فوق هام السحب ( الشعر الشعبي) على متن القوافي

يا بوي ماخلّيت لي شيٍ ابنيه
يا بوي درب الطيب كلّه ختمته

في سكتك تكثر علي المشاريه
وتصغر مواقيفي بفعلٍ رسمته

اتعب على ضلعٍ طويلة مراقيه
وإليا وصلت إلا أنت قبلي وسمته

اسمك رفعني عندالأجناب طاريه
ودرسك وأنا طفلٍ صغيّر فهمته

احب الكريم الي على الطيبين يجود
واحب المطر لو كان سيله مجنبني

واعرف الردي لو زاد ماله رداه يزود
فلا يعجبه طبعي .. ولاهو معجبني

نجاح الفتى سمٍ على اهل الكبود السود
يموت .. الحسود بجرعه الهم والغبني

وتجزعت من راعي الردى راعي المنقود
عدوٍ شريف .. ولا خسيسً يصاحبني


سعود الفهد

الأجواد واجـد والمراجـل لهـا كســــــاب
لكن واعد العشـرة ليـا صـرت جمالـــي

يطير الشـرار وكـل نـارٍ لهـا شبــــــاب
ومن ولع النيران يصبـر علـى الصالـي

تجارب حياتي معجـزة والدروب أصعــاب
ولقيت الرجال انـواع والـوان وأشكالـــي

صديق الشدايد ما خذا منك علـم وجاب
وسيع الصدر يضحـك ولا هـو بزعالــــي

صديـق الشدايـد لا ينافـق ولا يغتــــاب
يدلـه غريـب الـدار ويزبن الجـــــــالي

وصديق الرخى عقاب ومصادقـه عقـاب
شجاع الحكي والمـدح بالقيـل والقــــالي

وصديق الرخى ما غير صورة ولبس ثياب
يا ليتـه يبرقـع مالـه شمـاغ وعقـــــــالي

وعندي نصيحـه جـد ما قلتهـا لعــــــاب
أقول الصحيـح ونايـم القلـب يصحـــــالي

ترا خوة أهل الطيـب يالطيبيـن أطبـاب
يطيـّب السقيـم وخـوة اللاش ســـــلالي

تغانم شبابك يا أبيض الوجه دامـك شـاب
ترى البدر لو يطلع قمـر عـود أهــــلالي

فلا تهجر المسجد وخلك ورى المـــحـراب
ترى روضة المسجد لهـا منـزلٍ عـــــالي

ولا تترك اللي يزهمـك خايـفٍ مـــرتاب
ترى الذل ما نجى الثعـل با التحـــيالي

ولا للنِدى غير الفدى لو تروح إرقـــــاب
ومن ضاع شوره يأخذ الشــور ويمـــالي

ومن با شرك بالعـذر لا تلحقه بعتــــاب
ولا تشوف نفسك شيخ والنـاس عمـــالي

ولا تهين نفسك لو تجي بين ضرس وناب
وهيبتك لا تنقـص ولـو ربـع مثقـــــالي

وبنت الردي لا يعجبـك زينهـا الجـذاب
تراهـا كمـا المخيـال خيـل وتخيــــــالي

ولو شفت حمر خدودها والثمان أعـذاب
لا بدك تمنـى ليـت مـا جالـك إعيــالي

ولدها ليا شاف اللقـى والملاقــى هـاب
ذليـلٍ بخيـلٍ فيـه خفخـاف وجفـــــالي

أخذ بنت قرمٍ طيـبٍ ساسهـا مـا عــــاب
تنومسك بنت الشبـل ويجي لك أشـــبالي

أعيال الذياب تصــير مثل الذيـاب أذياب
وعـــيال الثعالـب مثلهـا زهـر الاذيالي

وفرخ الصقر مثله وفرخ الغراب غـراب
وبوم الخـراب ايقابـل العـش ويـــلالي

إلي صار راسك فوق يا طيب الأنســاب
فـلا ينحنـي لأقـدام رجليـن ونعـالـي

لكن الله اللي يكتب الـرزق يـا خطــاب
هو اللي يفك البـاب ويقـص الأقفــــالي

ولا يهمـل الا واحـدِ عايـفٍ الاشبــــــاب
ولا ضيع أحقوق البشر غيـر الأهمــــالي

وترى للقصايد كيف والكيف له شـــراب
وانا ما أشرب الا كيف راسـي بفنجــالي

ولا طاوع الجاهـل ولا جامـل النصــــاب
أقـدم يميـن الحـق واحــط معــــدالي

ولاني بو الله طيب إلا مـع مـن طـاب
ومن طاب لي برخص له الحـال والمالـي

أكذب وانا خابـر واجامـل وانـا كـذاب
سنين مضت هـي صـدق وإلا يــورالي

تلخبط جهاز المخ وانهـارت الاعصـاب
وفورت دمي وارتفـع ضغطه العــالي

لكن في رجى اللي من رجى رحمته ماخاب
