمه

ذيابتك نجسه وفيرانك نجوس
وإن طحت بين يديه وداك فمه

أصنام تبنيها نصارى وهندوس
على قبور الانبيا والائمه

يا مملكة صدري من القوس للقوس
من لا يهمك لا تشيلين همه

جد الولد منحوس وابوه منحوس
جا من ظهره وقال لبليس سمه

اهون علي اعيش منفي ومحبوس
ولا ينبعث ريح الخيانه واشمه

ماني بدايم رايق اخلاق وهجوس
وإن ما ضويت بكارثه جبت امطمه


مدغم أبو شيبة

الشعر بعنا بسوقه وأشترينا به
ماهو جديد ٍ علينا ورث جديه

حطيت لي راية ٍ تومي بمرقابه
أطول من اللي شمال طويق مبنيه

المدح والنصح لي باع ٍ مع أصحابه
وإن جاء مجال الغزل عندي غزليه

قصايد ٍ من سمعها نالت إعجابه
مصنوعة من ذهب ماهي بمطليه

أطب سوق الجواهر وأتنقابه
وأخفف الوصف ماحب الأباحيه

والحب مافيه عرق ماتساقابه
مافيه غصن ٍ عروقه بالثرى حيه

ماهزه الريح وأقبل فيه وأقفابه
معروف حتى على دور الهلاليه

الحب دقيت زره وأنفتح بابه
من غير شوق يسوق أقدام رجليه

ولقيت لي حارس ٍ من جاه هلابه
مدري وش ديانته ومن أي جنسيه

قلت الهوى وش تشوف ووش تورابه
فكر وعطني عن الموضوع خلفيه

كانه مسمى يشرف من تسمابه
ياهل ترى من تكون له الأحقيه

قال الهوى كارثه يرثى لمن صابه
آلام متعدده . . وضغوط نفسيه

لكن حسب رأيي إن الشاعر أولابه
قلت أكتب أسمي مع الناس الهواويه

أبتفاخر من أول واتضاهابه
ولقيت لي ( قاطع ٍ ) مافيه ماويه

بيديه رمح ٍ يشق الصدر مضرابه
حطت شباته بوسط القلب حفريه

موت الدجيما ماكنت أصدق أسبابه
يالين شلفا خصيمه وَقعت فيه

يابو خدود سواة الورد جذابه
وإلا زهور الربيع بوسط محميه

ماأحد ٍ رعى نبتها وإلا تمشابه
ماهزها غير نسناس الشماليه

من دونها اللي يهابه من تهقوابه
عوازل ٍ شايكه . . وجيوب دوريه

ويابو جبين ٍ ليا أمسى الليل يسرابه
ألليا أتجه للقمر غطى على ضيه

وياعود موز ٍ ليا هب الهواء جابه
مع إتجاه الرياح يميل فوقيه

ويابو شعور على الأمتان منسابه
تشع مثل الشعاع بداخل الفيه

ليا تخلخل خلول ٍ مع شجر غابه
والشمس وقت الشتا ماهي عموديه

حبك من العام هز القلب وأدوابه
دواية اللي شلع من فوق كرسيه

من يوم طيّر وصقاره على أعصابه
يمكنّها روحة مابعدها جيه

خصص وركز وفل الريش وأومابه
واقفى ورى صيدة ٍ حذره ومرميه

بين السماء والوطى تنزل وترقابه
قبل المسا شرقت والريح غربيه

إقتل صويب المحبة وش تحرابه
لاصار مامنك حسنه . . عجل السيه

والحكم غصب ٍ على المحكوم يرضابه
لو أنها سنة ماهي بشرعية

الأمر كله وحد السيف وإنصابه
بيديك . . ماعاد هو الحين بيديه



عبدالله بن زويبن الحربي

علموا اللي كل يوم ٍ يقابلنا بثوب
ما يخدرنا كلامه مع من خدّره

إن لقينا اللعب نزحف مع جو ٍ لعوب
و ان هبطنا سوق طيب ٍ خذينا ندّره

العرب ما هيب تعلم مسدات الغيوب
و وارد الما ما يدلّه يكود مصدّره

ولا تجيك الحصبه إلا من فراش محصوب
وحبة الجدري تجي من ف،راش مجدّره

والمحب اذنيه ماهيب تسمع للعيوب
و العدو لا درهمت به تجي متحدّره

دامت الأخلاق يملك بها الواحد شعوب
ياجب انها في جميع الامور مبدّره

وان لقيناها طويله وموخرها سحوب
و المرض فيها فحوله تهيّج فدّره

ان قدرنا نقفل الباب من دون الهبوب
ولاّ جا درب لنا والقني مسدّره

الأصايل كل يوم تلافح بالكعوب
و الردي لا عيّن اللي يهينه قدّره

ولا تعرف حسابك إلا ليا صرت محسوب
وشرهة القادر على العالم المتقدره

فالمقابل نفتح له دواليب القلوب
و المقفي قلعة الوادرين تودّره



سعد بن جدلان

ياحي ياقيوم يارب الارباب
ياعالمً بالغيب واللي وراء الغيب

انته من نخافك ونحسب لك حساب
وانت المجيب الدعوتن مالها مجيب

يامنبت الارض الهشيمه بالاعشاب
ومسقي ثراها عقب لفح اللواهيب

عطفك بيومً مالنا عنه مجناب
اليا تبرّت من بعضها الاصاحيب

عبدك وابا توب الك ياخير تواب
قدم المنايا يحكمن المقاضيب

عانيت من دنيا المتاعب والانشاب
ودسيت جرحي فالظلوع المحاديب

وش لون ابصبر واتحكّم بالاعصاب
وانا ضحيه للعنى والعواقيب

في داخلي من صطوة الوقت مشهاب
وفي لحيتي من زود همي نقر شيب

اضحك واجامل ونقل حمول الاتعاب
ولاضاق صدري وقت روس المراقيب

اكضم على اللي في واسكر الباب
حتى مايفرح من يحش العراقيب

اللي يدوّر خلتن بين الاقراب
ولا يعرف الرفقه ولا يعرف العيب

ارفع مقامي عنه من شان الاصحاب
واشيل زلاته وجازيه بالطيب

اما يعدّي فوق في راس مرقاب
ويارد على فرزة قراح المشاريب

ولا على وضعه ومن فعل الاشناب
يصبر على صلو الجمر والمشاهيب


سلطان الحويقل

مزحنا عند النشاما على طيب ووقار
‏وكل هقوة طيب فينا نجي من فوقها

‏نتمارى فالقصايد وفالبل والمهار
‏ونعطي العالم مواجيبها وحقوقها

‏وفيه شي من السوالف هزيل وباختصار
‏من شرى الهزله بيبطي وهو في سوقها

‏وطمعت عيال الكراوين بعيال الحرار
‏هذي اللي تصرم الكبد من معلوقها

‏بندر الدويش