أخذت من روحي لروحي نصايح

أخذت من روحي لروحي نصايح

ثلاث يرضن النفوس الضياقي

جمع الحطب ومعلقات الذبايح

وحذف النشاما للغتر والطواقي

بقفر خلا عشبه بالأزهار فايح

غصن الخزاما به بالآخر مراقي

تلقى أم سالم به تجر النوايح

يطيب مع طير الربيع التلاقي

بين أربعة جدران مانيب طايح

قطع الخرايم جبّرت عظم ساقي

في نون عيني بارق الوسم لايح

كن السحاب تسل فيها السناقي

إن عوّدوا غب المطر للفلايح

مانيب فلاح يعدّل سواقي

عوّدت للي يكسبن المدايح

فيهن طرب قلبي ولذة مذاقي

سود البكار المكرمات المنايح

هاذي ضوت خلفة والأخرى ملاقي

ملحا تباهت بالصميل يتمايح

تركي على كبد الحسود العراقي

خلوني اقضي باقي العمر سايح

مادام للعمر المطرّف بواقي

أمشي تحت غر المزون الروايح

هذا هواي ورغبتي واشتياقي

يرتاح بالي يوم أدوه وأصايح

وابسط فراشي في مبارك نياقي

انحاش عن ناس تسوي الفضايح

عاشت بسوء أخلاق كذب ونفاقي

ناس تسرّد للمشاكل شرايح

تثير من بين الاخوان الشقاقي

كل الحياة احلام والعمر رايح

طرقي بها الدنيا وغيري طراقي

خلف بن هذال