لو عادت العمّه حليمه

يا هجوسي ليه تطرين التعب آن وقديمه
تحسبينه يوم هو يعتادني يسعد جنابي
أدري إنّك في عنادي وإن خصمك للهزيمه
لكن اليوم اقرأيني مثلما يرغب خطابي
لو تبوحي بالحصيل أو تكتمينه في قصيمه
كلها الوضعين مأخوذه من الوضع الضبابي
بأبتسم وأسخر من اللي ما يدوّر للحشيمه
وأكتب آميني بنسخ الخط في معظم كتابي
لأجل أحرّر لليالي قصّة العين السقيمه
والدموع اللي سقت خدي وأنا باقسى مصابي
جايز أنسى بعض شي وأحصل على فرصه سليمه
وأختفي عن همي العازم على نيّة عذابي
لو ثواني فرصتي باسعد وبافرح بالغنيمه
حد وقتي ما سلب عمري ولا حطّم شبابي
بعدها ماهمني لو عادت العمّه حليمه
قد رشفت من السعاده بعض من قسمة شرابي
والتعب مهما تجاوز حدّ الأقواس الخصيمه
ما لي ألا الصبر لو يكثر مع الحسبه حسابي
كم وقعت بهول من فوق السحاب وجت سليمه
قلت عادي ثم قمت بقوّ عزم أنفض ثيابي
عادة فيني ولا هي دوبها ألاّ مستديمه
ماخذ(ن) قول المثل (كبوة جواد) أسمن ركابي
أنتشي فرحه أذا شافت عيوني كل ديمه
وأبتهج لو هلّ ماها وأزهرت خضر الروابي
وأفرح بشوف الطيور السابحه مع كل غيمه
مثلما يفرح صغير السنّ لي قالوا حبابي