فوق هام السحب ( الشعر الشعبي) على متن القوافي

عزاه يا نفسٍ هواها جبرها
كما جبر حر الظما مفْخِت الجيش

ورّد عدود القوم ناسٍ خطرها
يوم استغاب ويبّسن النشانِيش

من حر لا هوبٍ بكبده سعرها
شيّء عواره ينهش الكبد تنهيش

هنى مرتاحٍ حياته شكرها
من نشوته ما تل قلبه ولا نيش

نفسه ليا عاسم هواها قدرها
عن المحبة ناقلٍ قلب درويش

ما ذاق لذات النفوس وكدرها
ولا عذبنه ناقضات العكاريش

نجل العيون اللي ملاحٍ صورها
اللي غلاهن فتش القلب تفتيش

إن لجلجت لك في سهاوى نظرها
والهرج منها بالاشارة تناويش

إن صافحت زم النهد عن نحرها
وان شاهدت تجذبك خرس مراييش

والله لو قلبك يقاسي صخرها
إنّهْ هو المبسوط والين من الريش

كل اللوازم سجها واختصرها
نسى الوصاه وصار بالفكر تشويش

والله لو له حاجة ما ذكرها
وليا ذكرها فايته قال حتيش

داوى بسكراتٍ على الله خبرها
شهد تساقاه القلوب المعاطيش

شهدٍ حلاته من عرفها ذكرها
غيره دوا لمعذب القلب ما ميش

في ساعة عند الثنين محضرها
تسوى وتكفى عن جميع المعاويش

اللي بنفسه كلمةٍ ما قصرها
من الراس ما يحتاج كز المطاريش

دارت مشاريهٍ بعيدٍ ضررها
فتنات غيظٍ من قلوب هشاهيش

أول دعاويهم كبارٍ عبرها
من عظم وجلاهم تصور مداهيش

وتالى دعاويهم تساهل قشرها
بعذرٍ ونهتٍ حمش الكبد تحميش

ليت المحبة ما تغير سيرها
وإن الهوى يحجب عن النذل والديش

يُفتَك من ناس غلطهم دمرها
صاروا بها غزو مديد حواشيش




مرشد البذالي

قال الشاعر محمد العوني
في مدح الملك عبدالعزيز
يوم وقعة البكيرية:



