ديوان شعراء السعودية في العصر الحديث (متجدد)☘️☘️

يا نور عيني



يا صاحبي جض القطا من جضيضي


ومن بد خلق الله عشقتك عشاقه
مال الزعل لمي دليل يهيضي


ولابي لغيرك يا حبيبي لباقه
يا نور عيني مال حبك نقيضي


وقلبي لغيرك ما يعرف الصداقه
إلى ذكرتك دمع عيني يفيضي


وامسح غزير الدمع عقب اندفاقه
يا كثر عبراتي ويا كبر غيظي


عليك ياللي ما تحمل فراقه
إلى حصل لاماك فانا الحظيظي


وقلبي على فرقاك غاد حراقه
خل التغلي عنكن ما انت بغيضي


انته مرام القلب وانت اشتياقه
اذكر هواك بصحوتي وتغميضي


وتطري على اشباه وجه دقاقه
رجلي على غيرك تقيف وتريضي


ويمك تسير ومشيها بانطلاقه
قلبي عليك من الموده مريضي


وما ذاق قيس من الغرابيل ذاقه

محمد الأحمد السديري

طيرك غدا بالصيف شاف التناكير



طيرك غدا بالصيف شاف التناكير


حدنه العقبان لين اقلعنه
والطير وقت القيض شر بلا خير


تتعب وكل ايديك مايشبعنه
عندي عوض طيرك ليال المخاظير


فرخ قرانيس الهوا علمنه
تحير في وصفه جميع الصقاقير


نضمن عيونه سود بحجورهنه
اشقر عديم ينثر الريش تنثير


وايديه شكاة الغلب ينثرنه
وان صرة قدام السلف والمظاهير


بامخافق الاجوال يعجبك فنه
طيريعوضك ياصبي المخاسير


وخل الصياح اونة الصدر كنه
قبلك بكينا الطير ويا الغنادير


قد عذبن القلب ثم اوجعنه

محمد الأحمد السديري

نبيك يامن سلت عن بعض الاحوال



انبيك يا من سلت عن بعض الأحوال


أنشد وأنا لك حاضرالفكر ومجيب
إن كان تبي الرشد يا طيب الفال


ازبن على رزاق عكف المخاليب
ازبن على اللي في يده علم الآجال


علام ما بالكون مذر المعاطيب
الواحد اللي للصعيبات حلال


منقذ مداريك ومبري مصاويب
اخلص لعلام السرائر بالأفعال


وناجه اليا صكت عليك اللواليب
ادعه يفرج لك ليا صكت الجال


حلال عسرات الأموار المصاعيب
اللي دعاه أيوب من ضيم الأهوال


وأنجاه من حال تزايد بها الشيب
الناس في دنياك كل له أعمال


أتبع طريق العدل وأبعد عن الغيب
درب النقاء بين ولك فيه مدخال


ومن باق ماله عند ربه مقاضيب
وليا رضا حلال عسرات الأقفال


لا تلتفت للخلق لوهم مغاضيب
لا تلتفت للخلق راحل ونزال


مالك على ذرية آدم مطاليب
ورفيقك المأمون حطه على البال


وأذره اليا جن الليالي شلاهيب
أجعل بقلبك له محل ومدهال


تلقاه ذخر بمعضلات المواجيب
عديل روحك لا تدوربه إبدال


عونك ليا صكوا عليك المغاليب
ما هوب من شيل العظايم بملال


يصبر كما تصبر على شيلها النيب
مفراص ماص للصعيبات حلال


صميل قيض وماضياً له تجاريب
وأحذر ترى بالناس مبغض وختال


ماله مراجل كود شذب العراقيب
عن مذهبه خلك على راس ما طال


وخله على فاله يشم المغاريب
البوم يسكن بالخرايب والأطلال


والحر مسكانه بروس المراقيب
طير السعد من كفه الدم شلال


بالمخلب الساطي عطيب المضاريب
ولا يغرك بالرخم كبر الازوال


وكبرالنسورالمهدفات المحاديب

محمد الأحمد السديري

يا مل قلب كـل مـا التـم الأشفـاق
من عام الأول به دواكيـك وأخفـوق

يجاهد جنود فـي سواهيـج الاطـراق
ويكشف له اسرار كتمهـا بصنـدوق

وان عن لي تذكار الأحبـاب واشتـاق
