المستحيــــل💞

إن طول العمر كلمة عل عمرك طويل

يمر ساعات كل لحظة تعادل سنة

ما بين وقت الوصول وبين وقت الرحيل

وما بين نطلق عزيز الدمع أو نسجنه

وأنا من اللي تعدت ألف جيل وجيل

ما بين جلادها والصعبة الممكنة

أحلم بنسمة عليلة مو فؤاد عليل

أحلم بأني أكون أكبر من الألسنة

أحلم ولا ردني في زعمهم مستحيل

ما كنت مسكينة ولا في يوم متمسكنة

عبرت سبع البحور وما عبرتك يا نيل

وعرفت أن الشعر أكذبه هو أحسنه

ومريت من شارع الذكرى وروحي تميل

والشوق فيني فتني قبل لا أفتنه

وعطيت شيء أحسبه شي ما هو قليل

في شرع روحي جزيل المد ما أوزنه

وفي شرع نفسي أكابر لو حملي ثقيل

يموت عزمي وأرده قبل ما أدفنه

وصلت نفسي بنفسي ما نطرت الدليل

وزعت عقلي بفكري لين صوتي جنا

وغرست ما بين صدري وبين ضلعي نخيل

أموت ويظل بعدي واقف ما انحنى

وورثت صوتي وأحساسي وقلبي «هديل»

وبنيت لي بيت شعر وقلت أبي أسكنه

يا عابر الدرب.. مو كل المشاعر سبيل

ومو كل شي بقلبي قادرة أرهنه

ومو كل بيت تقوله بالقصايد جزيل

يا كم بيت نطقته دون ما توزنه

خفف بها الخطو.. قبلك شي ما هو قليل

وخلك على ذمة الإحساس والسلطنة

ولا تدور مع هالخلق منّي حصيل

لي قلب تتعب رحى الأيام ما تطحنه

ما مت بس مات فيني كل شي جميل

وما عشت بس عاش فيني شخص ما هو أنا


للشاعرة الكويتية موضي رحّال