ما كل من يركب على الخيل خيال

ما كل من يركب على الخيل خيال
ولا كل خيل تعجبك هي أصيله

ولا كل من يعجبك هرجه برجال
بعض العرب ملسون وأيده بخيله

الكل يلبس ثوب و شماغ وعقال
وعند اللزوم أفعالهم هي قليله

الرجل تثبت له أقاويل بأفعال
لا قال شئ ونفذه هو دليله

والرجل لا شفته مع القيل والقال
ابعد عنه هذا صفاته عليلة

وخلك شجاع وذي صفات للإبطال
اللي كما سيوف تبارق سليله

واللي شراك اشريه لو كان بالمال
خلك معه وان مال دور بديله

واصبر ترى الدنيا تبدل بها أحوال
وما كل شئ صافي تشوفه تجيله

وبعد الكدر تشرب صفا عذب وزلال
هذا الزمن فيه استقامه وميله

وصاحب خليل لو جفا الوقت ما مال
ترى الرجل يعرف بقيمة خليله

واقفل على سرك بكتمان وأقفال
بعض العرب يسمع و ينوي بحيله

وخلك أمين إذا توليت الأعمال
من خان في يوم الحشر يا حليلة

خل التواضع فيك واضح بالأفعال
ترى الكبر يردي بيوم وليله

ولا تحسد اللي عنده أموال وعيال
وش ينفعك لو كان حسدك يزيله

وخلك رزين ترى المخفه للأطفال
واصفح عن المخطي ولو زاد قيله

واحمل همومك لو تزن وزن آلآثقال
بكره تروح وتنجلي لو ثقيلة

وصل الفروض ولا تنسيك آلآشغال
محدن في الدنيا درى وش بقي له

وزور آلآقارب للرحم كون وصال
وخلك عظيم الشأن وسط القبيلة


........