بالي وطاف بخاطري طاري الشـوق

دنيت لي مـن غالـي البـن مـا لاق
بالكف صافيها مـن العـذق منسـوق

احمس ثلاث يا نديمـي علـى سـاق
ريحه على جمر الغضا يفضح السـوق

أحـذرك بالنيّـه وبالـك بالأحـراق
اصحا تصير بحمسـة البـن مطفـوق

الى اصفر لونه ثم بشـت بالاعـراق
وصارت كما الياقوت يطرب لها الموق

وعطت بريـح فاضـح فاخـر فـاق
ريحه كما العنبر بالانفـاس منشـوق

دقـه بنجـر يسمعـه كـل مشـتـاق
راعي الهوى يطرب الى اوحاه بخفوق

وكبـه بدلـة مولـع كنهـا ســاق
بنـورة منصوبـة تقـل غـرنـوق

خله يفـوح وراعـي الكيـف يشتـاق
الى طفح له جوهـر صـح لـه ذوق

وزله على وضحا بها خمسـة أرنـاق
هيل ومسمـار بالاسبـاب مسحـوق

مع زعفران والشمطري الـى انسـاق
ريحه مع العنبر على الطاق مطبـوق

والـى اتفـق هـذا وهـذا بتيـفـاق
صبه كفيت العوق عن كـل مزهـوق

بفنجال صين صافي عنـه الأرمـاق
يطرب الكرسيه مـع البـال معشـوق

شكله على الفنجال صبغ كمـا الـراق
او دم قلـب وانمـزع منـه معلـوق

راعيه كنـه شـارب ريـق تريـاق
كاس الطرب وسرور من ذاق له ذوق

الى انطلق مـن ثعبتـه تقـل شبـراق
دنق تصور بالحمامـه علـى الطـوق

يعتاض عن خمر السكـارى بتريـاق
غرو تشـف شفـاه والعنـق مفهـوق

عبث يعيـل بحبـة منـه مـا مـاق
وهو يشابـه ساطـع البـدر بشعـوق

والى عنج في وجنتـه بـارق حـاق
عجل رفيفه بالطهـا القمـح مطبـوق

والعنق كن الورس والمسـك بـه راق
مع مشخص في صدره الشاخ مذلـوق

يمشي برفـق خايـف مدمـج السـاق
يفصم حجول ضامها الثقل مـن فـوق

الى صفا لك ساعـة وانـت مشتـاق
اقطف ثمر ما لاق والعمـر ملحـوق

اول صوابي رنـة الحجـل بالسـاق
وحجول من تشكي خلا خيلـه الـذوق

والله لـو يمشـي شفـاق بالاسـواق
من الملا ما يمطـخ الخمـس مخلـوق

والى حصل ما قلت عندي فـالارزاق
في يـد كريـم كافـل كـل مخلـوق


محمد عبدالله القاضي

مرقا العلا خطيِِِر عسير صعوده



مرقا العلا خطيرٍ عسيرٍ صعوده مايطلعه من لاتجلد على الكود

والبيت مايبنى بليا عموده والحيف يزعل من عن الحق مردود

والحر يجزع يوم توطأ حدوده وتشرهه نفسه على الطيب والزود

ولايشتكي من لا تضره لهوده إن شاف جور الحيف والعدل مفقود

والوقت شفنا كل بيضه وسوده وشفنا نهار مع لياليه مضهود

والغيم لو تسمع صواعق رعوده لاممطرٍ وبلٍ ولا هوب مريود

يامدورين الطيب قيسو عدوده والطيب عدٍ بين الجواد مارود

والناس بأرض الله تراهم شهوده وحق بلا فعل على الرجل مجحود

والنذل حيلات الردى ماتكوده واليا بغا الطولات مايدرك الجود

عن المراجل قاصرات زنوده طير العشا يصبر على كل منقود

الخيل ماتشتكي مضاريب عوده وبالقيض ماركب النضا مثل صاهود

يعيش في دنياه همه رقوده ولا نفضنه قرح الخيل والقود

لا عل رحمة خالقه ماتعوده


وعساه مع زمرة هل النار بخلود
هذا زمان هايبات فهوده


والناس نادو عنترة بسم مسعود
واشوف لي رجلٍ يعدد جدوده


لو أن أبوه وجده اضعف من الدود
كلت من المأطاء رواسي حيوده


والبوم شاش ولابسٍ درع داوود
والنيص حط لهامة الراس خوده


عقب المذله له طوابير وجنود