مني عليكم ياهل العوجا سلام
وأختص أبو تركي عما عين الحريب

يا شيخ باح الصبر من طول المقام
يا حامي الوندات يا ريف الغريب

اضرب على الكايد ولا تسمع كلام
العز بالقلطات والرأي الصليب

لو إن طعت الشور يالحر القطام
ما كان حشت الدار وأشقيت الحريب

إكرم هل العوجا مقابيس الظلام
هم درعك الضافي إلى بار الصحيب

عينك إلى سهرت يعافون المنام
غشٍ لغيرك وإنت لك مثل الحليب

لي عسكر البارود واحمر القتام
وتلافحت بأذيالها شهب السبيب

والله ما يجلي عن الكبد الملام
إلا الموارت يوم يأتي له نحيب

ومصقّلات كنها نوض الغمام
بحدودها نفرق حبيبٍ من حبيب

اجونا وجيناهم كما دولة نظام
يوم (البكيرية) وخبرك بالشعيب

يا كاسب الطولات طير الجو حام
والذيب جر الصوت يدعي كل ذيب

أبطا عليه القوت واحلولا الطعام
يبغي طريه مل من كثر الغبيب

تم الجواب اللي نظته والكلام
غرايبٍ يطرب لها القلب اللبيب

البارحة عيّن عيوني ينامن
واليوم من بعد السهر وضعهن سيّ

من كثر ماهن للصباح يتحرن
نجضت قلوب امواقهن والحدق ني

ان جا ظلام الليل رسل العنا جنّ
وقضيت ليلي بين آمر وناهي

مرسال ينهاني عن الشك والظن
ومرسال يامرني بفتنة هل الغي

مدري اطاوع منّ واعصى على من
اصبحت ما اخذت القرار النهائي

متحيرٍ ما بين ما ابدي وما اكن
كني مصدق شي ومكذبٍ شي

واللي نبي ما هو على ما يبن هن
واقول ما هي هي لو انها هي

مغير اعيد الذاكره واتفطن
في حاضري واللي فعلته بماضيّ

ليا عاد ما بي ما يقولن الالسن
ما ادري مثورة الفتن وش تبي بي

كلامهم خلى ضلوعي يلجن
لجة مخاليلٍ لواها العطش لي

وردن على بيرٍ به العام شربن
وجفت رواته ما بها ريحة المي

ما غيرهوّ من الموارد يخبرن
وتحارجن فوقه على حاجر الطي

ومن غربة الحاصل عظامي تثننّ
عجزن يشدني عن الارض رجلي

واللي ذهل عقلي وخلاني انجن
خطية الميت يعذب بها حي

الميت اللي مات مبطي ولا دفن
جنازته بلوى ومن ناشها بلي

وان قلت هذا كيف كان وتكوّن
سجل علي اكثر من اللي غدى لي

مالي سوى صبرٍ على سالفة هن
لونها تجرح وتذبح وتكوي




فرحان بن دبل العنزي

مفتوح باب الرجى لو هب مليون ريح
والريح ماتاخذ الغرسه من عروقها

القوس مكسور والرامي يقوم ويطيح
والسهم منعاج والايام خازوقها

لو لبسو ساقط الهرجه ثياب المديح
قلنا سحابة وبلة يابس حلوقها

ياحادي الركب لا توده عليه وتصيح
ماعاد هي سالفة ليلى ومعشوقها

مديت شوفي وشفت الكون رحب وفسيح
والارض حدر المواطي والسماء فوقها

مادام عين الرضا ماها هماج وشحيح
ابتبع الغيمة اللي رفة بروقها

مدري عن المقبلة لكن عسى الله يبيح
اللي تهز القلوب وهزني شوقها

غنيت للحب ولسان المحبة فصيح
والبدو سبة غناها ضيقة خلوقها

باكر يروح الشتاء والثلج قصره يسيح
مايفضح الثلج غير الشمس وشروقها




متعب التركي

توديع الأحباب مثل الموت له سكره
ادمى جروحي وشق الصدر منيـّا

والقلب طير ضلوع الآدمي وكـره
لا شاقـه الطلـع لاسلـم ولاحيـّا

مصير الأحزان تنسانـي وتفتكـره
ماكل الأيام بيض وسمحـة محيـّا

لو في يدي شي ماقلت الوعد بكره
حزمت حدب الضلوع وقلت لك هـيّا


متعب التركي

انشد عـن الرجـال قبـل تناسبـه
واحسب له الف حساب قبل تحاسبـه

حـذرا تناسـب واحـد علـة نحـر
تبلش معه ويحوسـك وتنحـاس بـه

راعـي الدراهـم لا تقـوم تـدوره
دور على طلـق الحجـاج وناسبـه

واخطب لبنتك قبل تخطـب لوْلـدك
رجـل يناسبهـا وهــيّ تناسـبـه

ترى مهـر بنتـك نسيـب محتـرم
ماهـو بمـال تحسبـه فالحاسـبـه

المال يفنـى والنسـب يبقـى ذخـر
يبقى على طول السنيـن يقـاس بـه

فاظفر براعي الدين يامـال الشحـم
اهم شـي الديـن ثـم السـاس بـه

فان كانـه يصلـي الفرايـض كلهـا
ومعرب ساسه ولا حـدٍ سـاس بـه

فادعـه ورحّبّـه ودســم لحيـتـه