هو الواحد العالي وهو ربنا الــــــــــوالي

وهو الخالق الرازق وهو المعطي الوهـاب
له الملك كله والكمايل والإكمـــــــــالي

رؤوفٍ رئيـفٍ رحمتـه تنقـذ المنصـــــاب
يغيث الديـار الممحلـه عقـب الإمحـــالي

شديد العقاب ويعتق المذنـب اللـي تـاب
عسـى مـا يوخذنـا بسيـات الاعمــــــالي

كما قاله الله فصبـروا يأولـي الألبــــاب
ترى الصبر زين وكلمـة الحـق تنقــالـي

واصلي واسلم عد مـا تنبـت الأعشـاب
وما لاح بـراقٍ سـرى يشعـل أشعــالـي

على المصطفى اللي وحد الدين والاحزاب
شفيع أمتـه يـوم الهوايـل والاهــــوالي


عبدالله بن شايق

عيوني على سهر أخر الليل حدتني
تولع بها سهر الليالي وظريت به

همومي على الرقده من النوم جزتني
وقلبي هواجيسه مع الهم لعبتبه

ولا حركت دقات قلبي تشاوتني
وغنا لها الشيطان صوت تلا حتبه

على مركب الأوهام والهم شالتني
وعلى سيف بحر الياس ركت ورستبه

ولا صورت خلي على طيف نبتني
وإلا قمت ماغير الخيال اتلفتبه

ألا يا وليفي صيطرتكم تولتني
كتب حبكم بالقلب وموضح كتبه

أشهد على حبك أملوك على متني
ويشهد ضميري من ونين تنهتبه

أراعيك من ذكرا وذكرك يوقتني
ولو غاب ذكرك ويش عاد أتقوت به

أنا لا بغيت أسج عن صورتك جتني
مع الطيف وإلا علمك الناس ماجبته

عليك الضمير أمهايم وأنتها حتني
هبوب الشمال من المعاليق هبتبه


سعد بن جدلان

يفوح لك شوقي مثل فوحت الهيل
في دلةٍ صفرة على الجمر فاحت

ويفز لك قلبي مثل فزة الخيل
لا شاف سيوف العرب فوق لاحت

احاول أوسع خاطري بين حين وحين
وامشي حياتـــي لين ربــــي يفرجـــها

اجامل على عيون العرب كل شي زين
ودون الضلوع هـــروج مانـــي بهارجها

ياشين طبعٍ عند بعض المخاليق
يظن فيك السوء قبل الحقيقة

على كلام الناس سريع تصديق
وينسى العلوم الطيّبة في دقيقة

المهره اللي تنـطلق دون تصفـيـق
في ملعب الاحساس تدبك وحدها

بين الغياب وبين لحظـات تشويق
نور القمر والشوق يطري وعدها

الصمت عن زلات الاقراب حشمه
والصمت عن زلة معاديك حقران

يعني بكل احوالك الصمت حكمه
اما يجيك بربح او منت خسران

تعوّد على صنع المروّات والجميل
وراعي ظروف الناس تظفر بودّها

ولا تنتظر منهم مقـابل ولا بـديـل
ومش شرط من عنده جمالة يردّها

ولا تلغي المعروف بالموقف الهزيل
ترى الـمَـنّ لو طال المباني يـهـدّهـا

ولا تتخذ في الدهر غير النقاء سبيل
وراقب ضميرك والزِم النفس حدّها

وخليك دوما"صاحب المعدن الأصيل
ومخزن في ايام العوافي واشدّها

وخير العطاء ماكان دايم ولو قليل
وراحة رجال الجود في راح يدّها

ومتى ماكرهت البخل لاتكره البخيل
فـهـذا مـنـافي للشريعة وضدّها

ولا تحكي الا عذب صافي وسلسبيل
فـمـا كل هـوّة قول عـفـوا" يسدّها

كما الحُب ماهو حظ من شرد الصميل
ولا حظ مـن سوى الجمايل وعدّها

وطبع التساهل يجعل السهل مستحيل
وبعض الحكاوي هزلها مثل جدها

فلا تدّعي من دون حجة ولا دليل
ولا تدخل الحاجة اذا ما انت قدّها

مع الحق سافر ألف كيلو وألف ميل
وقاوم بسيفك كل عوجاء وصدّها

ومدّ القدم نحو المعالي ولاتميل
واياك في درب الخيانة تمدها

فكم يادماء سالت وكم يادماء تسيل
وكم عين بكيت واغرق الدمع خدّها

دبور الخيانة حسبنا الله والوكيل
على كل خاين علّ كبدي وغدّها

فتبت يد الخاين وتبت يد العميل
ويلعن ابـو أم الخيانة وجـدهـا