ماكن شيء في زمانه يكوده


شاهد بها الدنيا سلامات وركود
وحتى الغراب اليوم يفخر بجوده


والفأر بذراعه قطع كل بالود
والشري والحرمل تباهت وروده


وقامت تشيل غصونه الماس وعقود

محمد الأحمد السديري

راح الصديق اشباح ليل به احلام



يالله يا عالم خفيات الارحام يا منزل الما من صدوق الغمامي

تفرج لقلب بين لاوي وصرام ويكويه من لوعات الايام حامي

والعين عن طيب الكرا جفنها شام ان ناموا المخلوق عيت تنامي

ينام من هو داله القلب مريام


وانا بقلبي جرح والجرح دامي
جرح جرح قلبي صوابه من العام


بين الضلوع بخافق القلب كامي
اخفيت ضره لين بيح بالاجسام


واليوم زاد وشاهدوه الانامي
جرح تبين بالحشا موجع ضام


وصدر تلوعه الهموم الجسامي
وغديت ما بين الحقايق والاوهام


مثل الدريك بصحصح اللال ضامي
هنيت مرتاح بليل الدجى نام


يرقد ويصبح بين امان وسلامي
ماهوب مثلي ينهشه غاسق الهام


زعاف سمه صاطي بالعظامي
اعوم ما بين الليالي والايام


مثل الغريق بمظلمات الجمامي
راح الصديق اشباح ليل به احلام


سراب صحصاح به الزول زامي
واشوف عقب الولف طير الشقا حام


وانا احسبنه قبل هذا قطامي
ابيه بايام الهدد عجل الاولام


لاشك صد وهز ريشه وحامي
الظن خاب وخطوتي بين الاقدام


قصرتها وافكر بحامي وسامي
فكرت وين اهال الدلايل والاعلام


وصديت بافكاري جنوب وشامي
ولا وجدت الا تماثيل واصنام


تخالفت فيها كثير الاسامي
وين الصديق اللي على الكود جزام


الليث بواج الخطر بالظلامي
على الفضيلة يبدل المشى درهام


وعن الرذيله ينحرف بانهزامي
مشيه على الطولات بالعزم قدام


ودايم على ساقة رفيقه يحامي
عزى لمن فكره تشاتيت واقسام


يومه مثل ليله ظلام وكتامي
ان ضاقت الدنيا على كل ضرغام


الله لها عند اكتراب الحزامي
اللي بما يخفى على العبد علام


بحبل الرجابه مقضبي واعتصامي

محمد الأحمد السديري

قم يا محيسن



قم يا محيسن شب نار المعاميل


وصفصف عليها السمر من زين الاخشاب
ان ولعت واستضرمت باللهب حيل


يجذب سناها بالدجى كل شراب
وان صرمت والجمر فيها دحاميل


أزرق سناها ذايب يلهب الهاب
احمس عليها البن من غير تقليل


واحذر عواقب من هرج عايب عاب
ودقه ولقمها وزود لها الهيل


حتى يصير الكيف طب للألباب
ماها قراح صافي من شهاليل


من وبل رايح داجي الغيث نحاب
يا حلو صبتها ببعض الفناجيل


ان ذاقها الممروض من علته طاب
يالخالدي يطري على التعاليل


يوم الرقيب معلق تقل مشهاب
يوم الكواكب مثل لون المشاعيل


وعنا ردي الخال يالحيدري غاب
جانا من العارض كلام بتفصيل


من واحد يشكي من الناس عجاب
يشكي هوا راع العيون المظاليل


وقبله عقاب الخيل يشكي على حجاب
ماجور يا شاكي هو انافل الجيل


الله يفكك من عنا عكش الاهداب
الطير يشبك بالشرك مثل ما قيل


والصيد يشرف طارده كل مرقاب
اتعب وعد بنا يفات الاقاويل


ويبين لك بصخيف الوسط مضراب
حرك قدم رجلك إلى هود الليل


ومن بعد الملقاف في بندقه صاب
بلكي ياخو ناصر تحصل محاصيل


تصادف الغرات تفتح بها ابواب
معهن لمن عناك تلقى محاويل ويبهج فوادك طقة الناب بالناب