واكسب نسب شرواه واكسب كاسبـه

كل يبي يكسب نسـب عطـر النبـا
اللي يشوش الراس له والـراس بـه

وان زدت من مالك فـلا بـه بايـره
البايـره لا تنقطـع الانفـاس بــه

وتحط نفسـك فـي مكـان مشتبـه
مايجلـس العـراف والجـلاس بـه

تملي عليه شـروط بيـع ومشتـرى
ويضيق به ثوبه وخـط انكـاس بـه

وتحملـه حمـل مايقـدر يحمـلـه
حمل ثقيـل تنقطـع الاكيـاس بـه

ماتدري ان مخذك مهر بنتـك غلـط
وآخير من رجواه قطع اليـاس بـه

وآخير مـن مجلاسهـا فـي بيتهـا
قدام راسـك لا يطيـح الفـاس بـه

فـان شفتهـا تجمـح ففـك عنانهـا
في صيهـد مـادوج العسـاس بـه

خلهـا تعيـش معـززه ومكـرمـة
الناجحـة ماهـي بمثـل الراسـبـه

ولا تحـاول تشتـرك فـي رزقهـا
رزق المره لا تشغل الهو جاس بـه

لا تطمـع الا فالنسيـب وفالنـسـب
كـبّ الطمـع فالنسبـه المتناسـبـه

المنسب الطيب مثـل مـوج البحـر
ولا الـردي مثـل الميـاه الراسبـه

هـذاك درعـك فالشدايـد والرخـا
وهذا عـدوك والبـلا والبـاس بـه

وهذاك لا احتجتـه خسـر مايملكـه
وهــذا وراك يــدور لمكاسـبـه

والواحـد اللـي مايعـرب منسـبـه
تلقى المرض والهم والوسـواس بـه

عرق النسب دساس من ماضي الزمن
ماينفـع التعديـل والهنـداس بــه

فاحرص على الناموس والعلم العـلا
مادام راسـك حـي والنومـاس بـه

طيبك يزيد الطيبيـن مـن العـرب
وردا نصيبك تفـرح الانجـاس بـه

وآخـر كـلا مـي كلمـة باقولهـا
فـي كـل جمعـا طيبـة ومناسبـة

عرِّب نسبك وخـاف ربـك واتقـه
وانشد عـن الرجـال قبـل تناسبـه



سعد بن عبدلله بن شفلوت

يا الله يا غفار سهّل لنا كل الصعاب
فكّنا من كربةٍ مظلمٍ سردابها

مالنا غيرك ملاذ ولا دونك حجاب
يرتجيك الخلق عنوانها وأحبابها

حيِّ يا قيوم أنا بأسألك بأم الكتاب
حاجة في كامن القلب وإنتَ أدرى بها

اعفو عنا يا مجير النبي من العذاب
واعفو عن أمة محمد فهو وصّى بها


د.عائض القرني

قالوا حبيبك يسمع الشعر قلت أيه
يقراه بعيوني قبل تسمعونه

لولاه حتى طاري الشعر ما ابيه
مير أكتبه من شان خاطر عيونه

هو روح شعري وأمنياته وماضيه
جذع الشجر وش كان لولا غصونه

اكتب لغيره والقصايد تجي فيه
كن القصايد حالفه ما تخونه

هذاك لا منه زعل قمت أهاديه
حتى وهو مخطي تعذرت دونه

يمكن لو أنه يلمس الجرح بيديه
يستغرب ان اللي لمسها طعونه

ابطى وهو غايب وزلت حراويه
وأنا من العام آتحرى مزونه

هو مادرى اني في غيابه محاتيه
ليته نشد عن حالي اللي يجونه

واقلبي اللي توه أفلت عراويه
كيف انسرق وضلوع قلبي حصونه

عجزت أرده كان ماني براعيه
يوم انتثر شوقه وهاضت شجونه

يبسن عروقي لكن اللي يعزيه
ان اكثر العالم تردد لحونه

خافو من الله لا تجيبون طاريه
لا صرت أنا موجود لا تذكرونه

لو كل غالي جابه الله لغاليه
ما شفت لك مخلوق تبكي عيونه



متعب التركي

‏لا صرت ماتمشي مع الناس محتاج
‏ولا جاك في بيتك من الناس ديان

‏ولا شلت في جيبك مواعيد وعلاج
‏هذي غناة ٍ . . ماتقدر بالأثمان

تصبح الدنيا بعيني كبر حجم الذرّه
لا أمست أمي راضيه وأبوي ممسي راضي

وأنبسط وأشوف نفسي صرت تاجر مرّررره
لا أمتلى المجلس ضيوف وشفت جيبي فاضي

من تعنّا لي لحاجه ودي بما سرّه
عيب القّي وجه من جاني كتوف إعراضي

ومن عرفني زين يعرف موقفي ما غرّه
حُسن فعلي معتني به قبل حُسن الفاضي

ما الحق المقفي ملام ومستحيل أتشرّه
والخطا لا جا من الغالي ماني متقاضي

أدّعي من قلب للّي كافينّي شرّه
وأنسجم لا صرت أمارس صدّة المتغاضي

يمدحون الصمت في نفعه ماهو في ضرّه
وكثر ترديد الكلام أشوف ماله حاضي

العمر ماهو يكرّر ،، ماهو إلّا مره
حاضره ما ياخذ إلّا ذكريات الماضي

ولا يعومس خاطري واونس بصدري حرّه
غير من جلسة خوانٍ عند ركبة قاضي




سعد بن عدال