تشم بين اشفاه بيض معاسيل يكسر عليها عابد وسط محراب

بيض يشادن قحويان الغراميل


فيهن دواك وداك يا زاك الانساب
ياما من الخفرات ذقنا الغرابيل


وياما عديت الين عرش القدم عاب
وياما زعجت الويل والحقته الويل


وياما دخلت بحور لجات وغباب
وياما سطابي بالهوا ضاهد الشيل


وياما عسفت من العماهيج الاصعاب
وياما تلوينا بشقر عشاكيل


ايضاً ولا اخشى الناب من غاسق الداب
اركض لهن لو هن صعاب المناويل


وعلى من سمر الحناديس جلباب
اتبع هواجماً تقود المغازيل


مع صحصح نشرب هواكل خنياب
عيني تعرف الزين بين الازوايل


وقلبي من الرثم الخراعيب مرعاب

محمد الأحمد السديري

حل الرحيل وفرقوا شمل الاحباب



حل الرحيل وفرقوا شمل الاحباب


ناس على فرقا الاحبه مغاليل
غدى لهم مع طلعة الشمس ضبضاب


وسالت دموع العين مثل الهمايل
وقفت اراعي سيد تلعات الارقاب


واغضي وهو يغضي بسود مظاليل
بشفاه يظهر ماتخفى بالالباب


وبشفاي افصل له عن الحال تفصيل
اسرار ودٍ بين صايب ومنصاب


نجوى لها باقصى الضماير مداهيل
سرايرٍ تنساب من تحت الاجياب


لصدورٍ اطهر من قراح الشهاليل
روحي على حبه لها كم جذاب


ويتل قلبي عذب الانياب بالحيل
لوان حبه يطعن القلب باحراب


ابرى ليا شميت بيضٍ معاسيل
على نقا ماني بغادر وكساب


وبالعرض والله ماندور محاصيل
ماني بمن يجرح عشيره بالاسباب


ويحط له مع كل ريعٍ محابيل
بس الحديث وقرعة الناب بالناب


واظهار مكنون الغلا والتعاليل
عزي لمن مثلي من الحب منصاب


تارد عليه هموم قلبه زعاجيل
اليا رقا مرقاب ناداه مرقاب


بمفارق الخلان شاف الغرابيل
الله لايجزي عريبين الانساب


لو هم على ماقيل سوٍ على الخيل
الي سعوا بافراق وضاح الانياب


وخلوني اجزع من عنا الغبن واشيل
فرقا ومنها القلب وسط الحشا ذاب


وعسى هل الفرقا لهم صافي الويل
عسى يصادفهم من الغيث سكاب


وبله غضب مابيه يمطر لهم سيل
ابيه يجدع مثل قلات الاطواب


منها البرد ينماز كبر المخاليل
وصواعقٍ منها المواليد شياب


والحي منهم ذاهل العقل بهليل
بامر الكريم ومن ترجاه ماخاب


يمطر عليهم مثل ماجا هل الفيل
الا لطيف الروح يذريه بحجاب


كنه براس الطور وهمْه ورى النيل
ويرجع علينا جادلٍ يزها الاسلاب


من خلقته مانيش عرضه ولا قيل
به مايعيبه للبعيدين واقراب


حاشا ولا تلقى عليه المداخيل
نقي عرض ولا عشق كل نصاب


الجوهر الغالي رفيع المناويل
وانا يصارحني بلا سر وكتاب


وعن حالته يشرح لي العدل والميل
هرجه على قلبي كما الشهد ينذاب


وقلبي على قلبه يرد المراسيل
كنه بعيني لو غضب كل عتاب


بدرٍ تعلى كوكب الجدي وسهيل
طفلٍ سلب مكنون عقلي والالباب


عليه اجاوب نايحات البلابيل
ياشطون قلبي زجي السر بكتاب


مني لابو غشام زبن المشاكيل
قولي رفيقه من هوى الزين ماتاب


ويرجيه رجو البدو وبل المخاييل
وبالليل ياقف له عن النوم حراب


وكنه يلوج بموق عينه سماليل

محمد الأحمد السديري

وحيد



قالوا: وحيد وقلت: ما عندي أوناس


قالوا: غريب وقلت: بأرضٍ بعيده
أبعدت مابي شوف ناس ٍ من الناس


أبعدت عن بعض الملا وتعديده
مطاوع ٍ قلبي على كل الأجناس


والبعد عن شوف المكاره يفيده
اخترت بعد الدار عن قرب الأنجاس


عن دارهم نلقى ديار ٍ جديده

محمد الأحمد السديري

بيض الصبايا



ذكرت لي عندك ثلاثة عذاريب


والكل منهن يا محمد نودّه
بيض الصبايا وامهات الدباديب


ولهلاه برد ٍ في دياره مجدّه
فيها الزهر ريحه كما فايح الطيب


بارض ٍ مساسٍ للنظر مجرهدّه
يدله بها الريمي وتدله بها النيب


ويذكر لنا صيأد العذارا بخِدّه
المترفات الناعمات الرعابيب


بيض النحور مليّنات المخده
مثل المها الشرّاد رثم ٍ خراعيب


عيون الوحوش وتوّها مستهدّه
نمر العتيبي عقبهن فارق الطيب


زادن عناه وبيحن كل سدّه
يجاوب العاوي بروس المراقيب


وعينه على سفك العباري تحده
ويهرف من الفرقا كما يهرف الذيب


ووده مع البدوان نزله وشدّه
لو ان طراد الهوى يشلق الجيب


محد ٍ يلوم المبتلي بالموده
والدار عندي بين حر ولواهيب


ولا عندنا كود الوجيه المصده
نصبر وهذي يا محمد مواجيب


صبر الجمال اللي ضرت للمكده
ونشتاق للبيضا ونبعد عن العيب


ونبني كلام ٍ كل حي ٍ يعده
يوم الردي جنّب عن الطيب تجنيب


واللي هفا به فعل خاله وجده
ما خاض عركات تنابط بها الشيب


وان ادبروا ما قال يالربع رده

محمد الأحمد السديري